തട്ടിയെടുത്തത് 90000 രൂപയും ഒരു ലക്ഷം രൂപയുടെ മൊബൈല്‍ ഫോണും
രണ്ട് പേരെ നേരത്തെ സസ്പെന്‍ഡ് ചെയ്തിരുന്നു
തൊടുപുഴ: ഇടുക്കി മറയൂരില്‍ വിനോദയാത്രക്ക് എത്തിയ യുവാക്കളില്‍ നിന്നും എക്സൈസ് ഉദ്യോഗസ്ഥര്‍ പണവും മൊബൈല്‍ ഫോണും തട്ടിയെടുത്ത സംഭവവുമായി ബന്ധപ്പെട്ട് നാല് എക്സൈസ് ഉദ്യോഗസ്ഥരെ കൂടി സസ്പെന്‍ഡ് ചെയ്തു. മറയൂര്‍ എക്സൈസ് റേഞ്ച് ഓഫീസിലെ സിവില്‍ എക്സൈസ് ഓഫീസര്‍മാരായ കെ. വിപിന്‍കൃഷ്ണന്‍, പി.ആര്‍ ശരത്ത് കുമാര്‍, വനിതാ സിവില്‍ എക്സൈസ് ഓഫീസര്‍ ദിവ്യാ ഉണ്ണി, എക്സൈസ് ഡ്രൈവര്‍ എ. ഷാനു എന്നിവരെയാണ് സസ്പെന്‍ഡ് ചെയ്തത്. എക്സൈസ് ഇന്റലിജന്റ്സ് ജോയിന്റ് കമ്മിഷണര്‍, എക്സൈസ് വിജിലന്‍സ് ഓഫീസര്‍ എന്നിവരുടെ റിപ്പോര്‍ട്ടിന്റെ അടിസ്ഥാനത്തില്‍ അഡീഷണല്‍ എക്സൈസ് കമ്മീഷണറാണ് സസ്പെന്‍ഷന്‍ ഉത്തരവ് പുറപ്പെടുവിച്ചത്. ഇതേ കേസില്‍ അസിസ്റ്റന്റ് എക്സൈസ് ഇന്‍സ്‌പെക്ടര്‍ കിഷോര്‍ കുമാര്‍, സിവില്‍ എക്സൈസ് ഓഫിസര്‍ അരുണ്‍ എന്നിവരെരണ്ട് മാസം മുമ്പ് സസ്പെന്‍ഡ് ചെയ്തിരുന്നു. കഴിഞ്ഞ ഓഗസ്റ്റ് നാലിനായിരുന്നു സംഭവം. കൊല്ലം പരവൂര്‍ ഭാഗത്തു നിന്നും വിനോദയാത്രക്ക് എത്തിയ നാല് യുവാക്കളുടെ സംഘമാണ് എക്സൈസിന്റെ ക്രൂരതയ്ക്കും കൊള്ളയ്ക്കും ഇരയായത്. മറയൂരില്‍ നിന്നും കാന്തല്ലൂരിലേക്ക് പോകവേ യുവാക്കള്‍ സഞ്ചരിച്ചിരുന്ന കാര്‍ മറയൂര്‍ എക്സൈസ് റേഞ്ച് ഉദ്യോഗസ്ഥര്‍ തടഞ്ഞു നിര്‍ത്തി പരിശോധിച്ചു. യുവാക്കള്‍ മദ്യപിച്ചിട്ടുണ്ടെന്നും കാറില്‍ കഞ്ചാവിന്റെ ഗന്ധം ഉണ്ടെന്നും ആരോപിച്ച് നാല് പേരെയും മറയൂര്‍ എക്സൈസ് ഓഫീസിലേക്ക് കൂട്ടി കൊണ്ടു പോയി.
