കുട്ടിയെ സി.ഡബ്ള്യു.സി ഏറ്റെടുത്തു
തൊടുപുഴ: രണ്ടു മാസത്തില്‍ താഴെമാത്രം പ്രായമുള്ള കുഞ്ഞിനെ തനിച്ചാക്കി മാതാവ് വീട് പൂട്ടിപ്പോയ സംഭവത്തില്‍ കുട്ടിയെ ചൈല്‍ഡ് വെല്‍ഫെയര്‍ കമ്മിറ്റി ഏറ്റെടുത്തു. ഇടവെട്ടി ശാസ്താംപാറ അംഗണവാടിക്ക് സമീപം താമസിക്കുന്ന യുവതിയാണ് രണ്ട് മാസത്തില്‍ താഴെ മാത്രം പ്രായമുള്ള പെണ്‍കുഞ്ഞിനെ വീട്ടില്‍ തനിച്ചാക്കി പോയത്. കുഞ്ഞിന്റെ തുടര്‍ച്ചയായ കരച്ചില്‍ കേട്ട നാട്ടുകാര്‍ വിവരം തിരക്കി വീട്ടില്‍ വന്നപ്പോഴാണ് വീട്ടില്‍ ആരും ഇല്ലെന്നും കുഞ്ഞ് തനിച്ചാണെന്നും മനസിലാക്കുന്നത്. ഉടന്‍ തന്നെ നാട്ടുകാര്‍ ജനപ്രതിനിധികളെയും തൊടുപുഴ പോലീസ് സ്റ്റേഷനിലും വിവരം അറിയിച്ചു. ഏതാനും സമയത്തിനുള്ളില്‍ തൊടുപുഴയില്‍ നിന്നുള്ള പോലീസ് സംഘം വീട്ടിലെത്തുകയും ജനപ്രതിനിധികളുടെയും നാട്ടുകാരുടെയും സാന്നിധ്യത്തില്‍ വാതില്‍ പൊളിച്ച് അകത്തു കയറി കുഞ്ഞിനെ രക്ഷിക്കുകയുമായിരുന്നു. കുഞ്ഞിനെ ഉടന്‍ തന്നെ ജില്ലാ ആശുപത്രിയില്‍ എത്തിക്കുകയും പ്രാഥമിക ശുശ്രൂഷകള്‍ നല്‍കുകയും ചെയ്തു. വിവരമറിഞ്ഞ് ശനിയാഴ്ച രാവിലെ ഇടുക്കി ചൈല്‍ഡ് വെല്‍ഫെയര്‍ കമ്മിറ്റി അംഗങ്ങളായ അഡ്വ. അനില്‍.ജെ, പുഷ്പലത എം.എന്‍, ചൈല്‍ഡ് പ്രൊട്ടക്ഷന്‍ ഓഫീസര്‍ ജോമറ്റ് ജോര്‍ജ്, ഔട്ട് റീച്ച് വര്‍ക്കര്‍ ശ്രീരേഖ ജില്ലാ ആശുപത്രിയിലെത്തി. കുട്ടിയുടെ ആരോഗ്യ സ്ഥിതി തൃപ്തികരമാണെന്ന് വിലയിരുത്തിയ ശേഷം കുട്ടിയുടെ തുടര്‍ സംരക്ഷണം ഏറ്റെടുത്തു. കുട്ടിയെ തുടര്‍ പരിപാലനത്തിനായി ശിശു സംരക്ഷണ കേന്ദ്രത്തില്‍ പ്രവേശിപ്പിച്ചു.
