–മകനെയും മകന്റെ ഭാര്യയെയും രണ്ട് കൊച്ചുമക്കളെയും
തീകൊളുത്തി കൊലപ്പെടുത്തിയ കേസ്
തൊടുപുഴ: കൊടും ക്രൂരതയുടെ പര്യായമായ ചീനിക്കുഴി കൂട്ടക്കൊലപാതക കേസില്‍ പ്രതി കുറ്റക്കാരനെന്ന് കോടതിയുടെ കണ്ടെത്തല്‍.
ചീനിക്കുഴിയില്‍ മകനെയും മകന്റെ ഭാര്യയെയും രണ്ട് കൊച്ചുമക്കളെയും വീട്ടില്‍ പൂട്ടിയിട്ട് വയോധികന്‍ തീകൊളുത്തി കൊലപ്പെടുത്തിയ കേസിലാണ് പ്രതി ചീനിക്കുഴി ആലിയേകുന്നേല്‍ ഹമീദകുറ്റക്കാരനെന്ന് കോടതി കണ്ടെത്തിയത്. തൊടുപുഴ മുട്ടം ഒന്നാം അഡീഷണല്‍ സെഷന്‍സ് കോടതി ജഡ്ജ് ആഷ് കെ. ബാലിന്റേതാണ് വിധി. പ്രതിക്കുള്ള ശിക്ഷ 30ന് കോടതി വിധിക്കും. പ്രതി ആസൂത്രിതമായി നടത്തിയ കൊലപാതകമായിരുന്നെന്നും നിസഹായകരായവരെയാണ് പ്രതി ജീവനോടെ കത്തിച്ചതെന്നു പ്രോസിക്യൂഷന് കോടതിയില്‍ ചൂണ്ടിക്കാട്ടി. ശിക്ഷക്ക് പ്രായം പരിഗണിക്കരുതെന്നും പ്രോസിക്യൂഷന് ആവശ്യപ്പെട്ടു. അതേ സമയം പ്രായം പരിഗണിച്ച് പ്രതിക്ക് കുറഞ്ഞ ശിക്ഷ നല്‍കണമെന്ന് പ്രതി ഭാഗം അഭിഭാഷകന്‍ കോടതിയോട് അഭ്യര്‍ഥിച്ചു. പ്രതിയുടെ മകന്‍ ചീനിക്കുഴി ആലിയകുന്നേല്‍ മുഹമ്മദ് ഫൈസല്‍(45-ഷിബു), ഭാര്യ ഷീബ (40), മക്കളായ മെഹ്‌റിന്‍ (16), അസ്‌ന(13) എന്നിവരാണ് കൊല്ലപ്പെട്ടത്. തൊടുപുഴ ഉടുമ്പന്നൂര്‍ ചീനിക്കുഴിയില്‍ 2022 മാര്‍ച്ച് 19ന് ശനിയാഴ്ച പുലച്ചെ 12.30ന് ഉറങ്ങിക്കിടക്കുകയായിരുന്ന മുഹമ്മദ് ഫൈസലിനെയും ഭാര്യ ഷീബയെയും മക്കളായ മെഹറിന്‍, അസ്‌ന എന്നിവരെയും കൊലപ്പെടുത്തിയ വാര്‍ത്ത നാടിനെയാകെ ഞെട്ടിച്ചിരുന്നു. ആ കുഞ്ഞുമക്കളെ ഇല്ലാതാക്കിയത് സ്വന്തം മുത്തച്ഛന്‍ തന്നെയാണെന്ന് ആര്‍ക്കും വിശ്വസിക്കാനായില്ല. മകന്‍ മുഹമ്മദ് ഫൈസല്‍, ഭാര്യ ഷീബ, പെണ്‍മക്കളായ മെഹ്‌റിന്‍, അസ്‌ന എന്നിവരെ ഹമീദ് ജനല്‍ വഴി കിടപ്പുമുറിക്കുള്ളിലേക്ക് പെട്രോള്‍ നിറച്ച കുപ്പികള്‍ കത്തിച്ചെറിഞ്ഞ് ക്രൂരമായി കൊലപ്പെടുത്തിയതെന്നാണ് കേസ്. അര്‍ധരാത്രി ഫൈസലും ഭാര്യയും മക്കളും ഉറങ്ങിയെന്ന് ഉറപ്പാക്കിയ ശേഷം വീട്ടിലെ ടാങ്കിലെ വെള്ളം മുഴുവന്‍ ഒഴുക്കി വിട്ടു. സമീപവീട്ടിലേക്ക് വെള്ളമെടുക്കുന്ന