തൊടുപുഴ: വിനോദ സഞ്ചാരികള്‍ക്ക് നയനമനോഹര കാഴ്ചയൊരുക്കി ഒളമറ്റം ഉറവപ്പാറ മലനിരകളില്‍ പൂപ്പാടം. ഉറവപ്പാറയ്ക്ക് മുകളിലെ പത്മവില്ലേജിലാണ് ഓണപ്പൂക്കളമൊരുക്കുന്നതിനയി നട്ടുവളര്‍ത്തിയിട്ടുള്ള പൂപ്പാടം ഏവരെയും ആകര്‍ഷിക്കുന്നത്. 40 സെന്റ് സ്ഥലത്ത് 2000 ഓളം ചെണ്ടുമല്ലി പൂക്കളാണ് വിരിഞ്ഞിരിക്കുന്നത്. മഞ്ഞയും ഓറഞ്ചു നിറവും ഇടകലര്‍ന്ന് വിരിഞ്ഞിരിക്കുന്ന പൂപ്പാടം കാണാം നിരവധി പേരാണ് ദിവസവും ഇവിടെയെത്തുന്നത്. ഉയരം കുറഞ്ഞ ഹൈബ്രീഡ് ഇനമാണ് ഇവിടെ നട്ടുവളര്‍ത്തിയിരിക്കുന്നത്. വാണിജ്യാടിസ്ഥാനത്തില്‍ സാധാരണ തമിഴ്നാട്ടിലാണ് ഇത്തരം പൂപ്പാടങ്ങള്‍ കാണാറുള്ളത്. തൊടുപുഴയില്‍ നിന്ന് മൂലമറ്റം റൂട്ടില്‍ രണ്ടര കിലോമീറ്ററോളം സഞ്ചരിച്ചാല്‍ ഉറവപ്പാറ മലനിരയുടെ താഴ്വാരത്ത് എത്താം. ഇവിടെ നിന്നും പാറമുകളിലെ പത്മ വില്ലേജില്‍ എത്തിയാല്‍ ഏവര്‍ക്കും നയന മനോഹരമായ കാഴ്ചയാണ് പ്രകൃതി ഒരുക്കിയിരിക്കുന്നത്. പാറയ്ക്ക് മുകളിലെ ഒളമറ്റം ഉറവപ്പാറ ശ്രീസുബ്രഹ്‌മണ്യ സ്വാമി ക്ഷേത്രം ചരിത്ര പ്രസിദ്ധമാണ്. വിനോദത്തിനായും ദര്‍ശനത്തിനായും നിരവധി പേരാണ് ഇവിടെ എത്തുന്നത്. പഞ്ചപാണ്ഡവര്‍ക്ക് വേണ്ടി പാഞ്ചാലി ഭക്ഷണം പാകം ചെയ്യാന്‍ ഉപയോഗിച്ച അടുപ്പ് എന്ന് വിശ്വസിക്കുന്ന വലിയ മൂന്ന് പാറക്കല്ലുകള്‍ ക്ഷേത്രത്തിന് പിന്നിലായി സ്ഥിതി ചെയ്യുന്നു. ഭീമസേനന്‍ കാല് കൊണ്ട് നിര്‍മിച്ചെന്ന് ഭക്തര്‍ കരുതുന്ന തീര്‍ഥ കുളവും ഇവിടെയുണ്ട്. ബാലസുബ്രഹ്‌മണ്യനാണ് പ്രധാന പ്രതിഷ്ഠ.ആണ്‍ പാറ, പെണ്‍ പാറ എന്ന് വിളപ്പേരുള്ള രണ്ട് ഭീമന്‍ പാറയാണ് ഇവിടെയുള്ളത്. തൊടുപുഴ നഗരത്തിന്റെ വിദൂര ദൃശ്യം കാണാന്‍ കഴിയുന്ന പാറയുടെ മുകളിലാണ് പത്മവില്ലേജ്. ഡെസ്റ്റിനേഷന്‍ ടൂറിസത്തിന് വേണ്ടിയുള്ള ഒരുക്കത്തിലാണ് പത്മവില്ലേജ്.
കഴിഞ്ഞ കുറെ വര്‍ഷങ്ങളായി പത്മ വില്ലേജ് ഉടമ അനൂപ് ചെണ്ടുമല്ലി കൃഷി ചെയ്യാറുണ്ട്. തന്റെ ഫാം റിസോര്‍ട്ടിനോട് ചേര്‍ന്ന് കിടക്കുന്ന ഭൂമിയിലാണ് അനൂപ് പൂപ്പാടം ഒരുക്കിയത്. സഞ്ചാരികളുടെ ഇഷ്ട ഇടമാണ് ഉറവ പാറ. തൊടുപുഴയുടെ മിക്ക സ്ഥലവും എറണാകുളം കോട്ടയം ജില്ലകളുടെ ചിലയിടങ്ങളും ഇവിടെ നിന്നാല്‍ കാണാന്‍ കഴിയും. ഈ കാഴ്ചകള്‍ക്കൊപ്പം ഒരു പൂപ്പാടവും കൂടിയാകുമ്പോള്‍ അതിമനോഹരമാകും. വരുംവര്‍ഷങ്ങളില്‍ കൂടുതല്‍ സ്ഥലത്ത് കൃഷി ചെയ്യാന്‍ തയ്യാറെടുക്കുകയാണ് അനൂപ്. മഴ ചതിച്ചത് മൂലം പൂക്കള്‍ വിരിയാന്‍ താമസിച്ചതായി അനൂപ് പറയുന്നു. നിരവധി സിനിമകളുടെ ഷൂട്ടിങ് ലൊക്കേഷനും പത്മാ വില്ലേജ് വേദിയായിട്ടുണ്ട്.
