ചീനിക്കുഴിയിലെ നിഷ്ഠൂര കൊലപാതകം:പ്രതിക്ക് വധശിക്ഷ.തെല്ലും കൂസലില്ലാതെ പ്രതി ഹമീദ്

–സ്വന്തം മകനെയും മരുമകളെയും രണ്ടു പേരക്കുട്ടികളെയും ചുട്ടെരിച്ചു

തൊടുപുഴ: സ്വന്തം മകനെയും മരുമകളെയും രണ്ടു പേരക്കുട്ടികളെയും ഉള്‍പ്പടെ ഒരു കുടുംബത്തിലെ നാലു പേരെ പെട്രോള്‍ ഒഴിച്ച് തീ കൊളുത്തി ക്രൂരമായി കൊലപ്പെടുത്തിയ കേസില്‍ പ്രതിക്ക് വധശിക്ഷ. തൊടുപുഴ ചീനിക്കുഴി ആലിയക്കുന്നേല്‍ ഹമീദിനെ(82)യാണ് കുറ്റക്കാരനെന്ന് കണ്ട് ഇടുക്കി ജില്ല ഒന്നാം അഡീഷണല്‍ സെഷന്‍സ് കോടതി ജഡ്ജി ആഷ് കെ.ബാല്‍ ശിക്ഷാവിധി പ്രഖ്യാപിച്ചത്. വീട് കത്തിച്ചതിന് 10 വര്‍ഷം തടവും രണ്ടു ലക്ഷം രൂപ പിഴയും ഉള്‍പ്പെടെ ആകെ ആറ് ലക്ഷം രൂപ പിഴ അടയ്ക്കണം. അപൂര്‍വങ്ങളില്‍ അപൂര്‍വമായ കേസായതിനാല്‍ പ്രതിക്ക് പരമാവധി ശിക്ഷ വിധിക്കണമെന്ന പ്രോസിക്യൂഷന്റെ അവശ്യം കോടതി അംഗീകരിക്കുകയായിരുന്നു. മകന്‍ ആലിയക്കുന്നേല്‍ മുഹമ്മദ് ഫൈസല്‍ (ഷിബു-50), ഭാര്യ ഷീബ (സീബ-40), മക്കളായ മെഹ്റിന്‍ (16), അസ്ന (13) എന്നിവരെയാണ് ഹമീദ് ചുട്ടുകൊന്നത്. 2022 മാര്‍ച്ച് 18ന് അര്‍ധരാത്രിക്ക് ശേഷമാണ് കേസിനാസ്പദമായ സംഭവം നടന്നത്. പ്രതിയും കൊല്ലപ്പെട്ടവരും ചീനിക്കുഴി സിറ്റിക്ക് സമീപമുള്ള ആലിയക്കുന്നേല്‍ വീട്ടില്‍ ഒരുമിച്ചായിരുന്നു താമസിച്ചിരുന്നത്. ഇവര്‍ തമ്മില്‍ സ്വത്ത് തര്‍ക്കം നിലനിന്നിരുന്നു. ഇതിന്റെ വൈരാഗ്യത്തില്‍ വീട്ടിലെ കിടപ്പ് മുറിയുടെ വാതില്‍ പുറത്ത് നിന്നും ബന്ധിച്ച ശേഷം ജനാല വഴി പെട്രോള്‍ ഒഴിച്ച് തീ കൊളുത്തി കൊലപ്പെടുത്തുകയായിരുന്നു. വര്‍ഷങ്ങള്‍ക്ക് മുമ്പ് മക്കളെയും ഭാര്യയെയും ഉപേക്ഷിച്ച് മറ്റൊരു സ്ത്രീയോടൊപ്പം നാട് വിട്ടു പോയ പ്രതിയെ, ഫൈസലിന്റെ ജ്യേഷ്ഠസഹോദരന്‍ ഷാജി അന്വേഷിച്ച് കണ്ടെത്തി തിരികെ കൊണ്ട് വരികയും തുടര്‍ന്ന് പ്രതി ഇളയ മകനായ ഫൈസലിനോടും കുടുംബത്തോടും ഒപ്പം താമസമാക്കുകയുമായിരുന്നു. നാട് വിട്ടു പോയ സമയം രണ്ട് മക്കള്‍ക്കുമായി പ്രതി എഴുതി നല്കിയിരുന്ന വസ്തുക്കള്‍ തിരികെ നല്‍കണമെന്ന പ്രതിയുടെ ആവശ്യം മക്കള്‍ നിരാകച്ചതാണ് കൊലപാതകത്തിലേയ്ക്ക് എത്തിച്ചത്. ചീനീക്കുഴി