കൗമാരത്തില്‍ നിറം ചാലിച്ച് വരച്ചതിലേറെയും ഇലകളായിരുന്നു. പച്ചയും പഴുത്തതും നീണ്ടതും മെലിഞ്ഞതും ക്യാന്‍വാസിലും ചുമരിലും നിറഞ്ഞുനിന്നു. വരയ്ക്കാനുള്ള എളുപ്പം മാത്രമായിരുന്നില്ല. ചുറ്റും എപ്പോഴും ചലിച്ചുകൊണ്ടിരിക്കുന്നതിന്റെ നിശ്ചലതയാണ് ജോണ്സണ് വര്‍ഗീസിനെ ആകര്‍ഷിച്ചത്. ചിത്രപാരമ്പര്യം ഒന്നുമില്ലെങ്കിലും ഇലകള്‍ ചുമരിലും മനസ്സിലും നിറം പിടിച്ചുതുടങ്ങി. വിവിധ ഇലകള്‍, നിറവും രൂപവും മാറുന്ന ഇലകള്‍, ഒരു വൈവിധ്യവും ഇല്ലെന്ന് ആദ്യം തോന്നുമെങ്കിലും സൂക്ഷ്മതയില്‍ ഇനങ്ങളില്‍ വേറിട്ടതിന്റെ സൂത്രം ഒളിപ്പിച്ച മുളകളിലേക്ക് കൗതുകം നീളുന്നതങ്ങനെയാണ്. കടുംവര്‍ണങ്ങളും ഇളം വര്‍ണങ്ങളും നീണ്ടതും കുറുകിയതും പരന്നതും മുളയിലകള്‍ വരച്ച് വരച്ച് മുള വൈവിധ്യങ്ങള്‍ തൊട്ടറിയാന്‍ ഇറങ്ങിയ മനുഷ്യന്‍. പഠനങ്ങളെല്ലാം പ്രത്യക്ഷ നേട്ടത്തിനാവുന്ന കാലത്തും അറിയാതെ അറിവിന്റെ വാതില്‍ തുറന്ന് ഒരു സസ്യവൈവിധ്യത്തിന് കലവറക്കാരനായത് അങ്ങനെയാണ്. ഭൂമി പാട്ടത്തിന് ഏറ്റെടുത്ത് പോലും പതിനായിരത്തോളം മുളകള്‍ നട്ടുപരിപാലിക്കുന്ന മനുഷ്യന്‍. പ്രകൃതിയുടെ കാവല്‍ക്കാരന്റെ വിശേഷങ്ങളിലേക്ക്.
എല്ലാം മുളയില
പുല്‍പ്പള്ളിയിലെ തൊട്ടിയില്‍ ജോണ്സണ് കോഴിക്കോട് സില്‍വര്‍ഹില്‍സ് സ്‌കൂളില്‍ പഠിക്കുമ്പോഴാണ് ചിത്രരചനയില്‍ കമ്പം കയറുന്നത്. വരച്ചതിലേറെയും മുളയുടെ ഇലകള്‍. മുളയിലയുടെ പച്ച ജോണ്‍സന്റെ മനസ്സില്‍ പതിഞ്ഞുകിടന്നു. എന്നും അത് കൗതുകമായിയിരുന്നു. എന്നാല്‍, ഏറെക്കാലം അരിയുടെയും കുരുമുളകിന്റെയും മൊത്തക്കച്ചവടക്കാരനായും കാപ്പിയും കുരുമുളകും കൃഷിചെയ്യുന്ന കര്‍ഷകനായും ജോണ്സണ് ജീവിച്ചു. നാല്‍പ്പതാം വയസ്സിലാണ് കെട്ടുപാടുകളെല്ലാം മെല്ലെ അയഞ്ഞപ്പോള്‍ മനസ്സില്‍ വീണ്ടും പച്ചയിലച്ചന്തം മുളപൊട്ടിയത്. വയനാട്ടിലെ വിവിധ പ്രദേശങ്ങളില്‍ വളരുന്ന മുളകളെ അറിയുകയായിരുന്നു ആദ്യം. ഇത്രയധികം വൈവിധ്യങ്ങള്‍ മുളയിലുണ്ടെന്ന വിവരം അത്ഭുതപ്പെടുത്തി. അവ ശേഖരിക്കലും നട്ടുവളര്‍ത്തലുമായി പിന്നീടുള്ള പദ്ധതി.