മോട്ടോറിന്റെ വൈദ്യുതിയും വിചേ്ഛദിച്ചു. തുടര്‍ന്ന് കിടപ്പുമുറിയുടെ വാതില്‍ പുറത്ത് നിന്ന് പൂട്ടിയ ശേഷം പുറത്തെത്തി രണ്ട് പെട്രോള്‍ കുപ്പികള്‍ തീകൊളുത്തി ജനല്‍ വഴി അകത്തേക്ക് എറിഞ്ഞു. തീ ആളിക്കത്തിയതോടെ നിലവിളിച്ച് എഴുന്നേറ്റ ഫൈസലും കുടുംബവും മുറിയോട് ചേര്‍ന്ന ശുചിമുറിയില്‍ കയറി തീകെടുത്താന്‍ ശ്രമിച്ചെങ്കിലും വെള്ളമുണ്ടായിരുന്നില്ല. പ്രതികാര ദാഹിയായി നിന്ന ഹമീദിനെ ഓടിയെത്തിയ അയല്‍വാസി രാഹുല്‍ തള്ളി വീഴ്ത്തിയെങ്കിലും അയാള്‍ പുറത്തിറങ്ങി വീണ്ടും ജനലിലൂടെ പെട്രോള്‍ കുപ്പികള്‍ എറിഞ്ഞു. നിലവിളിയും പൊട്ടിത്തെറി ശബ്ദവും കേട്ട് ഉറക്കമുണര്‍ന്ന് ഓടിയെത്തിയ അയല്‍വാസികള്‍ക്ക് അകത്തേക്ക് കടക്കാനായില്ല. വിദ്യാര്‍ഥികളായ മെഹറിന്റെയും അസ്‌നയുടെയും കത്തിക്കരിഞ്ഞ പുസ്തകങ്ങളും കൊലുസും കളിപ്പാട്ടങ്ങളും വസ്ത്രങ്ങളും ദുരന്തസ്ഥലത്തെ കരള്‍ നുറുക്കുന്ന കാഴ്ചയായിരുന്നു. ഹമീദിനെ പോലീസ് സംഭവ ദിവസം തന്നെ അറസ്റ്റ് ചെയ്തു. നിര്‍ണായക സാക്ഷിമൊഴികള്‍ക്കും സാഹചര്യത്തെളിവുകള്‍ക്കും പുറമെ പ്രതി കുറ്റം സമ്മതിക്കുക കൂടി ചെയ്തതോടെ നടപടികള്‍ വേഗത്തില്‍ പൂര്‍ത്തിയാക്കി കുറ്റപത്രം സമര്‍പ്പിച്ചു. പ്രോസിക്യൂഷന് വേണ്ടി സ്‌പെഷ്യല്‍ പബ്ലിക് പ്രോസിക്യുട്ടര്‍ അഡ്വ. എം.സുനില്‍ മഹേശ്വരന്‍ പിള്ളയാണ് ഹാജരായത്.
ഭാവഭേദമില്ലാതെ ഹമീദ്:
അസുഖബാധിതനാണെന്നും ശിക്ഷയില്‍ ഇളവ് വേണമെന്നും ആവശ്യം
തൊടുപുഴ: മകനെയും മകന്റെ ഭാര്യയെയും രണ്ട് കൊച്ചുമക്കളെയും തീകൊളുത്തി കൊലപ്പെടുത്തിയ ഹമീദിനെ വിധി പ്രസ്താവത്തിനായി ഇന്നലെ രാവിലെ പതിനൊന്നോടെയാണ് തൊട്ടടുത്തുള്ള ജില്ലാ ജയിലില്‍ നിന്ന് മുട്ടം ഒന്നാം അഡീഷണല്‍ സെഷന്‍സ് കോടതി വളപ്പിലേയ്ക്ക് എത്തിച്ചത്. തുടര്‍ന്ന് ജഡ്ജ് ആഷ് കെ. ബാല്‍ ആദ്യം വിളിച്ചതും പ്രമാദമായ ഈ കേസായിരുന്നു. വിധി ഉച്ചകഴിഞ്ഞ് മൂന്നിന് പ്രസ്താവിക്കുമെന്ന് ജഡ്ജ് ആഷ് കെ. ബാല്‍ പറഞ്ഞതോടെ ഹമീദുമായി പോലീസ് ജയിലിലേയ്ക്ക് മടങ്ങി. തുടര്‍ന്ന് ഉച്ചയ്ക്ക് മൂന്നിന് കോടതി ചേരുന്നതിന് പത്തുമിനിറ്റ് മുന്‍പ് പോലീസ് വീണ്ടും