മൂന്നാര്‍: ഇടവേളകള്‍ ഇല്ലാതെ മൂന്നാര്‍ നിവാസികളെ ഭീതിയിലാഴ്ത്തി കടുവകള്‍ വിലസുകയാണ്. കഴിഞ്ഞദിവസം മൂന്ന് കടുവകള്‍ തേയിലത്തോട്ടത്തില്‍ നടുവിലൂടെ നടന്നു പോകുന്ന ദൃശ്യങ്ങള്‍ അടക്കം പുറത്തുവന്നിരുന്നു. ഇതോടെ പ്രദേശവാസികള്‍ ഭീതിയോടെയാണ് തൊഴിലിനിറങ്ങുന്നത്.
ഇതിന് പിന്നാലെയാണ് ബുധനാഴ്ച വീണ്ടും കടുവയുടെ ആക്രമണം ഉണ്ടായത്. ദേവികുളം ഒ.ഡി.കെ ഡിവിഷനില്‍ വീട്ടുമുറ്റത്ത് കെട്ടിയിരുന്ന പശുവിനെ കടുവ ആക്രമിച്ചു. ബുധനാഴ്ച പുലര്‍ച്ചയോടെ ആയിരുന്നു ഒ.ഡി.കെ ഡിവിഷന്‍ സ്വദേശി പരമശിവന്റെ പശുവിനെയാണ് കടുവ ആക്രമിച്ചത്.
മേഖലയില്‍ കടുവയുടെ സാന്നിധ്യം സ്ഥിരം ആയതോടെ ഇനി എന്ത് ചെയ്യുമെന്ന് അറിയാതെ ബുദ്ധിമുട്ടുകയാണ് മൂന്നാറിലെ തോട്ടം തൊഴിലാളികള്‍.
