അടിമാലി: പ്ലസ് ടു വിദ്യാർഥിയായ യുവാവ്അണക്കെട്ട് ജലാശയത്തിൽ ചാടി മരിച്ചു. കല്ലാർകുട്ടി ഡാമിലേക്ക് ചാടിയ മുതിരപ്പുഴ അഞ്ചാംമൈൽ ചക്കുങ്കൽ അതുൽ ജിജി (19) ആണ് മരിച്ചത്. കല്ലാർകുട്ടി അണക്കെട്ടിന്റെ ഭാഗമായ മുണ്ടക്കൽ കടവ് ഭാഗത്താണ് യുവാവ് ചാടിയത്. ഇന്നലെ ഉച്ച കഴിഞ്ഞായിരുന്നു സംഭവം. ഓടിയെത്തിയ യുവാവ് ഡാമിലേക്ക് എടുത്ത് ചാടുകയായിരുന്നു എന്നാണ് ദൃക്സാക്ഷികൾ പറയുന്നത്. ഡാമിന് അരികിൽ ചൂണ്ട ഇട്ടുകൊണ്ടിരുന്നവരാണ് സംഭവം ആദ്യം കാണുന്നത്. വലിയ ആഴമുള്ള സ്ഥലം ആയതിനാൽ ആരും ഇറങ്ങാൻ തയ്യാറായില്ല. സംഭവം അടിമാലി അഗ്നി രക്ഷാ സേനയെ അറിയിച്ചു. അവർ എത്തിയാണ് മൃതദേഹം പുറത്തെടുത്തത്.
രണ്ടു വിഷയം നേരത്തെ എഴുതുവാൻ സാധിക്കാതിരുന്നതിനാൽ ഈ വിഷയങ്ങൾ എഴുതിയെടുക്കുന്നതിനായി അടിമാലിയിലെ ഒരു സ്വകാര്യ കോളേജിൽ പഠിക്കുകയായിരുന്നു. ഇടക്കിടെ മാത്രമാണ് അതുൽ ക്ലാസിൽ എത്തിയിരുന്നത്.
യുവാവ് ഡാമിൽ ചാടുവാനുള്ള കാരണം വ്യക്തമല്ല. മൃതദേഹം അടിമാലി താലൂക്ക് ആശുപത്രി മോർച്ചറിയിലേക്കു മാറ്റി. ശാലിനിയാണ് മാതാവ്, അഭിനവ് ഏക സഹോദരനാണ്.
