താലൂക്ക് കേന്ദ്രങ്ങളില്‍ മണ്ണെണ്ണ എത്തിച്ചു തരാമെന്ന് സിവില്‍ സപ്ലൈസ്
ഇടുക്കി: താലൂക്ക് കേന്ദ്രങ്ങളില്‍ മണ്ണെണ്ണ എത്തിച്ചു തരാമെന്ന് സിവില്‍ സപ്ലൈസ് ഉറപ്പു നല്‍കിയതോടെ ഇടുക്കിയില്‍ റേഷന്‍ മണ്ണെണ്ണ വിതരണം പുനരാരംഭിക്കുന്നു. സംസ്ഥാനത്ത് മിക്ക ജില്ലകളിലും ആവശ്യത്തിന് മണ്ണെണ്ണ മൊത്ത വിതരണ കേന്ദ്രങ്ങള്‍ ഇല്ലാതിരുന്നതിനാലും, നിലവില്‍ നാമമാത്രമായ കേന്ദ്രങ്ങളില്‍ 100 കിലോമീറ്ററുകള്‍ ദൂരെയുളള കേന്ദ്രങ്ങളില്‍ പോയി മണ്ണെണ്ണ എടുക്കുന്നത് ഭീമമായ സാമ്പത്തിക ബാധ്യത വരുത്തുന്നതിനാല്‍ വ്യാപാരികള്‍ മണ്ണെണ്ണ ഏറ്റെടുക്കാത്ത സ്ഥിതിയായിരുന്നു. മണ്ണെണ്ണയും റേഷന്‍ കടകളില്‍ വാതില്‍ പടിയായി ടാങ്കര്‍ ലോറികളില്‍ എത്തിച്ചു തരണമെന്ന ആവശ്യം ഉന്നയിച്ച് റേഷന്‍ വ്യാപാരി സംഘടനകള്‍ സംസ്ഥാന തലത്തില്‍ കേരള ഹൈകോടതിയെ സമീപിക്കുകയും വ്യാപാരികള്‍ക്ക് അനുകൂലമായി ഹൈകോടതി വിധി പുറപ്പെടുവിക്കുകയും, പദ്ധതി നടപ്പിലാക്കുന്നതിന് സര്‍ക്കാരിന് നിശ്ചിത കാലാവധി സാവകാശം നല്‍കിയിരിക്കുന്ന സ്ഥിതിയാണ് നിലവിലുള്ളത്. എങ്കിലും സംസ്ഥാനത്തിന് അനുവദിച്ചിരിക്കുന്ന മണ്ണെണ്ണ നഷ്ടപെടാതിരിക്കുന്നതിനായി താലൂക്ക് കേന്ദ്രങ്ങളില്‍ മണ്ണെണ്ണ എത്തിച്ചു തരാമെന്ന് സിവില്‍ സപ്ലൈസ് അധികൃതരുടെ ഉറപ്പിന്റെ അടിസ്ഥാനത്തില്‍ ഇത്തവണ മാത്രം മണ്ണെണ്ണ ഏറ്റെടുക്കുന്നതിനും, അടുത്ത തവണ കടകളില്‍ വാതില്‍ പടിയായി മണ്ണെണ്ണ എത്തിച്ചു തരുന്നതിന് ഉള്ള ഹൈക്കോടതി വിധി അധികൃതര്‍ നടപ്പിലാക്കിയാല്‍ മാത്രം സഹകരിക്കുന്നതിനും ജില്ലയിലെ റേഷന്‍ വ്യാപാരി സംയുക്ത സമിതി തിരുമാനിച്ചു.
