രാജകുമാരി: ഏലക്കായ് സ്റ്റോറില്‍ ഉണക്കി സൂക്ഷിച്ചിരുന്ന ലക്ഷങ്ങളുടെ ഏലക്കാ മോഷ്ടിച്ച് കടത്തി രണ്ട് വര്‍ഷം പിന്നിടുമ്പോളും
പോലീസ് പ്രതികളെ പിടികൂടുന്നില്ലെന്ന് പരാതി. പ്രതികളെ കുറിച്ച് വ്യക്തമായ വിവരവും തെളിവുകളും ലഭിച്ചിട്ടും പോലീസ് നടപടി സ്വീകരിക്കുന്നില്ലെന്നാണ് പരാതി.ഉന്നത ഉദ്യോഗസ്ഥന്റെ നേതൃത്വത്തില്‍ അന്വേഷണം നടത്തണമെന്ന കോടതി ഉത്തരവും നടപ്പിലാക്കുന്നില്ലെന്ന് രാജാക്കാട് ചെരിപുറം മുത്തനാട്ട് ബിനോയി ആരോപിക്കുന്നു.
2023 സെപ്തംബറിലാണ് മുത്തനാട്ട് ബിനോയിയുടെ ചെരുപുറത്തുള്ള ഏലക്കാ സ്റ്റോറില്‍ നിന്നും ഉണക്കി സൂക്ഷിച്ചിരുന്ന പതിനാറ് ലക്ഷം രൂപയുടെ ഏലക്കായ് മോഷണം പോകുന്നത്. ബിനോയി സ്ഥലത്തില്ലാതിരുന്ന സമയത്തായിരുന്നു വാതില്‍ കുത്തിതുറന്ന് മോഷണം നടത്തിയത്.തുടര്‍ന്ന് രാജാക്കാട്
പോലീസില്‍ പരാതി നല്‍കുകയും പ്രതിയാരാണെന്ന് പോലീസ് കണ്ടെത്തുകയും ചെയ്തുവെന്നാണ് ബിനോയി പറയുന്നത്.എന്നാല്‍ അറസ്റ്റ് ചെയ്യുന്നതിന് നാളിതുവരെ നടപടി സ്വീകരിച്ചില്ല. കേസിലെ
പ്രതി തന്‍റെ മുൻ സുഹൃത്താണെന്നും ബിനോയി പറയുന്നു. പോലീസ് നടപടി സ്വീകരിക്കാതെ വന്നതോടെ ബിനോയി ഹൈക്കോടതിയെ സമീപിച്ചു.തുടര്‍ന്ന് ഉന്നത ഉദ്യോഗസ്ഥന്‍ കേസ് അന്വേഷണം നടത്തി നടപടി സ്വീകരിക്കണമെന്ന് കോടതി ഉത്തരവിടുകയും ചെയ്തു. എന്നിട്ടും പോലീസ്
നടപടി സ്വീകരിക്കുന്നില്ലെന്നാണ് ബിനോയിയുടെ പരാതി.
ലക്ഷക്കണക്കിന് രൂപ നഷ്ടമായതിനൊപ്പം എല്ലാവിധ തെളിവുകളും ഉണ്ടായിട്ടും
പോലീസ് നടപടി സ്വീകരിക്കാത്തതിനാലാണ് കോടതിയെ സമീപിച്ചത്. എന്നാല്‍ കോടതി ഉത്തരവ് പോലും നടപ്പിലാക്കാന്‍
പോലീസ് തയ്യാറാകാതെ പ്രതികളെ സംരക്ഷിക്കുന്ന നിലപാടാണ് സ്വീകരിക്കുന്നതത്രേ.എന്നാല്‍ നീതി ലഭിക്കുന്നത് വരെ നിയമ പോരാട്ടം തുടരുവാനാണ് ബിനോയിയുടെ തീരുമാനം.