ടൗണില്‍ വ്യാപാര സ്ഥാപനം നടത്തി വന്നിരുന്ന മുഹമ്മദ് ഫൈസലിനോടൊപ്പം കടയില്‍ നിന്നും 50 മീറ്റര്‍ മാത്രം അകലെയായുള്ള വീട്ടിലാണ് പ്രതിയും താമസിച്ചിരുന്നത്. സ്വത്തുക്കള്‍ തിരികെ ലഭിക്കുന്നതിനു വേണ്ടി പ്രതി നടത്തിയ കേസുകളില്‍ അനുകൂലമായ വിധി ലഭിക്കാതെ വന്നതിനെ തുടര്‍ന്ന് പ്രതി കോപാകുലനായിരുന്നു. ഇക്കാര്യം പറഞ്ഞ് പ്രതി മുഹമ്മദ് ഫൈസലിനോടും ഭാര്യയോടും പെണ്‍മക്കളോടും വഴക്കിടുമായിരുന്നു. ഫൈസലിനെയും കുടുംബത്തെയും പെട്രോള്‍ ഒഴിച്ച് കത്തിച്ച് കൊലപ്പെടുത്തുമെന്ന് വരെ പരസ്യമായി ഇയാള്‍ ഭീഷണിപ്പെടുത്തുകയും ചെയ്തിരുന്നു. ഈ കാര്യത്തിന് ഫൈസല്‍ കരിമണ്ണൂര്‍ പോലീസ് സ്റ്റേഷനില്‍ നല്കിയ പരാതിയില്‍ ഇരുകൂട്ടരോടും സ്റ്റേഷനില്‍ എത്തുന്നതിന് അറിയിച്ചിരുന്നതിന്റെ തലേ ദിവസമാണ് പ്രതി കൃത്യം നടത്തിയത്. പ്രതിയുടെ ഭീഷണി ഭയന്ന് ഫൈസലും ഭാര്യയും രണ്ടു പെണ്‍കുട്ടികളും രാത്രി ഒരു മുറിയിലാണ് കിടന്നുറങ്ങിയിരുന്നത്. മകന്‍ കടയില്‍ വാങ്ങിക്കൊണ്ട് വച്ചിരുന്ന പെട്രോള്‍ ജാറില്‍ നിന്നും പെട്രോള്‍ 12 ഓളം പ്ലാസ്റ്റിക് കുപ്പികളിലേയ്ക്ക് പകര്‍ത്തിയെടുത്ത ശേഷം, തീ പിടിപ്പിക്കുന്നതിനായി കുപ്പിയുടെ വായ് ഭാഗത്ത് കോട്ടണ്‍ വെയ്സ്റ്റു തിരുകി വച്ച് ഒളിപ്പിച്ച് വയ്ക്കുകയും ചെയ്തിരുന്നു. തുടര്‍ന്ന് സംഭവ ദിവസം രാത്രി മകനും ഭാര്യയും കൊച്ചു മക്കളും കിടന്നുറങ്ങിയിരുന്ന മുറിയുടെ വാതില്‍ പ്രതി പുറത്തു നിന്നും പൂട്ടിയശേഷം ശേഷം മുറിക്കുള്ളിലെ ബാത്‌റൂമിലേയ്ക്കുള്ള ജല വിതരണം ഉള്‍പ്പടെയുള്ളവ ഇല്ലാതാക്കുന്നതിനായി മറ്റ് പൈപ്പുകള്‍ തുറന്നു ജലം ഒഴുക്കി വിട്ട് വാട്ടര്‍ ടാങ്ക് കാലിയാക്കുകയും കൂടാതെ വീട്ടിലെ ടാങ്കിലേയ്ക്ക് വെള്ളം പമ്പ് ചെയ്യുന്ന മോട്ടോറിന്റെ വയര്‍ വിശ്‌ഛേദിക്കുകയും ചെയ്തു. നാല് പേര്‍ക്കും രക്ഷപ്പെടാനുള്ള പഴുതുകളെല്ലാം അടച്ച ശേഷം പെട്രോള്‍ നിറച്ച കുപ്പികള്‍ എടുത്തു കൊണ്ട് വന്ന പ്രതി അവയില്‍ ഒരു കുപ്പിയുടെ വായ് ഭാഗത്ത് തിരുകിയിരുന്ന കോട്ടണ്‍ വേസ്റ്റില്‍ തീ കത്തിച്ച് നാലാളുകളും കിടന്നുറങ്ങിയിരുന്ന മുറിയുടെ ജനാല വഴി