ഇത്തിരിക്കുഞ്ഞന്‍ ഷിബറ്റായ
മുള വര്‍ഗത്തിലെ ഏറ്റവും ചെറിയ ഇനമായ ഷിബറ്റായ കുമസാക്കയ മുതല്‍ സെട്രോകലാറുസ് സിനിക്കസ് എന്ന ഭീമന്‍ മുളവരെ ജോണ്‍സന്റെ തോട്ടത്തില്‍ വളരുകയാണ്. ആനമുള, കല്ലന്‍മുള, ലാത്തിമുള അലങ്കാരമുള, കുള്ളന്‍ തുടങ്ങി 140 സ്പീഷീസിലുള്ള 221 ഇനങ്ങളിലായി പതിനായിരത്തോളം മുളകളാണ് പടര്‍ന്നുപന്തലിച്ചിരിക്കുന്നത്. ഇന്ത്യയില്‍ തന്നെ മറ്റൊരിടത്തും ഇത്രയധികം വൈവിധ്യത്തില്‍ മുളകള്‍ വളര്‍ത്തുന്നില്ല. ഇന്ത്യയില്‍ 136 സ്പീഷീസ് മുളകളാണ് കണ്ടെത്തിയിട്ടുള്ളത്. ലിംക പുരസ്‌കാരം ഉള്‍പ്പെടെ നിരവധി അംഗീകാരം ജോണസന്റെ പ്രവര്‍ത്തനത്തിന് ലഭിച്ചിട്ടുണ്ട്. 14 വര്‍ഷം കൊണ്ട് മാനന്തവാടി മക്കിയാട് പത്തേക്കറിലും മുള്ളന്‍കൊല്ലി ആലത്തൂരില്‍ അഞ്ചേക്കറിലുമാണ് മുള നട്ടത്. ഇന്ത്യയില്‍ സമൃദ്ധമായി മുള വളരുന്ന അസം, അരുണാചല്‍പ്രദേശ്, മിസോറം എന്നിവിടങ്ങളില്‍നിന്നായിരുന്നു ആദ്യഘട്ടത്തില്‍ തൈകള്‍. പീന്നീട് ഇറ്റലി, യൂറോപ്പ്, തായ്ലന്‍ഡ്, ചൈന, മ്യാന്‍മാര്‍, വിയറ്റ്നാം തുടങ്ങിയ രാജ്യങ്ങളിലേക്കും വികസിച്ചു. ഇവിടെയെല്ലാം കറങ്ങി മുളത്തോട്ടങ്ങള്‍ സന്ദര്‍ശിച്ചാണ് വിത്തുകള്‍ ശേഖരിച്ചത്. വ്യത്യസ്ത മുളകളുടെ വിപുലമായ കാര്‍ഷിക നഴ്സറിയും ജോണ്‍സനുണ്ട്. അയല്‍ സംസ്ഥാനത്തുള്ളവരാണ് ഏറെയും തൈകള്‍ വാങ്ങാനെത്തുന്നത്. എളുപ്പത്തില്‍ ലഭിക്കുന്ന ടിഷ്യുകള്‍ച്ചര്‍ മുളകള്‍ ജോണ്സണ് വളര്‍ത്താറില്ല. പെട്ടെന്ന് പുഷ്പിച്ച് നശിച്ചുപോകും. വിത്ത് കിളിര്‍പ്പിച്ച് വളര്‍ത്തുന്നവയാണ് ദീര്‍ഘകാലം വളരുന്നത്. 10,000 രൂപയിലധികം വിലയുള്ള തൈകളുണ്ട് ഇവിടെ.