ഹമീദിനെ ജയിലില്‍ എത്തിച്ചു. ഏതാനം മിനിറ്റ് നേരത്തെ നടപടികള്‍ക്ക് ശേഷം പ്രതി കുറ്റക്കാരനെന്ന് കണ്ടെത്തിയതായി ജഡ്ജ് ആഷ് കെ. ബാല്‍ വിധി പ്രസ്താവിച്ചു. ഭാവഭേദമില്ലാതെയാണ് ഹമീദ് വിധി ശ്രവിച്ചത്. എന്തെങ്കിലും ബോധിപ്പിക്കാനുണ്ടോയെന്ന ജഡ്ജിയുടെ ചോദ്യത്തിന് അസുഖബാധിതനാണെന്നും ശിക്ഷയില്‍ ഇളവ് വേണമെന്നുമായിരുന്നു ഹമീദിന്റെ ആവശ്യം. പ്രതിയുടെ പ്രായവും ശ്വാസംമുട്ടല്‍ ഉള്‍പ്പെടെയുള്ള അസുഖവും പരിഗണിച്ച് ശിക്ഷയില്‍ ഇളവ് വേണമെന്ന് പ്രതിഭാഗം അഭിഭാഷകനും വാദിച്ചു. എന്നാല്‍ പ്രതി ആസൂത്രിതമായി നടത്തിയ കൊലപാതകമായിരുന്നെന്നും നിസഹായകരായവരെയാണ് പ്രതി ജീവനോടെ കത്തിച്ചതെന്നും പ്രോസിക്യൂഷന് കോടതില്‍ ചൂണ്ടിക്കാട്ടി. ശിക്ഷക്ക് പ്രായം പരിഗണിക്കരുതെന്നും സ്‌പെഷ്യല്‍ പബ്ലിക് പ്രോസിക്യുട്ടര്‍ അഡ്വ. എം.സുനില്‍ മഹേശ്വരന്‍ പിള്ളയും ആവശ്യപ്പെട്ടു. തുര്‍ന്ന് ശിക്ഷയിലുള്ള വിധി 30 ലേയ്ക്ക് മാറ്റിയതായി അറിയിച്ച് കോടതി നടപടികള്‍ അവസാനിപ്പിക്കുകയായിരുന്നു. തുടര്‍ന്ന് പ്രതിയെ മുട്ടം ജില്ലാ ജയിലിലേയ്ക്ക് മാറ്റി.
പ്രതി നടത്തിയത് ആസൂത്രിത കൊലപാതകമെന്ന്
അന്വേഷണ സംഘം
തൊടുപുഴ: പ്രതി നടത്തിയത് ആസൂത്രിത കൊലപാതകമെന്ന് അന്വേഷണ സംഘം. സ്വത്ത് സംബന്ധമായ തര്‍ക്കമായിരുന്നു ക്രൂരകൊലപാതകത്തിന് കാരണം. കൊലപാതകം നടത്താന്‍ പ്രതി മുന്‍കൂട്ടി ആസൂത്രണം ചെയ്തിരുന്നതായി കേസ് അന്വേഷിച്ചിരുന്ന അന്നത്തെ തൊടുപുഴ ഡിവൈ.എസ്.പി ആയിരുന്ന കെ.ജി ലാല്‍ മാധ്യമ പ്രവര്‍ത്തകരോട് പറഞ്ഞു. പ്രതിയുടെ പക്കലുള്ള പണവും മറ്റു രേഖകളും നശിക്കാതിരിക്കാന്‍ സംഭവം നടത്തുന്നതിന് മുന്‍പ് തന്നെ സഹോദരന്റെ വീട്ടില്‍ എത്തിച്ചിരുന്നു. ഇരകള്‍ രക്ഷപ്പെടാനുള്ള എല്ലാ മാര്‍ഗങ്ങളും ഇയാള്‍ അടച്ചു. കൊലപ്പെടുത്തണമെന്ന ഉദ്ദേശത്തില്‍ പെട്രോള്‍ നിറച്ച കുപ്പികള്‍ തുടര്‍ച്ചയായി ഇവരുടെ മുറിയിലേക്കെറിയുകയായിരുന്നു. വീട്ടിലെ വാട്ടര്‍ കണക്ഷനും ഇയാള്‍ മനപൂര്‍വം വിശ്ചേദിച്ചതായും അന്വേഷണ സംഘം കോടതിയില്‍ ചൂണ്ടിക്കാട്ടിയിരുന്നു.