മുറിയ്ക്ക് ഉള്ളിലേയ്ക്ക് എറിഞ്ഞിടുകയായിരുന്നു. തീ കത്തി എന്നു മനസിലാക്കിയ ഉടന്‍ മറ്റൊരു പെട്രോള്‍ കുപ്പികൂടി ആ മുറിക്ക് ഉള്ളിലേയ്ക്ക് ഇടുകയും ചെയ്തു. തീപടര്‍ന്നതോടെ ഇളയകുട്ടി അസ്ന അയല്‍വാസിയായ രാഹുലിനെ മൊബൈല്‍ ഫോണില്‍ വിളിച്ച് സഹായം അഭ്യര്‍ഥിച്ചു. അദ്ദേഹം ഓടി വന്ന് കിടപ്പുമുറിയുടെ വാതില്‍ ചവിട്ടിത്തുറന്നെങ്കിലും ആ തക്കത്തിന് ഹമീദ് പുറകിലൂടെ വന്ന് വാതില്‍ വഴി നാല് പെട്രോള്‍ കുപ്പികള്‍ കൂടി മുറിയിലേക്ക് എറിഞ്ഞു. ഇതോടെ രക്ഷാപ്രവര്‍ത്തനം അസാധ്യമായി.
ടാങ്കില്‍ വെള്ളമില്ലാത്തതിനാല്‍ രക്ഷാപ്രവര്‍ത്തനം വൈകി. ഓടിക്കൂടിയവര്‍ ചേര്‍ന്ന് വെള്ളം കൊണ്ട് വന്ന് തീകെടുത്താന്‍ ശ്രമിച്ചപ്പോഴേക്കും നാല് പേരും വെന്തുമരിച്ചിരുന്നു. കുളിമുറിയില്‍ നിന്നാണ് നാല് പേരുടേയും മൃതദേഹം കണ്ടെത്തിയത്. സംഭവ സ്ഥലത്ത് നിന്ന് രക്ഷപ്പെട്ട പ്രതി ബന്ധുവീട്ടിലെത്തി സംഭവത്തേക്കുറിച്ച് പറഞ്ഞു. ഇവര്‍ പോലീസിനെ വിളിക്കാനൊരുങ്ങുമ്പോഴേക്കും പ്രതി വീണ്ടും രക്ഷപ്പെട്ടു. ഓട്ടോറിക്ഷയില്‍ കയറി രക്ഷപ്പെടാന്‍ ശ്രമിക്കുന്നതിനിടെ കരിമണ്ണൂര്‍ പോലീസ് പ്രതിയെ പിടികൂടുകയായിരുന്നു.
സംഭവം നടന്ന് 80 ദിവസത്തിനകം പോലീസ്, കുറ്റപത്രം കോടതിയില്‍ സമര്‍പ്പിച്ചു. അതിനാല്‍ത്തന്നെ പ്രതിക്ക് ഇതുവരെയും ജാമ്യം ലഭിച്ചില്ല. തൊള്ളായിരത്തോളം പേജുള്ള കുറ്റപത്രത്തില്‍ 116 സാക്ഷികളും 62 തൊണ്ടിമുതലുകളും 92 തെളിവ് രേഖകളുമുണ്ടായിരുന്നു. ഒരു സാക്ഷി കൂറുമാറി. ബാക്കി സാക്ഷിമൊഴികളും സാഹചര്യത്തെളിവുകളും ശാസ്ത്രീയ തെളിവുകളും പ്രോസിക്യൂഷന് അനുകൂലമായിരുന്നു.
തൊടുപുഴ ഡെപ്യൂട്ടി പോലീസ് സൂപ്രണ്ടിന്റെ ചുമതല വഹിച്ചിരുന്ന ഇടുക്കി നാര്‍ക്കോട്ടിക് ഡെപ്യൂട്ടി പോലീസ് സൂപ്രണ്ടായിരുന്ന എ.ജി.ലാലിന്റെ നേതൃത്വത്തില്‍ പ്രത്യേക അന്വേഷണ സംഘമാണ് കുറ്റപത്രം സമര്‍പ്പിച്ചത്. പ്രോസിക്യൂഷന് വേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ അഡ്വ. എം. സുനില്‍ മഹേശ്വരന്‍ പിള്ളയാണ് കോടതിയില്‍ ഹാജരായത്. മുട്ടം ജില്ലയിലേയ്ക്ക് മാറ്റിയ പ്രതിയെ വെള്ളിയാഴ്ച പൂജപ്പുര സെന്‍ട്രല്‍ ജയിലേയ്ക്ക് കൊണ്ടു പോകും.