ബിലാത്തിയും മുള്ളുമുളയും
വയനാട്ടില്‍ സുലഭമായി കാണുന്ന മുളകളാണ് ബിലാത്തിയും മുള്ളുമുളയും. മുള്ളുകളുള്ളതിനാല്‍ സംസ്‌കരിക്കല്‍ പ്രയാസമായതിനാല്‍ മുള്ളുമുള കൂടുതലായും പരമ്പരാഗത കാര്‍ഷിക ഉപകരണങ്ങള്‍ നിര്‍മിക്കാന്‍ ഉപയോഗിക്കുമ്പോള്‍ ബിലാത്തിമുളയാണ് മറ്റാവശ്യങ്ങള്‍ക്ക് ഉപയോഗിക്കുന്നത്. ഇതിന് നല്ല കാതലും ആയുസ്സുമുണ്ട്. ചെലവ് കുറഞ്ഞതും പരിചരണം കുറച്ചുമാത്രം ആവശ്യമുള്ളതും രാസവളങ്ങളുടെയും കീടനാശിനികളുടെയും ഉപയോഗം ആവശ്യമില്ലാത്തതുമായ കാര്‍ഷികവിള കൂടിയാണ് മുള. വ്യാവസായിക പ്രാധാന്യമുള്ള അസം മുള, ബിലാത്തി മുള, ഗഡുവ മുള മുതലായ ഇനങ്ങള്‍ പ്രത്യേക പരിചരണങ്ങള്‍ ഒന്നുമില്ലാതെ വളരും. അഞ്ചാമത്തെ വര്‍ഷം മുതല്‍ മുള മുറിച്ചുതുടങ്ങാം. 25 മുതല്‍ 30 വര്‍ഷം വരെയാണ് മുളങ്കൂട്ടത്തിന്റെ ശരാശരി ആയുസ്സ്. പ്ലാസ്റ്റിക്കിനുള്ള മികച്ച ബദലായാണ് മുളയെ വികസിത സമൂഹം കാണുന്നത്.
മധുരം കിനിയും മുളങ്കൂമ്പ്
ലോകജനസംഖ്യയുടെ 20 ശതമാനം മുളയെ ഭക്ഷണത്തിനായി ഉപയോഗിക്കുന്നവരാണ്. ജോണ്‍സന്റെ വീടിനോട് ചേര്‍ന്നുള്ള തോട്ടത്തിലെ പ്രധാന ആകര്‍ഷകം കരിമ്പുപോലെ കടിച്ചുതിന്നാവുന്ന മധുരം കിനിയുന്ന മുളങ്കൂമ്പാണ്. ഡെന്‍ഡ്രോകാലമസ് ലാറ്റിഫ്‌ലോറസ് എന്ന മുളയിനമാണിത്. സാധാരണ കട്ട് കളഞ്ഞ് പാകം ചെയ്താണ് മുള കൂമ്പുകള്‍ ഭക്ഷണത്തിന് ഉപയോഗിക്കുന്നതെങ്കിലും ഡെന്‍ഡ്രോകാലമസ് ലാറ്റിഫ്‌ലോറസ് നേരിട്ട് കടിച്ച് തിന്നാം. കൊതിപ്പിക്കുന്ന മധുരവുമുണ്ട്. ചൈനയിലും മ്യാന്‍മറിലും ഇന്ത്യയിലെ മണിപ്പൂരിന്റെ ചില ഭാഗങ്ങളിലുമാണ് ഈ ഇനം കാണപ്പെടുന്നത്. ചൈനയില്‍നിന്ന് വിത്തെത്തിച്ചാണ് ജോണ്സണ് മധുരമുള പിടിപ്പിച്ചെടുത്തത്.
മുട്ടുകളില്‍ മുഴുപ്പുള്ളത്, നീളമേറിയത്, ഇലകള്‍ക്ക് നിറം മാറിക്കൊണ്ടിരിക്കുന്നത്, പൂവിട്ടാലും നശിക്കാത്തത്, സ്വര്‍ണനിറമുള്ളത്, വെള്ളിയിലകളുള്ളത്, അകംനിറയെ കാതലുള്ളത്, വര്‍ഷങ്ങളോളം ആയുസുള്ളത്, ഉയരത്തില്‍ വളരുന്നത്, വിവിധ ഇനം ഈറ്റകള്‍ തുടങ്ങി മുളവൈവിധ്യങ്ങളാണ് ജോണ്‍സന്റെ ചുറ്റിലും. മലയാള മാധ്യമങ്ങളില്‍ ജോണ്‍സന്റെ തോട്ടം സംബന്ധിച്ച് കാര്യമായ വാര്‍ത്തകള്‍ വന്നിട്ടില്ലെങ്കിലും കന്നട, ഇംഗ്ലീഷ് കാര്‍ഷികമാസികകള്‍ മുഖലേഖനങ്ങള്‍ പ്രസിദ്ധീകരിച്ചിട്ടുണ്ട്.