സമൂഹ മനസാക്ഷിയെ
ഞെട്ടിക്കുന്ന കുറ്റകൃത്യം: പ്രോസിക്യൂഷന്
തൊടുപുഴ: സമൂഹ മനസാക്ഷിയെ ഞെട്ടിക്കുന്ന കുറ്റകൃത്യമാണ് ചീനിക്കുഴിയിലെ കൂട്ടക്കൊലപാതകത്തില്‍ പ്രതി ഹമീദ് നടത്തിയതെന്ന് സ്‌പെഷ്യല്‍ പബ്ലിക് പ്രോസിക്യുട്ടര്‍ അഡ്വ. എം.സുനില്‍ മഹേശ്വരന്‍ പിള്ള മാധ്യമ പ്രവര്‍ത്തകരോട് പറഞ്ഞു. ക്രൂരമായ കൊലപാതകത്തിനുള്ള പദ്ധതിയാണ് പ്രതി തയാറാക്കിയിരുന്നത്. ഇതിന് സാക്ഷി മൊഴികളുണ്ട്. കൊല്ലപ്പെട്ട ഫൈസല്‍ നിയമവിരുദ്ധമായി പെട്രോള്‍ സൂക്ഷിച്ചിരുന്നവെന്ന വാദം തെറ്റാണ്. അങ്ങനെ ഒരു തെളിവ് കോടതിയില്‍ വന്നിട്ടില്ല. മരിക്കുന്നതിന്റെ രണ്ടു ദിവസം മുന്‍പ് ഫൈസല്‍ 35 ലിറ്റര്‍ വീതം കൊള്ളുന്ന കന്നാസുകളില്‍ ഡീസലും പെട്രോളും വാങ്ങിയിരുന്നു. അത് ഫൈസല്‍ നടത്തുന്ന കടയില്‍ സൂക്ഷിച്ച് വില്‍പന നടത്തുന്നതിനായിരുന്നുവെന്നാണ് പ്രോസിക്യൂഷന് കണ്ടെത്തല്‍. ഇത് ചെറിയ കുപ്പികളിലാക്കി പ്രതി കൊണ്ടു പോകുന്നത് കണ്ടതായി സാക്ഷി മൊഴികള്‍ ഉണ്ടെന്നും പ്രോസിക്യൂഷന് പറഞ്ഞു.
വിസ്തരിച്ചത് 71 സാക്ഷികളെ
തെളിവായി പ്രോസിക്യൂഷന് ഹാജരാക്കിയത് 137 രേഖകള്‍
-ഒരു സാക്ഷി കൂറുമാറി
തൊടുപുഴ: ചീനിക്കുഴി കൂട്ടക്കൊലപാതക കേസില്‍ വിസ്തരിച്ചത് 71 സാക്ഷികളെ. തെളിവായി ഇലക്രേ്ടാണിക്‌സ് ഉപകരണങ്ങളടക്കം 137 രേഖകളും പ്രോസിക്യൂഷന് ഹാജരാക്കി. എന്നാല്‍ അമ്പതാം സാക്ഷിയായ പ്രതിയുടെ അടുത്ത ബന്ധുവായ അഷ്‌റഫ് എന്നയാള്‍ വിസ്താരത്തിനിടെ കൂറുമാറുകയായിരുന്നു. സംഭവത്തിന് ശേഷം പ്രതി അഷ്‌റഫിനെ ഫോണില്‍ വിളിക്കുന്ന രേഖകള്‍ ഉള്‍പ്പെടെ പ്രോസിക്യൂഷന് കോടതിയില്‍ ഹാജരാക്കിയിരുന്നു. നിര്‍ണായക സാക്ഷിമൊഴികള്‍ക്കും സാഹചര്യത്തെളിവുകള്‍ക്കും പുറമേ പ്രതി കുറ്റം സമ്മതിക്കുകകൂടി ചെയ്തതോടെ നടപടികള്‍ വേഗത്തില്‍ പൂര്‍ത്തിയാക്കി കുറ്റപത്രം സമര്‍പ്പിക്കുകയായിരുന്നു.