ചീനിക്കുഴി കൂട്ടക്കൊലപാതകം

പ്രതിയുടേത് സമാനതകളില്ലാത്ത ക്രൂരത

തൊടുപുഴ: സമൂഹ മനസാക്ഷിയെ ഞെട്ടിക്കുന്ന കുറ്റകൃത്യമാണ് ചീനിക്കുഴിയിലെ കൂട്ടക്കൊലപാതകത്തില്‍ പ്രതി ഹമീദ് നടത്തിയതെന്ന് പ്രോസിക്യൂഷനും അന്വഷണ സംഘവും വ്യക്തമാക്കുന്നു. പ്രതിയുടേത് സമാനതകളില്ലാത്ത ക്രൂരതയാണെന്ന് ഇവരുടെ കണ്ടെത്തലും വാദവും അംഗീകരിച്ചാണ് കോടതി പ്രതിക്ക് വധശിക്ഷ തന്നെ നല്‍കിയത്. അസുഖബാധിതനാണെന്നും ശിക്ഷയില്‍ ഇളവ് വേണമെന്നും കുറ്റക്കാരനെന്ന് കോടതി വിധി പ്രഖ്യാപിച്ച വേളയില്‍ ഹമീദ് ആവശ്യപ്പെട്ടിരുന്നു. പ്രതിയുടെ പ്രായവും ശ്വാസംമുട്ടല്‍ ഉള്‍പ്പെടെയുള്ള അസുഖവും പരിഗണിച്ച് ശിക്ഷയില്‍ ഇളവ് വേണമെന്ന് പ്രതിഭാഗം അഭിഭാഷകനും വാദിച്ചു. എന്നാല്‍ പ്രതി ആസൂത്രിതമായി നടത്തിയ കൊലപാതകമായിരുന്നെന്നും നിസഹായകരായവരെയാണ് പ്രതി ജീവനോടെ കത്തിച്ചതെന്നും പ്രോസിക്യൂഷന്‍ കോടതില്‍ ചൂണ്ടിക്കാട്ടി. ശിക്ഷക്ക് പ്രായം പരിഗണിക്കരുതെന്നും സ്‌പെഷ്യല്‍ പബ്ലിക് പ്രോസിക്യുട്ടര്‍ അഡ്വ. എം.സുനില്‍ മഹേശ്വരന്‍ പിള്ളയും ആവശ്യപ്പെട്ടിരുന്നു. തുടര്‍ന്നാണ് ഇന്നലെ ഉച്ചയ്ക്ക് രണ്ടിന് വിധി പ്രസ്താവം നടത്തി വധ ശിക്ഷ വിധിച്ച് ജില്ല ഒന്നാം അഡീഷണല്‍ സെഷന്‍സ് കോടതി ജഡ്ജി ആഷ് കെ.ബാല്‍ വിധി പ്രഖ്യാപിച്ചത്.

തെല്ലും കൂസലില്ലാതെ ഹമീദ്:
വിധി പ്രസ്താവം കേട്ടത് നിര്‍വികാരനായി

തൊടുപുഴ: മകനെയും മകന്റെ ഭാര്യയെയും രണ്ട് കൊച്ചുമക്കളെയും തീകൊളുത്തി കൊലപ്പെടുത്തിയ ഹമീദ് വിധി പ്രസ്താവം കേട്ടത് നിര്‍വികാരനായി. തെല്ലും കൂസലില്ലാതെയാണ് ഹമീദ് കോടതിയില്‍ നിന്നത്. വിധി പ്രസ്താവത്തിനായി ഇന്നലെ ഉച്ചയ്ക്ക് 1.45 ഓടെയാണ് തൊട്ടടുത്തുള്ള ജില്ലാ ജയിലില്‍ നിന്ന് മുട്ടം ഒന്നാം അഡീഷണല്‍ സെഷന്‍സ് കോടതി വളപ്പിലേയ്ക്ക് എത്തിച്ചത്. തുടര്‍ന്ന് രണ്ടോടെ ജഡ്ജ് ആഷ് കെ. ബാല്‍ വിധി പ്രഖ്യാപിക്കുകയായിരുന്നു. ഏതാനം മിനിറ്റ് നേരത്തെ നടപടികള്‍ക്ക് ശേഷം പ്രതിക്ക് വധ ശിക്ഷ വിധിക്കുന്നതായി ജഡ്ജ് ആഷ് കെ. ബാല്‍ വിധി പ്രസ്താവിച്ചു. പിന്നീട് വിധി പകര്‍പ്പുകളില്‍ ലഭിക്കുന്നതിനായി തൊട്ടടുത്തുള്ള മുറിയിലേയ്ക്ക് ഇയാളെ മാറ്റി. അവിടെയും ഇയാള്‍ നിര്‍വികാരനായി ഇരുന്നു. ഇടയ്ക്കിടെ കൂടെയുള്ള പോലീസുകാരോട് ചായയും വെള്ളവും ആവശ്യപ്പെടുന്നുണ്ടായിരുന്നു. ഒടുവില്‍ വിധി പകര്‍പ്പ് കിട്ടി ഒപ്പ് രേഖപ്പെടുത്തിയ ശേഷം വൈകുന്നേരം ആറോടെയാണ് ഇയാളെ പോലീസ് വാഹനത്തില്‍ തൊട്ടടുത്തുള്ള ജില്ലാ ജയിലിലേയ്ക്ക് മാറ്റിയത്. ഇന്ന് പൂജപ്പുര സെന്‍ട്രല്‍ ജയിലിലേയ്ക്ക് കൊണ്ടു പോകും.