ഗ്വാഡുവ ആംഗുസ്റ്റിഫോളിയ
കണ്ണടച്ച് തുറക്കും വേഗതയില്‍ വളരുന്ന ഗ്വാഡുവ ആംഗുസ്റ്റിഫോളിയ എന്ന ഇനവും ജോണ്‍സന്റെ തോട്ടത്തിലെ ആകര്‍ഷണമാണ്. വാണിജ്യാടിസ്ഥാനത്തില്‍ കൃഷി സാധ്യത ഏറെയുള്ള ഗ്വാഡുവ ആംഗുസ്റ്റിഫോളിയ, ഡെന്‍ഡ്രോകാലമസ് ബ്രാന്‍ഡിസി എന്നീ ഇനങ്ങള്‍ ഒരു ദിവസം രണ്ടടിയില്‍ കൂടുതല്‍ വളരും. അപൂര്‍വ മരുന്ന് ഉല്‍പ്പാദനത്തിലെ പ്രധാനചേരുവയായ മെലോക്കന്ന ബാസിഫെറ, ഗോള്‍ഡന്‍ ബാംബൂ, ബുദ്ധ ബെല്ലി തുടങ്ങിയവയും പുല്‍പ്പള്ളിയിലെ തോട്ടത്തില്‍ വളരുന്നുണ്ട്.
പഠനം പ്രകൃതിയില്‍നിന്ന്
1992-ലാണ് ജോണ്സണ് കലിക്കറ്റ് സര്‍വകലാശാലയില്‍നിന്ന് ശാസ്ത്രത്തില്‍ ബിരുദം നേടുന്നത്. പഠനത്തിലും കായികരംഗത്തും മിടുക്കനായ വിദ്യാര്‍ഥിയായിരുന്നിട്ടും പാര്‍ക്കിന്‍സണ്‍സ് രോഗബാധിതനായ പിതാവിനെ പരിചരിക്കുന്നതിനിടെ തുടര്‍പഠനത്തില്‍ ശ്രദ്ധിച്ചില്ല. മലഞ്ചരക്ക് വ്യാപാരി, നീന്തല്‍ പരിശീലകന്‍, ഫുട്ബോള്‍ പരിശീലകന്‍ തുടങ്ങി ജീവിതത്തില്‍ നിരവധി റോളുകള്‍ ജോണ്സണ് ഭംഗിയാക്കി. ഇതിനിടെയാണ് മുളയുടെ പരിചാരകനുമാവുന്നത്. വിദേശസര്‍വകലാശാലയില്‍നിന്നുപോലും സസ്യശാസ്ത്രവിദ്യാര്‍ഥികളും അധ്യാപകരും തന്റെ തോട്ടം സന്ദര്‍ശിക്കാനെത്തുന്നത് ജോണസന് ആനന്ദമാണ്. ഇന്ത്യയുടെ വടക്കുകിഴക്കന്‍ മേഖലയിലുള്ളവര്‍ മുളയ്ക്ക് വലിയ പ്രാധാന്യം നല്‍കുന്നുണ്ട്. മിക്കവാറും എല്ലാ വീടുകളിലും മുള നട്ടുവളര്‍ത്തുന്നുണ്ട്. വടക്കുകിഴക്കന്‍ സംസ്ഥാനങ്ങളായ മണിപ്പൂര്‍, സിക്കിം, അരുണാചല്‍, അസം, ത്രിപുര, ജാര്‍ഖണ്ഡ്, മഹാരാഷ്ട്ര എന്നിവയിലാണ് രാജ്യത്ത് പ്രധാനമായും മുളകൃഷി നടക്കുന്നത്.
