- മൂലമറ്റത്തും വാഴത്തോപ്പിലും റോഷി അഗസ്റ്റിന് ഊഷ്മള സ്വീകരണം
ചെറുതോണി: ലേവി അപ്പാപ്പന് അതിരാവിലെ മുതല് വീട്ടുമുറ്റത്ത് അക്ഷമനായി കാത്തുനിന്നത് റോഷി എത്തുന്നു എന്നറിഞ്ഞാണ്. ആ കാത്തു നില്പ്പാകട്ടെ വെറുതേയായുമില്ല. പതിവു പോലെ റോഷി ഇത്തവണയും വീട്ടിലെത്തി അപ്പാപ്പനെ കണ്ട് അനുഗ്രഹം തേടി. കഴിഞ്ഞ അഞ്ചുവട്ടവും തലയില് കൈവച്ച് അനുഗ്രഹിച്ച അപ്പാപ്പന് ഇക്കുറിയും നെറുകയില് കൈവച്ച് വിജയം അനുഗ്രഹിച്ചു, ആറാം വട്ടവും നീ തന്നെ…
ലേവി അപ്പാപ്പന് ചില്ലറക്കാരനല്ല, വയസ്സ് 104 ആയി. ഇടുക്കി നിയോജക മണ്ഡലത്തിലെ ഏറ്റവും പ്രായം കൂടിയ വോട്ടര്മാരിലൊരാളാണ്. നാലു മക്കളാണ് അപ്പാപ്പന്. ഭാര്യയുടെ വിയോഗശേഷം മൂത്ത മകന് ഇഎല് ജോര്ജിനൊപ്പം പുത്തേട് ആണ് താമസം. അപ്പാപ്പനെ പൊന്നാടയണിച്ച് റോഷി ആദരിച്ചപ്പോള് അദ്ദേഹം കെട്ടിപ്പിടിച്ച് മുത്തം നല്കി സ്നേഹം മടക്കി നല്കിയപ്പോള് കണ്ടു നിന്നവര്ക്കും ആഹ്ളാദം.
എല്ലാ തിരഞ്ഞെടുപ്പ് കാലത്തും ഫല പ്രഖ്യാപന ശേഷവും മണ്ഡലത്തിലെത്തുമ്പോള് മൂലമറ്റത്തെ ഇടയപുരയ്ക്കല് വീട്ടില് ഇ.ജെ. ലേവിയെ കണ്ട് റോഷി അനുഗ്രഹം തേടാറുണ്ട്. മന്ത്രിയായതിനു ശേഷവും മണ്ഡലത്തിലെത്തിയപ്പോള് തന്നെ അപ്പാപ്പന്റെ വീട്ടിലെത്തി സന്തോഷം പങ്കുവച്ചിരുന്നു. മണ്ണിനോടും മൃഗങ്ങളോടും മല്ലിട്ട് ജീവിതം പടുത്തുയര്ത്തിയ അപ്പാപ്പന് ഇടുക്കിയിലെ കര്ഷകന്റെ നിശ്ചയദാര്ഢ്യത്തിന്റെ പ്രതിനിധി കൂടിയാണ്.
ഇന്നലെ മൂലമറ്റം ഗണപതി ക്ഷേത്രത്തിലെ ഉത്സവത്തിന്റെ ഭാഗമായാണ് റോഷി അഗസ്റ്റിന് മണ്ഡല പര്യടനം തുടങ്ങിയത്. ക്ഷേത്രത്തിലെത്തിയ സ്ഥാനാര്ഥി കമ്മിറ്റിക്കാരോടൊപ്പം സമയം ചെലവഴിച്ചതിനു ശേഷം ഉത്സവത്തിന്റെ ഭാഗമാകാന് എത്തിയവോട് വോട്ടഭ്യര്ഥിച്ചാണ് മടങ്ങിയത്. തുടര്ന്ന് മണ്ഡലത്തിലെ മഠങ്ങളിലെത്തി കന്യാസ്ത്രീകളുടെ അനുഗ്രഹം തേടി. തുടര്ന്ന് മൂലമറ്റത്തെ വിവിധ സ്കൂളുകളിലെത്തി അധ്യാപകരെ കണ്ട് വോട്ടഭ്യര്ഥിച്ചു. സ്കൂളിലെ കുട്ടികള് ‘റോഷി അങ്കിളേ’ എന്നു വിൡച്ചു ചുറ്റും കൂടിയത് കൗതുമായി.
മൂലമറ്റം പവര് ഹൗസിന്റെ മിനിയേച്ചര് പ്രോജക്ട് മുതല് കെഎസ്ആര്ടിസി ബസ് സ്റ്റാന്ഡ് നവീകരണം വരെ നീളുന്ന വികസന പ്രവര്ത്തനങ്ങള് വിവരിച്ചാണ് റോഷി വോട്ടര്മാരെ സമീപിക്കുന്നത്. ചിലര് ഉന്നയിക്കുന്ന സംശയങ്ങള്ക്കും കൃത്യമായി മറുപടി പറഞ്ഞാണ് മുന്നോട്ടുള്ള യാത്ര. മൂലമറ്റത്തു നിന്ന് നാരകക്കാനത്തേക്ക് തിരിച്ച റോഷി അവിടെ വിവിധ മേഖലളില് പര്യടനം നടത്തി.
തുടര്ന്ന് വാഴത്തോപ്പ് പഞ്ചായത്തിലെത്തി മണ്ഡല പര്യടനം തുടര്ന്നു. പഞ്ചായത്തില് നടത്തിയ 257 കോടി രൂപയുടെ വികസന പ്രവര്ത്തനങ്ങള് അക്കമിട്ടു പറഞ്ഞും വോട്ടര്മാരുടെ സംശയം ദൂരീകരിച്ചുമാണ് റോഷി അടുത്ത പോയിന്റിലേക്ക് നീക്കിയത്. സ്ത്രീകളും കുട്ടികളും അടങ്ങുന്ന വോട്ടര്മാരുടെ സ്നേഹം മുന്പത്തേക്കാള് ലഭിക്കുന്നതായി റോഷി പറഞ്ഞു.