2022 മാര്‍ച്ച് 19ന് ചീനിക്കുഴി ഉണര്‍ന്നത് ദുരന്തവാര്‍ത്ത് കേട്ട്

തൊടുപുഴ ഉടുമ്പന്നൂര്‍ ചീനിക്കുഴിയില്‍ 2022 മാര്‍ച്ച് 19ന് ശനിയാഴ്ച പുലച്ചെ 12.30ന് ഉറങ്ങിക്കിടക്കുകയായിരുന്ന മുഹമ്മദ് ഫൈസലിനെയും ഭാര്യ ഷീബയെയും മക്കളായ മെഹറിന്‍, അസ്‌ന എന്നിവരെയും കൊലപ്പെടുത്തിയ വാര്‍ത്ത നാടിനെയാകെ ഞെട്ടിച്ചിരുന്നു. ആ കുഞ്ഞുമക്കളെ ഇല്ലാതാക്കിയത് സ്വന്തം മുത്തച്ഛന്‍ തന്നെയാണെന്ന് ആര്‍ക്കും വിശ്വസിക്കാനായില്ല. മകന്‍ മുഹമ്മദ് ഫൈസല്‍, ഭാര്യ ഷീബ, പെണ്‍മക്കളായ മെഹ്‌റിന്‍, അസ്‌ന എന്നിവരെ ഹമീദ് ജനല്‍ വഴി കിടപ്പുമുറിക്കുള്ളിലേക്ക് പെട്രോള്‍ നിറച്ച കുപ്പികള്‍ കത്തിച്ചെറിഞ്ഞ് ക്രൂരമായി കൊലപ്പെടുത്തിയ സംഭവം മനുഷ മനസാക്ഷിയെ ഞെട്ടിക്കുന്നതായിരുന്നു. അര്‍ധരാത്രി ഫൈസലും ഭാര്യയും മക്കളും ഉറങ്ങിയെന്ന് ഉറപ്പാക്കിയ ശേഷം വീട്ടിലെ ടാങ്കിലെ വെള്ളം മുഴുവന്‍ ഒഴുക്കി വിട്ടു. സമീപവീട്ടിലേക്ക് വെള്ളമെടുക്കുന്ന മോട്ടോറിന്റെ വൈദ്യുതിയും വിചേ്ഛദിച്ചു. തുടര്‍ന്ന് കിടപ്പുമുറിയുടെ വാതില്‍ പുറത്ത് നിന്ന് പൂട്ടിയ ശേഷം പുറത്തെത്തി രണ്ട് പെട്രോള്‍ കുപ്പികള്‍ തീകൊളുത്തി ജനല്‍ വഴി അകത്തേക്ക് എറിഞ്ഞു. തീ ആളിക്കത്തിയതോടെ നിലവിളിച്ച് എഴുന്നേറ്റ ഫൈസലും കുടുംബവും മുറിയോട് ചേര്‍ന്ന ശുചിമുറിയില്‍ കയറി തീകെടുത്താന്‍ ശ്രമിച്ചെങ്കിലും വെള്ളമുണ്ടായിരുന്നില്ല. പ്രതികാര ദാഹിയായി നിന്ന ഹമീദിനെ ഓടിയെത്തിയ അയല്‍വാസി രാഹുല്‍ തള്ളി വീഴ്ത്തിയെങ്കിലും അയാള്‍ പുറത്തിറങ്ങി വീണ്ടും ജനലിലൂടെ പെട്രോള്‍ കുപ്പികള്‍ എറിഞ്ഞു. നിലവിളിയും പൊട്ടിത്തെറി ശബ്ദവും കേട്ട് ഉറക്കമുണര്‍ന്ന് ഓടിയെത്തിയ അയല്‍വാസികള്‍ക്ക് അകത്തേക്ക് കടക്കാനായില്ല. വിദ്യാര്‍ഥികളായ മെഹറിന്റെയും അസ്‌നയുടെയും കത്തിക്കരിഞ്ഞ പുസ്തകങ്ങളും കൊലുസും കളിപ്പാട്ടങ്ങളും വസ്ത്രങ്ങളും ദുരന്തസ്ഥലത്തെ കരള്‍ നുറുക്കുന്ന കാഴ്ചയായിരുന്നു. ഹമീദിനെ പോലീസ് സംഭവ ദിവസം തന്നെ അറസ്റ്റ് ചെയ്തു. നിര്‍ണായക സാക്ഷിമൊഴികള്‍ക്കും സാഹചര്യത്തെളിവുകള്‍ക്കും പുറമെ പ്രതി കുറ്റം സമ്മതിക്കുക കൂടി ചെയ്തതോടെ നടപടികള്‍ വേഗത്തില്‍ പൂര്‍ത്തിയാക്കി കുറ്റപത്രം സമര്‍പ്പിച്ചു.

