മൂന്ന് പേരുടെ മരണത്തിനിടയാക്കിയത്
മാലിന്യ ടാങ്കിലെ വിഷ വാതകം
കട്ടപ്പന: നഗരത്തില്‍ ഹോട്ടലിന്റെ മാലിന്യ ടാങ്ക് വൃത്തിയാക്കാനുള്ള ശ്രമത്തിനിടെ തമിഴ്‌നാട് സ്വദേശികളുടെ മരണത്തിനിടയാക്കിയത് വിഷവാതകമെന്ന് പോസ്റ്റുമോര്‍ട്ടം റിപ്പോര്‍ട്ട്. ചൊവ്വാഴ്ച്ച രാത്രിയിലാണ് കട്ടപ്പന- പുളിയന്‍മല റോഡില്‍ പ്രവര്‍ത്തിച്ചിരുന്ന ഓറഞ്ച് ഹോട്ടലിനോട് ചേര്‍ന്നുള്ള മാലിന്യ ടാങ്ക് വൃത്തിയാക്കാനിറങ്ങിയ മൂന്ന് തൊഴിലാളികള്‍ മരിച്ചത്. തമിഴ്‌നാട്ടിലെ ഗൂഡല്ലൂര്‍ കമ്പോസ്റ്റ് സ്ട്രീറ്റ് സ്വദേശി മൈക്കിള്‍ (23), കീഴെ ഗൂഡല്ലൂര്‍ പട്ടാളമ്മന്‍കോവില്‍ സ്ട്രീറ്റിലെ സുന്ദര പാണ്ഡ്യന്‍ (37), കമ്പം കണ്ണന്‍ വിവേകാനന്ദന്‍ സ്ട്രീറ്റിലെ ജയരാമന്‍ (48) എന്നിവരാണ് മരിച്ചത്.
മാലിന്യ ടാങ്കിനുള്ളിലെ വിഷ വാതകം ശ്വസിച്ചതാണ് മൂവരും മരിക്കാനിടയായത്. എന്നാല്‍ വിഷ വാതകം ഏതാണെന്ന് കണ്ടെത്താനായിട്ടില്ല. ഇതിനായി മരിച്ചവരുടെ ആന്തരികാവയവങ്ങള്‍ അടക്കം പരിശോധിക്കും.
ചൊവ്വാഴ്ച്ച രാത്രി 10 ഓടെയാണ് തൊഴിലാളികള്‍ മാന്‍ ഹോളിലേക്ക് ഇറങ്ങിയത്. ടാങ്ക് വൃത്തിയാക്കുന്നതിനായി ജയരാമനാണ് കോണ്‍ട്രാക്റ്റ് എടുത്തിരുന്നത്. മൈക്കിളാണ് ഹോളിനുള്ളിലേക്ക് ആദ്യം കയറിയത്.
ഇയാളുടെ പ്രതികരണം ഇല്ലാതായതോടെ സുന്ദര പാണ്ഡ്യനും ഇറങ്ങി. രണ്ടുപേരും ടാങ്കില്‍ കുടുങ്ങിയതായി മനസിലാക്കിയ കോണ്‍ട്രാക്ടര്‍ ജയരാമന്‍ ഇവരെ രക്ഷിക്കാനായി ഇറങ്ങുകയായിരുന്നു. മൂവരും ടാങ്കില്‍ അകപ്പെട്ടതോടെ സ്ഥലത്ത് എത്തിയ അഗ്‌നിരക്ഷാസേനയും കട്ടപ്പന പോലീസ് സംഘവും ചേര്‍ന്നാണ് മൃതദേഹങ്ങള്‍ പുറത്തെടുത്തത്. ഒരാളെ കട്ടപ്പന താലൂക്ക് ആശുപത്രിയില്‍ എത്തിക്കുകയും മറ്റ് രണ്ടുപേരെ കട്ടപ്പനയിലെ സ്വകാര്യ ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാന്‍ ആയില്ല. ഹോട്ടല്‍ പുനരുദ്ധാരണത്തിന്റെ ഭാഗമായി നാളുകളായി മാലിന്യ ടാങ്ക് അടഞ്ഞു കിടക്കുകയായിരുന്നു. ഇതേ തുടര്‍ന്ന് ടാങ്കിലുണ്ടായ വിഷവാതകമാണ് തൊഴിലാളികളുടെ മരണത്തിന് കാരണമായതെന്നാണ് പ്രഥമിക നിഗമനം.
മാലിന്യ ടാങ്ക് വൃത്തിയാക്കുന്ന സംഘത്തില്‍ ആറുപേരാണ് ഉണ്ടായിരുന്നത്. മലിന ജലം പമ്പ് ഉപയോഗിച്ച് ക്യാനിനുള്ളില്‍ നിറച്ച ശേഷം അവസാനം ടാങ്കില്‍ അടിഞ്ഞു കിടന്ന മാലിന്യങ്ങള്‍ കോരാന്‍ ഇറങ്ങിയപ്പോഴായിരുന്നു അപകടം. മൂന്നു പേരെ കാണാതായതോടെ ബാക്കിയുള്ളവര്‍ ഉടന്‍ തന്നെ അഗ്‌നിരക്ഷാസേനയെ വിവരം അറിയിച്ചു. അഗ്‌നിരക്ഷാസേന സ്ഥലത്തെത്തിയെങ്കിലും ഇടുങ്ങിയ മാന്‍ ഹോള്‍ രക്ഷാ പ്രവര്‍ത്തനത്തിന് തിരിച്ചടിയായി. തുടര്‍ന്ന് ജെ.സി.ബി എത്തിച്ച് സ്ലാബ് പൊളിച്ചു നീക്കിയാണ് രക്ഷാ പ്രവര്‍ത്തനം നടത്തിയത്.