തുടര്‍ന്ന് കേസ് ചാര്‍ജ്ജ് ചെയ്ത് റിമാന്‍ഡ് ചെയ്യാന്‍ തീരുമാനിച്ചതായും ഇതൊഴിവാക്കണമെങ്കില്‍ ഒരു ലക്ഷം രൂപാ കൈക്കൂലി വേണമെന്നും എക്സൈസ് സംഘം ആവശ്യപ്പെട്ടു. ഗത്യന്തരമില്ലാതെ യുവാക്കള്‍ പണം നല്‍കാന്‍ സമ്മതിച്ചു. എന്നാല്‍ തങ്ങളുടെ പക്കല്‍ പണം നോട്ടായിട്ട് ഇല്ലെന്നും അക്കൗണ്ടിലാണ് ഉള്ളതെന്നും യുവാക്കള്‍ പറഞ്ഞു. ഇതോടെ യുവാക്കളില്‍ രണ്ട് പേരെയും കൊണ്ട് എക്സൈസ് ഉദ്യോഗസ്ഥര്‍ ഔദ്യോഗിക വാഹനത്തില്‍ മറയൂര്‍ ടൗണിലെത്തി എ.ടി.എമ്മില്‍ നിന്നും മണി ട്രാന്‍സ്ഫര്‍ സെന്ററില്‍ നിന്നുമായി 90000 രൂപ കൈക്കലാക്കി. ഇതിന് ശേഷം എക്സൈസ് ഓഫീസില്‍ മടങ്ങിയെത്തി. എക്സൈസ് ഓഫീസില്‍ ഉദ്യോഗസ്ഥര്‍ നടത്തിയ വിലപേശലും ഭീഷണിയും ഉള്‍പ്പെടെയുള്ളവ യുവാക്കളില്‍ ഒരാള്‍ മൊബൈല്‍ ഫോണില്‍ ചിത്രീകരിക്കുന്നുണ്ടായിരുന്നു. ഇത് ശ്രദ്ധയില്‍പ്പെട്ട എക്സൈസ് ഉദ്യോഗസ്ഥര്‍ ഈ യുവാവിനെ ക്രൂരമായി മര്‍ദ്ദിച്ചു. ഇതില്‍ ഭയന്ന യുവാവ് എക്സൈസ് ഓഫീസില്‍ നിന്നിറങ്ങി പുറത്തേക്ക് ഓടി. ഇയാള്‍ ഓട്ടോയില്‍ കയറി വീട്ടിലെത്തി ബന്ധുക്കളോടും മറ്റും വിവരം പറഞ്ഞു. ഇവര്‍ പരാതി അറിയിച്ചതിന്റെ തുടര്‍ച്ചയായി ഡിവൈ. എസ്.പി ഷാജു ജോസിന്റെ നേതൃത്വത്തില്‍ പോലീസ് വിജിലന്‍സ് സംഘം മറയൂര്‍ റേഞ്ച് ഓഫീസില്‍ പരിശോധന നടത്തി പണം കൈമാറ്റം ചെയ്തതിന്റെയും ഫോണ്‍ പിടിച്ച് വാങ്ങിയതിന്റെ മര്‍ദ്ദനത്തിന്റെയും ഉള്‍പ്പെടെ തെളിവുകള്‍ കണ്ടെത്തിയിരുന്നു. സംഭവത്തില്‍ ആദ്യം സസ്പെന്‍ഡ് ചെയ്യപ്പെട്ടവര്‍ക്കൊപ്പം ഇപ്പോള്‍ സസ്പെന്‍ഡ് ചെയ്ത മൂന്ന് പേരുടേയും പങ്കും തുടരന്വേഷണത്തില്‍ വ്യക്തമാകുകയായിരുന്നു. ഇത്തരം നിയമവിരുദ്ധ പ്രവര്‍ത്തനങ്ങള്‍ ഓഫീസില്‍ നടക്കുമ്പോള്‍ താല്‍ക്കാലികമായി ഓഫീസിന്റെ പാറാവ് ഡ്യൂട്ടി വഹിച്ചിരുന്ന വനിതാ സിവില്‍ ഓഫീസര്‍ ദിവ്യ ഉണ്ണി ഇക്കാര്യം മേല്‍ ഉദ്യോഗസ്ഥരെ അറിയിച്ചിരുന്നില്ല. അതീവ ഗുരുതരമായ ക്രിമിനല്‍ പ്രവര്‍ത്തി സഹപ്രവര്‍ത്തകരില്‍ നിന്നുണ്ടായിട്ടും ഇക്കാര്യം മറച്ച് വച്ചതിനാണ് ഇവരെ സസ്പെന്‍ഡ് ചെയ്യാന്‍ കാരണമെന്ന് ഉത്തരവില്‍ പറയുന്നു. സേനയ്ക്കാകെ അപമാനമുണ്ടാക്കിയ സംഭവമായതിനാല്‍ സസ്പെന്‍ഡ് ചെയ്തവര്‍ക്കെതിരെ പിരിച്ച് വിടല്‍ അടക്കമുള്ള കടുത്ത നടപടി സ്വീകരിച്ചേക്കുമെന്നാണ് ഉന്നത എക്സൈസ് ഉദ്യോഗസ്ഥരില്‍ നിന്നും ലഭിക്കുന്ന സൂചന.