വിസ്തരിച്ചത് 71 സാക്ഷികളെ

തെളിവായി പ്രോസിക്യൂഷന്‍ ഹാജരാക്കിയത് 137 രേഖകള്‍

-ഒരു സാക്ഷി കൂറുമാറി

തൊടുപുഴ: ചീനിക്കുഴി കൂട്ടക്കൊലപാതക കേസില്‍ വിസ്തരിച്ചത് 71 സാക്ഷികളെ. തെളിവായി ഇലക്രേ്ടാണിക്‌സ് ഉപകരണങ്ങളടക്കം 137 രേഖകളും പ്രോസിക്യൂഷന്‍ ഹാജരാക്കി. എന്നാല്‍ അമ്പതാം സാക്ഷിയായ പ്രതിയുടെ അടുത്ത ബന്ധുവായ അഷ്‌റഫ് എന്നയാള്‍ വിസ്താരത്തിനിടെ കൂറുമാറുകയായിരുന്നു. സംഭവത്തിന് ശേഷം പ്രതി അഷ്‌റഫിനെ ഫോണില്‍ വിളിക്കുന്ന രേഖകള്‍ ഉള്‍പ്പെടെ പ്രോസിക്യൂഷന്‍ കോടതിയില്‍ ഹാജരാക്കിയിരുന്നു. നിര്‍ണായക സാക്ഷിമൊഴികള്‍ക്കും സാഹചര്യത്തെളിവുകള്‍ക്കും പുറമേ പ്രതി കുറ്റം സമ്മതിക്കുകകൂടി ചെയ്തതോടെ നടപടികള്‍ വേഗത്തില്‍ പൂര്‍ത്തിയാക്കി കുറ്റപത്രം സമര്‍പ്പിക്കുകയായിരുന്നു.

നീതിന്യായ വ്യവസ്ഥയോട് കടപ്പാട്:
കൊലപ്പെട്ട സീബ യുടെ സഹോദരന്‍ വി.എ സൈജു

തൊടുപുഴ: ക്രൂര കൊലപാതകം നടത്തിയ ഹമീദിന് കോടതി വധ ശിക്ഷ വധിച്ചതില്‍ നീതിന്യായ വ്യവസ്ഥയോട് കടപ്പാടുണ്ടെന്ന് കൊലപ്പെട്ട സീബ യുടെ (ഷീബ) സഹോദരന്‍ വി.എ സൈജു. വിധി പ്രസ്താവം കേട്ട ശേഷം പ്രതികരിക്കുകയായിരുന്നു അദ്ദേഹം.
സൈജു വിന്റെ ഇളയ സഹോദരിയാണ് കൊല്ലപ്പെട്ട സീബ. മങ്കുഴിയില്‍ താമസിച്ചിരുന്ന സൈജുവിന്റെ മക്കളും കൊല്ലപ്പെട്ട സീബയുടെ മക്കളും ഒരു സ്‌കൂളിലാണ് പഠിച്ചിരുന്നത്. അവരുടെ വിയോഗത്തില്‍ നിന്ന് തനിക്കും തന്റെ മക്കള്‍ക്കും ഇതുവരെ കരകയറാന്‍ കഴിഞ്ഞിട്ടില്ല. ഇവരുടെ കൊലപാതക വിവരം അറിഞ്ഞ് നീറി നീറി കഴിഞ്ഞാണ് സംഭവത്തിന് ഒരു വര്‍ഷം തികയും മുന്‍പ് ഉമ്മയും തങ്ങളെ വിട്ടുപോയത്. സീബയുടെയും കുടുംബത്തിന്റെയും ഏറ്റവും വലിയ ആഗ്രഹമായിരുന്നു പുതിയ വീട്ടിലേയ്ക്ക് മാറി താമസിക്കുക എന്നത്. അതിന് പോലും അനുവദിക്കാതെയാണ് അയാള്‍ ആ കൊടും ക്രൂരത ചെയ്തത്. സീബയുടെ പേരിലുള്ള പുതിയ വീട്ടില്‍ ഇപ്പോള്‍ സൈജുവും കുടുംബവുമാണ് താമസിക്കുന്നത്…സഹോദരിയുടെയും മക്കളുടെയും ഓര്‍മ്മകളുമായി