അനുകൂലം വയനാട്
അനുകൂലമായ താപനിലയും മണ്ണും കാലാവസ്ഥയും ഉള്ളതിനാല്‍ വയനാട്ടില്‍ ഏതിനം മുളയും വളര്‍ത്താമെന്ന് ജോണ്സണ് അനുഭവത്തിലൂടെ തെളിയിച്ചിട്ടുണ്ട്. ഭാവി മുള ഫര്‍ണിച്ചറുകളുടേതാണ്. എല്ലാം നിര്‍മിക്കാന്‍ മുളകൊണ്ട് സാധിക്കും. അഞ്ച് വര്‍ഷം കൊണ്ട് വിളവെടുക്കാമെന്നതിനാല്‍ മികച്ച വരുമാനം ഇതുവഴി കര്‍ഷകര്‍ക്കുണ്ടാക്കാനാവും. പ്രകൃതിക്കിണങ്ങുന്ന കൃഷിയുമാകും. വീടിന് ചുറ്റുമുള്ള ചെറിയ ഇടത്തില്‍ കൃഷിചെയ്യുന്ന 100ഓളം ഇനങ്ങളാണ് ജോണസണ്‍ ഉദാഹരണമായി കാണിക്കുന്നത്. ഫ്‌ലോറിങ്, സ്‌കാര്‍ഫോള്‍ഡിങ്, ഫര്‍ണിച്ചര്‍ നിര്‍മാണം, ഭക്ഷണം, ജൈവ ഇന്ധനം, തുണിത്തരങ്ങള്‍, പേപ്പര്‍ നിര്‍മാണം തുടങ്ങിയ മേഖലകളിലും മുള പ്രധാനമായും ഉപയോഗിക്കുന്നുണ്ട്.
വയനാടന്‍ പച്ചപ്പ്
വയനാടന്‍ കാടിന്റെ ഹരിതഭംഗി ഇടതൂര്‍ന്ന മുളങ്കാടുകളായുയരുന്നു. മാവൂര്‍ ഗോളിയോര്‍ റയോണ്‍സ് കമ്പനിയിലെ പ്രധാന അസംസ്‌കൃതവസ്തു മുളയായിരുന്നു. ലോഡുക്കണക്കിന് മുളയാണ് അക്കാലത്ത് വയനാടന്‍ ചുരമിറങ്ങി മാവൂരിലെ കമ്പനിയിലെത്തിയത്. കാട്ടില്‍ വനവല്‍ക്കരണത്തിന്റെ ഭാഗമായി നട്ടുപിടിപ്പിച്ച സെന്നയെന്ന അധിനിവേശ സസ്യമായ മഞ്ഞക്കൊന്ന വ്യാപിച്ചതോടെ വയനാടന്‍ കാടിന്റെ സ്വാഭാവികതയ്ക്ക് നാശമുണ്ടായി. മുളങ്കാടുകള്‍ അപ്രത്യക്ഷമാകാന്‍ തുടങ്ങി. മുളങ്കാടുകള്‍ നശിക്കാന്‍ തുടങ്ങിയതോടെ ആന ഉള്‍പ്പെടെയുള്ള വന്യമൃഗങ്ങളുടെയും ഗോത്രജനതയുടേയും ഭക്ഷണശീലത്തെ ബാധിച്ചു. മുളങ്കാട് കുറഞ്ഞത് കേരള– കര്‍ണാടക അതിര്‍ത്തിയിലെ ഡെക്കാന്‍ പീഠഭൂമിയുടെ വടക്കുകിഴക്കന്‍ അറ്റത്തുള്ള പുല്‍പ്പള്ളി, മുള്ളന്‍കൊല്ലി, പൂതാടി തുടങ്ങിയ ഗ്രാമങ്ങളില്‍ മഴക്കുറവ് അനുഭവപ്പെടാന്‍ ഇടയാക്കി. ഇതോടെ സ്വാഭാവിക മണ്ണിന്റെ മേന്മകൊണ്ട് പുല്‍പ്പള്ളിഭാഗത്ത് വിളഞ്ഞിരുന്ന കുരുമുളക് കൃഷിയില്‍ കുറവുണ്ടായി. മരുഭൂവല്‍ക്കരണ പ്രവണത പരിഹരിക്കാന്‍ മുളകൃഷിക്കാവുമെന്ന അറിവുകൂടിയാണ് ജോണ്‍സനെ മുളയുടെ സംരക്ഷകനാക്കിയത്. സമുദ്ര നിരപ്പില്‍നിന്നും 600 മുതല്‍ 1200 അടി ഉയരമുള്ള പ്രദേശങ്ങളിലാണ് മുള നന്നായി വളരുന്നത്. അതുകൊണ്ട് തന്നെ വയനാട് മുളകൃഷി ചെയ്യാന്‍ അനുയോജ്യമാണ്.
