കുട്ടികളെത്തിയത് 65 കിലോമീറ്റര്‍ യാത്ര ചെയ്ത്; സംഭവത്തില്‍ അന്വേഷിച്ച് നടപടിയെടുക്കുമെന്ന് കലക്ടര്‍
തൊടുപുഴ: മെഡിക്കല്‍ ബോര്‍ഡിലെ അംഗങ്ങള്‍ എത്താത്തതിനെ തുടര്‍ന്ന് പരിശോധനയ്ക്കെത്തിയ ഭിന്നശേഷിക്കാരായ കുട്ടികള്‍ നിരാശരായി മടങ്ങി. തൊടുപുഴയിലെ ജില്ലാ ആശുപത്രിയില്‍ ബുധനാഴ്ചയാണ് സംഭവം. 65 കിലോമീറ്റര്‍ യാത്ര ചെയ്തെത്തിയ കുട്ടികള്‍ മണിക്കൂറുകള്‍ കാത്തിരുന്ന ശേഷം ഒടുവില്‍ നിരാശരായി മടങ്ങുകയാണ് ചെയ്തത്. പീഡിയാട്രിഷ്യന്‍, ക്ലിനിക്കല്‍ റിഹാബിലിറ്റേഷന്‍ സൈക്കോളജിസ്റ്റ് എന്നിവരാണ് എത്താതിരുന്നത്. അടിമാലി കാര്‍മല്‍ ജ്യോതി സ്പെഷല്‍ സ്‌കൂളിലെ പത്തു കുട്ടികള്‍ക്കാണ് ദുരിതാനുഭവം ഉണ്ടായത്. ഭിന്നശേഷിക്കാരില്‍ ബുദ്ധിപരമായി വെല്ലുവിളികള്‍ നേരിടുന്നവരായിരുന്നു കുട്ടികള്‍. രാവിലെ 10ന് തന്നെ സ്‌കൂള്‍ അധികൃതര്‍ കുട്ടികളുമായി ആശുപത്രിയില്‍ എത്തി. ബോര്‍ഡ് അംഗങ്ങള്‍ ഇല്ലെന്ന വിവരം ആശുപത്രിയില്‍ എത്തിയപ്പോള്‍ മാത്രമാണ് അറിയുന്നത്. മാസത്തില്‍ ആദ്യ ബുധനാഴ്ചയാണ് സ്ഥിരമായി മെഡിക്കല്‍ ബോര്‍ഡ് കൂടാറുള്ളത്. എന്നാല്‍ ഈ മാസം ആദ്യത്തെ ബുധനാഴ്ച പൊതു അവധി ആയതിനാല്‍ ബോര്‍ഡ് യോഗം എട്ടാം തീയതിയിലേയ്ക്ക് മാറ്റിയിരുന്നു. ഇതനുസരിച്ചാണ് എട്ടിന് സ്‌കൂള്‍ അധികൃതര്‍ 10 വിദ്യാര്‍ഥികളെ അടിമാലിയില്‍ നിന്നും തൊടുപുഴയില്‍ എത്തിച്ചത്. പരിശോധന നടക്കില്ലെന്ന് അറിഞ്ഞതോടെ സ്‌കൂള്‍ അധികൃതര്‍ ജില്ലാ കലക്ടറെ പരാതി അറിയിച്ചു. സംഭവത്തില്‍ ഡി.എം.ഒയുമായി അന്വേഷിച്ച് നടപടി സ്വീകരിക്കുമെന്ന് കലക്ടര്‍ അറിയിച്ചു. ഇതിനിടെ മെഡിക്കല്‍ ബോര്‍ഡിന്റെ തീയതി മാറിയതിനാല്‍ ക്ലിനിക്കല്‍ സൈക്കോളജിസ്റ്റിന് പങ്കെടുക്കാനുള്ള അനുമതി ജില്ലാ വനിതാ ശിശുക്ഷേമ വകുപ്പ് ഓഫീസര്‍ ലഭ്യമാക്കിയില്ലെന്ന വിവരവും പുറത്ത് വന്നു. ഡോക്ടര്‍മാര്‍ കുട്ടികളുടെ ഐക്യു ഉള്‍പ്പെടെ പരിശോധിച്ചാല്‍ മാത്രമേ ഏകീകൃത തിരിച്ചറിയല്‍ കാര്‍ഡ് (യുണീക് ഡിസെബിലിറ്റി ഐഡി കാര്‍ഡ്) ലഭിക്കൂ. ഇത് ഉണ്ടെങ്കില്‍ മാത്രമേ കുട്ടികളുടെ പേര് സൈറ്റില്‍ ചേര്‍ക്കല്‍, പഠനം പെന്‍ഷന്‍, സ്‌കോളര്‍ഷിപ് എന്നിവ ലഭ്യമാകൂ. നിലവില്‍ അടുത്ത മെഡിക്കല്‍ ബോര്‍ഡ് ഇനി എന്ന് നടക്കുമെന്ന ആശങ്കയിലാണ് സ്‌കൂള്‍ അധികൃതരും രക്ഷിതാക്കളും.
