അടിമാലി: ഓൺലൈൻ തട്ടിപ്പുകൾ തുടർക്കഥയായിട്ടും നടപടിയെടുക്കാൻ കഴിയാതെ അധികൃതർ. 3999 രൂപയുടെ മൂന്നു ചുരിദാറുകൾക്ക് 449 രൂപ എന്ന രീതിയിൽ സ്ത്രീകളുടെ മനം കവരുന്ന പരസ്യങ്ങൾ സോഷ്യൽ മീഡിയ കീഴടക്കിയിരിക്കുകയാണ്. ഫേസ്ബുക്ക്, ഇൻസ്റ്റഗ്രാം അടക്കമുള്ള പരസ്യങ്ങൾ കണ്ട് കഴിഞ്ഞ ദിവസം അടിമാലിയിൽ നിന്നും ചുരിദാറുകൾ വാങ്ങി. 449 രൂപക്കൊപ്പം ഷിപ്പിംങ് ചാർജ് ഉൾപ്പടെ 550 മുടക്കിയാണ് കൊറിയർ കവർ വീട്ടമ്മ വാങ്ങിയത്. പിന്നീട് തുറന്നു നോക്കിയപ്പോൾ പഴകിയ മൂന്നു ചുരിദാർ ടോപ്പുകൾ മാത്രമാണ് ലഭിച്ചത്. വെള്ളത്തിൽ കുതിർന്ന തുണിയും ഇതിലുൾപ്പെട്ടിരുന്നു. സോഷ്യൽ മീഡിയ വഴി കണ്ട് ഓർഡർ നൽകുന്ന ഇത്തരം വ്യാപാരങ്ങളിൽ പരാതി നൽകിയിട്ടും നടപടിയുണ്ടാകില്ലെന്ന് അധികൃതർ പറയുന്നു. കഴിഞ്ഞ ദിവസം ലിനൻ ഷർട്ടുകൾക്ക് ഓൺലെെൻ ഓർഡർ നൽകി പണം നഷ്ടമായ സർക്കാർ ജീവനക്കാരൻ തൻ്റെ അനുഭവം സോഷ്യൽ മീഡിയ വഴി പങ്കുവച്ചിരുന്നു. സഹകരണ വകുപ്പ് ഉദ്യോഗസ്ഥനാണ് ഗുണനിലവാരം തീരെയില്ലാത്ത ഷർട്ടുകൾ ലഭിച്ചത്.
സമീപത്തെ വ്യാപാര സ്ഥാപനങ്ങളെ അവഗണിച്ച് സാമ്പത്തിക ലാഭം നോക്കി ഓൺലൈൻ വ്യാപാരത്തെ ആശ്രയിക്കുന്നവയിൽ നിരവധി തട്ടിപ്പ് സംഭവങ്ങളാണ് അടുത്തിടെ റിപ്പോർട്ട് ചെയ്യുന്നത്. എന്നാൽ ഉത്തരവാദിത്വമുള്ള ഒരു വിഭാഗം ഓൺലെെൻ വ്യാപാരങ്ങളും നടക്കുന്നുണ്ട്.
അനാഥാലയങ്ങളുടെ പേരിലും
പ്രളയം- ഭൂകമ്പം തുടങ്ങിയ കെടുതികളുടെ പേരിലും വീടുവീടാന്തരം കയറിയിറങ്ങി വാങ്ങുന്ന പഴയ വസ്ത്രങ്ങളാണ് ഓൺലെെൻ വ്യാപാര തട്ടിപ്പുകളിൽ വിൽക്കുന്നവയിൽ ഏറെയും. ഓൺലൈൻ തട്ടിപ്പുകൾ നിയന്ത്രിക്കുവാൻ നടപടി സ്വീകരിക്കണമെന്ന ആവശ്യം ശക്തമായിട്ടുണ്ട്.