ഓക്‌സിജന്‍ പാര്‍ക്ക്
വളരെ വേഗത്തില്‍ വളരുന്ന സസ്യയിനമായതിനാല്‍ത്തന്നെ പെട്ടെന്നുണ്ടാക്കാന്‍ കഴിയുന്ന വനമാണ് മുളങ്കാടുകള്‍. വന്‍തോതില്‍ കാര്‍ബണ്‍ ആഗിരണം ചെയ്യാനുള്ള ചെലവ് കുറഞ്ഞ രീതി കൂടിയാണിത്. ഭാവി തലമുറയ്ക്കായി പ്രകൃതിയില്‍ സജ്ജീകരിക്കുന്ന ഒരു ഓക്‌സിജന്‍ പാര്‍ക്കാണ് മുളങ്കാടുകള്‍. മറ്റേതൊരു സസ്യത്തേക്കാളും 35 ശതമാനം കൂടുതല്‍ ഓക്‌സിജന്‍ മുള ഉല്‍പ്പാദിപ്പിക്കുന്നു. മണ്ണിലെ ഈര്‍പ്പവും ജൈവികതയും വര്‍ധിപ്പിക്കാന്‍ മുളയ്ക്ക് കഴിയും.
അരുണാചല്‍പ്രദേശില്‍നിന്നുള്ള മുള ഗവേഷകസംഘത്തിനൊപ്പം
അരുണാചല്‍പ്രദേശില്‍നിന്നുള്ള മുള ഗവേഷകസംഘത്തിനൊപ്പം
ആഗോള സസ്യം
അന്റാര്‍ട്ടിക്ക ഒഴികെയുള്ള എല്ലാ ഭൂഖണ്ഡങ്ങളിലും മുള വളരുന്നുണ്ട്. മുളയെക്കുറിച്ചുള്ള അവബോധം വളര്‍ത്താനും പ്രകൃതിവിഭവങ്ങള്‍ സംരക്ഷിക്കാനും സുസ്ഥിര ഉപയോഗം ഉറപ്പാക്കാനും വേള്‍ഡ് ബാംബൂ ഓര്‍ഗനൈസേഷന്‍ രംഗത്തുണ്ട്. ഹിരോഷിമയിലെ അണുബോംബ് വികിരണത്തെ അതിജീവിച്ച ഒരേയൊരു ചെടിയാണ് മുള. ചൈനീസ് സംസ്‌കാരത്തില്‍ ഈട്, കരുത്ത്, വഴക്കം എന്നിവയുടെ പ്രതീകമാണ് മുള. പുല്ല് വര്‍ഗത്തില്‍പ്പെടുന്ന ഏറ്റവും വലിയ ചെടിയാണിത്. ഭൂമിയുടെ ഉഷ്ണമേഖലാ പ്രദേശങ്ങളില്‍ വളരുന്ന സ്വാഭാവിക സസ്യജാലങ്ങളാണ്. നമ്മുടെ പാരിസ്ഥിതിക ഘടന നിലനിര്‍ത്തുന്നതില്‍ ചെറുതല്ലാത്ത പങ്ക് മുളകള്‍ക്കുണ്ട്. നാരുകളും പൊട്ടാസ്യവുമുള്ള മുള പതിറ്റാണ്ടുകളായി ഏഷ്യന്‍ രാജ്യങ്ങളിലെ ദൈനംദിന ഭക്ഷണത്തിന്റെ ഭാഗമാണ്. മുളയ്ക്ക് സ്റ്റീലിനേക്കാള്‍ ശക്തമായ ഘടനയുള്ളത് കൊണ്ട് ഇത് വ്യവസായത്തില്‍ വ്യാപകമായി ഉപയോഗിക്കുന്നു. ലോകമെമ്പാടുമുള്ള ബില്യണിലധികം ആളുകള്‍ മുള കൊണ്ട് നിര്‍മിച്ച വീടുകളില്‍ താമസിക്കുന്നുണ്ട്.