കുട്ടികള്‍ക്ക് നീതി ലഭിച്ചു;
പ്രധാന സാക്ഷി രാഹുല്‍

തൊടുപുഴ: കുട്ടികള്‍ക്ക് നീതി ലഭിച്ചുവെന്ന് പ്രധാന സാക്ഷിയും കൊല്ലപ്പെട്ട ഫൈസലിന്റെ അയല്‍വാസിയുമായ രാഹുല്‍. രാഹുല്‍ വിധി കേള്‍ക്കുന്നതിനായി മുട്ടം കോടതിയില്‍ എത്തിയിരുന്നു. പ്രതി കൃത്യം നടത്തിയ സമയം ആദ്യം വീട്ടിലേക്ക് ഓടിയെത്തിയത് രാഹുലായിരുന്നു. മുറിക്കുള്ളില്‍ തീ ആളിപ്പടര്‍ന്നതിനെ തുടര്‍ന്ന് നാല് പേര്‍ക്കും മുറിയില്‍ നിന്നും രക്ഷപെടാന്‍ മാര്‍ഗമില്ലാതെ വന്നു. ഈ സമയം ഇളയ കുട്ടി തൊട്ടയല്‍വാസിയായ കല്ലുറുമ്പില്‍ രാഹുലിനെ ഫോണില്‍ വിളിക്കുകയായിവുന്നു. വീട്ടിലേക്ക് പാഞ്ഞെത്തിയ രാഹുല്‍ കിടപ്പ് മുറിയുടെ മുകളില്‍ നിന്നും പുക ഉയരുന്നത് കണ്ട് മുന്‍വശത്തെ വാതില്‍ ചവിട്ടിപ്പൊളിച്ചു. നോക്കുമ്പോള്‍ കിടപ്പ് മുറിയിലേയ്ക്ക് വീണ്ടും പെട്രോള്‍ ഒഴിക്കുന്നതിനായി നില്‍ക്കുന്ന ഹമീദിനെ കണ്ടു. തള്ളി മാറ്റി മുറിക്കുള്ളില്‍ ഉണ്ടായിരുന്നവരെ രക്ഷിക്കാന്‍ ശ്രമിക്കുന്നതിനിടെ കൈയ്യില്‍ സൂക്ഷിച്ചിരുന്ന പെട്രോള്‍ നിറച്ച കുപ്പികള്‍ കൂടി തീ കത്തിക്കൊണ്ടിരുന്ന വാതിലിന് വിടവിലൂടെ വീണ്ടും മുറിയിലേയ്ക്ക് എറിയുകയായിരുന്നു. തീ ആളിപ്പടര്‍ന്നതോടെ തനിക്കൊന്നും പിന്നെ ചെയ്യാന്‍ കഴിഞ്ഞില്ലെന്നും രാഹുല്‍ ഓര്‍ക്കുന്നു. നാലു പേരെ കൊന്നയാള്‍ക്ക് ഈ ശിക്ഷ തന്നെയാണ് കൊടുക്കേണ്ടത്. കുട്ടികെളയടക്കം തീ കൊളുത്തി നടത്തിയ ക്രൂര കൊലപാതകം ചെയ്ത പ്രതിക്ക് അര്‍ഹമായ ശിക്ഷയാണ് ലഭിച്ചത്. ഇതോടെ എന്റെ കടമ തീര്‍ന്നതായും രാഹുല്‍ വിധിക്ക് ശേഷം പ്രതികരിച്ചു.

വിധിയില്‍ സന്തോഷം:
അന്വേഷണ ഉദ്യോഗസ്ഥന്‍ എ.ജി ലാല്‍

തൊടുപുഴ: വിധിയില്‍ സന്തോഷമുണ്ടെന്ന് കേസിലെ അന്വേഷണ ഉദ്യോഗസ്ഥനായിരുന്നു എ.ജി ലാല്‍. പ്രായത്തിന്റെ ആനുകൂല്യം പ്രതിക്ക് ലഭിക്കുമോയെന്ന ആശങ്കയുണ്ടായിരുന്നു. പക്ഷേ അതുണ്ടായില്ല, പ്രതി അര്‍ഹിക്കുന്ന ശിക്ഷതന്നെയാണ് കിട്ടിയിരിക്കുന്നത്. ക്രൂരമായ നാല് കൊലപാതകങ്ങളാണ് അയാള്‍ നടത്തിയത്. പ്രോസിക്യൂട്ടര്‍ കേസ് നല്ല രീതിയില്‍ അവതരിപ്പിച്ചു. എല്ലാരീതിയിലുമുള്ള തെളിവുകള്‍ നമുക്ക് ശേഖരിക്കാന്‍ സാധിച്ചിരുന്നു. പ്രതിയുടെ ശരീരത്തില്‍ പൊള്ളലും വസ്ത്രങ്ങളിലും ശരീരത്തും പെട്രോളിന്റെ അംശവുമുണ്ടായിരുന്നു. മുറിയില്‍നിന്നും പെട്രോള്‍ അംശങ്ങള്‍ ശേഖരിക്കാന്‍ കഴിഞ്ഞതോടെ കുറ്റം സമര്‍ത്ഥിക്കാന്‍ സാധിച്ചു. നേരത്തെ തന്നെ കൊല നടത്തണമെന്ന ഉദ്ദേശം പ്രതിക്കുണ്ടായിരുന്നു. അതാണ് സ്വന്തം സാധനങ്ങള്‍ മാറ്റിയത്. ഒരുമാസം മുമ്പ് മകനെ പെട്രോള്‍ ഒഴിച്ച് കത്തിച്ച് കൊല്ലുമെന്ന് ഭീഷണിപ്പെടുത്തിയിരുന്നു. ഇതിലെ പരാതിയും രേഖയായി ഹാജരാക്കിയിരുന്നു. കൃത്യം കണ്ട രാഹുല്‍ ഉള്‍പ്പെടെ അയല്‍വാസികളും ബന്ധുക്കളും കൃത്യമായി മൊഴി നല്‍കി. ഒരു ടീം വര്‍ക്കിന്റെ വിജയമാണ്. മറ്റൊരു കേസിന്റെ തിരക്ക് കൂടി ഇതിനിടയില്‍ വന്നെങ്കിലും സമയബന്ധിതമായി കുറ്റപത്രം സമര്‍പ്പിക്കാന്‍ സാധിച്ചുവെന്നു എ.ജി ലാല്‍ പറഞ്ഞു. അന്വേഷണ സംഘത്തില്‍ ഉണ്ടായിരുന്ന ജയ്‌മോന്‍, അസി സബ് ഇന്‍സ്‌പെക്ടര്‍ അന്നമ്മ, ജോബിന്‍ ജോസഫ് എന്നീ പോലീസ് ഉദ്യോഗസ്ഥര്‍ ചേര്‍ന്നാണ് കോടതിയിലെ പ്രോസിക്യൂഷന്‍ നടപടികള്‍ ഏകോപിപ്പിച്ചത്.