പ്രകൃതിസൗഹൃദം വീടും
ജോണ്സണ് തറവാട് വീടിനോട് ചേര്‍ന്ന് പുതിയതായി ഒരു വീട് നിര്‍മാണത്തിലാണ്. പ്രകൃതി സൗഹൃദമായ ഈ വീടിന്റെ ഫര്‍ണിച്ചറുകളും മരഉപകരണങ്ങളും മുളകൊണ്ടാണ് പണിയുന്നത്. വിയറ്റ്നാമിലെയും ചൈനയിലെയും മുളസംസ്‌കരണ സാങ്കേതികവിദ്യ ഉപയോഗപ്പെടുത്തിയാണ് ഇത്തരം ഉപകരണങ്ങളും തറയോടും നിര്‍മിക്കുന്നത്. ചുടുകട്ടകൊണ്ടുണ്ടാക്കുന്ന ചുമരും കോണ്‍ക്രീറ്റ് ഒഴികെ മുഴുവന്‍ ഭാഗങ്ങളും മുളകൊണ്ട് പണിയുന്നതിന് രൂപരേഖ തയ്യാറാക്കിയിട്ടുണ്ട്. എളുപ്പത്തില്‍ നശിച്ച് പോകുന്നതാണ് മുള ഉപകരണങ്ങള്‍ എന്ന ധാരണയെ തിരുത്തുന്നതാണ് വീടിന്റെ നിര്‍മാണം. കൃത്യമായി സംസ്‌കരിച്ചെടുത്താല്‍ മറ്റ് കാതലുള്ള മരങ്ങളെപ്പോലെ ദീര്‍ഘകാലം കേടാവാതെയിരിക്കും. ഇത് പ്രചരിപ്പിക്കുകകൂടിയാണ് ഇത്തരമൊരു വീടൊരുക്കുന്നതിന്റെ ലക്ഷ്യമെന്ന് ജോണ്സണ് പറഞ്ഞു.
കടല്‍ കടന്നെത്തുന്നു മുളവിത്തുകള്‍
മുള നട്ട് സംരക്ഷിക്കുന്നവരുടെ നിരവധി കൂട്ടായ്മകള്‍ ഇന്ത്യയിലും വിദേശത്തും സജീവമാണ്. ഉള്‍ക്കാട്ടിലെവിടെയെങ്കിലും അത്ര പരിചിതമല്ലാത്ത ഒരിനം മുള കണ്ടെത്തിയാല്‍ ഉടനടി ജോണ്‍സന്റെ ഫോണിലും വിവരമെത്തും. ചൈന, വിയറ്റ്നാം പോലുള്ള രാജ്യങ്ങളിലുള്ളവര്‍ വലിയ പ്രധാന്യത്തിലാണ് മുളകളെ കാണുന്നത്. അനുകൂലമായ സാഹചര്യമുണ്ടായിട്ടും കേരളത്തില്‍ മുളയുടെ സാധ്യത പ്രയോജനപ്പെടുത്തുന്നില്ല. ആഴ്ചയിലൊരിക്കലെങ്കിലും വിദേശത്തുനിന്നുള്ള സംഘം ഈ തോട്ടം സന്ദര്‍ശിക്കാറുണ്ട്. അവര്‍ വരുന്നത് വെറും കൈയോടെയല്ല, അപൂര്‍വമായ മുളയുടെ വിത്തുകളുമുണ്ടാകും. ഇത് പാകിമുളപ്പിച്ച് തൈകളാക്കാന്‍ പ്രത്യേക നഴ്സറിയും പരിചാരകനും ജോണ്‍സണുണ്ട്. ഇവിടെനിന്ന് വിദേശത്തേക്കും മുളംതൈകള്‍ കയറ്റി അയക്കുന്നുണ്ട്.
പീച്ചി കെഎഫ്ആര്‍ഐയിലെ പ്രിന്‍സിപ്പല്‍ സയന്റിസ്റ്റ് ഡോ. ശ്രീകുമാര്‍, മുതിര്‍ന്ന മുള ഗവേഷകനും ഇന്‍ബാര്‍ അംഗവുമായ ഡോ. മുരളീധരന്‍, കര്‍ണാടക പൊന്നമ്പേട്ട് ഫോറസ്ട്രി കോളേജിലെ റിട്ട. സയന്റിസ്റ്റ് ഡോ. രാമകൃഷ്ണ ഹെഗ്ഡെ, ഹൈദരാബാദിലെ മുള ഗവേഷകന്‍ ഡോ. ലക്ഷ്മണറാവു, കര്‍ണാടക വനംവകുപ്പിലെ റിട്ട. പ്രിന്‍സിപ്പല്‍ ചീഫ് കണ്‍സര്‍വേറ്റര്‍ സിദ്ധാര്‍ത്ഥ് പുനത്തി എന്നിവര്‍ മുളങ്കാട് പ്രവര്‍ത്തനത്തിന് പിന്തുണയുമായി ജോണ്‍സണൊപ്പമുണ്ട്.