സമൂഹ മനസാക്ഷിയെ
ഞെട്ടിച്ച കുറ്റകൃത്യം: പ്രോസിക്യൂഷന്‍

തൊടുപുഴ: സമൂഹ മനസാക്ഷിയെ ഞെട്ടിക്കുന്ന കുറ്റകൃത്യമാണ് ചീനിക്കുഴിയിലെ കൂട്ടക്കൊലപാതകത്തില്‍ പ്രതി ഹമീദ് നടത്തിയതെന്ന് സ്‌പെഷ്യല്‍ പബ്ലിക് പ്രോസിക്യുട്ടര്‍ അഡ്വ. എം.സുനില്‍ മഹേശ്വരന്‍ പിള്ള മാധ്യമ പ്രവര്‍ത്തകരോട് പറഞ്ഞു. ക്രൂരമായ കൊലപാതകത്തിനുള്ള പദ്ധതിയാണ് പ്രതി തയാറാക്കിയിരുന്നത്. പ്രോസിക്യൂഷന്റെ എല്ലാ വാദങ്ങളും കോടതി അംഗീകരിച്ചു. പ്രായം മാത്രമായി പരിഗണിക്കാന്‍ പാടില്ലെന്നായിരുന്നു പ്രോസിക്യൂഷന്‍ വാധം. മറ്റ് സാഹചര്യങ്ങളെല്ലാം കണക്കിലെടുക്കുമ്പോള്‍ ഇതൊരു നിഷ്ഠൂര കൊലപാതകമാണ്. ദൃക്‌സാക്ഷി രാഹുല്‍ രാജിന്റെ മൊഴിയാണ് ഏറ്റവും നിര്‍ണായകമായ ഘടകം. മരിച്ചവരില്‍ ഇളയകുട്ടി ഫോണ്‍ ചെയ്താണ് വിവരം പറഞ്ഞതും രാഹുല്‍ അവിടെയെത്തുന്നതും. സംഭവശേഷം പ്രതി നടത്തിയ ഫോണ്‍ കോളുകള്‍ അയാളുടെ ഫോണില്‍ തന്നെ റെക്കോര്‍ഡ് ആയിരുന്നു. ബന്ധുക്കള്‍, ഓട്ടോറിക്ഷ ഡ്രൈവര്‍ തുടങ്ങിയവരോടായിരുന്നു ഇത്. അവയുടെ ശബ്ദ സാമ്പിളുകളെടുത്ത് ശാസ്ത്രീയ പരിശോധനയ്ക്ക് വിധേയമാക്കി. അതിന്റെ റിപ്പോര്‍ട്ടുകള്‍ ഉണ്ടായിരുന്നു. ആ സാക്ഷികളെയെല്ലാം വിസ്തരിച്ചു. പ്രതിയുടെ ശരീരത്തിലെ പൊള്ളലുകളും പ്രധാനമായി. സംഭവത്തിന് രണ്ടുദിവസം മുമ്പ് പ്രതിയുടെ സാധന സാമഗ്രികളും 2,20,000 രൂപയും 50,000 രൂപയുടെ ചെക്ക് അടക്കമുള്ള കുറച്ച് രേഖകളും ജ്യേഷ്ഠന്റെ വീട്ടിലേക്ക് മാറ്റിയിരുന്നു. ഇത് കരുതിക്കൂട്ടിയാണ് കൃത്യം നടത്തിയതെന്ന് തെളിയിക്കുന്നതായിരുന്നു. വിചാരണ വേളയില്‍ 2,20,000 തന്റെ സ്വന്തമാണെന്ന് ഹര്‍ജിയിലൂടെ ആവശ്യപ്പെട്ട് വാങ്ങിയിരുന്നതായി പ്രോസിക്യൂട്ടര്‍ പറഞ്ഞു.