ഡോക്ടര്‍ എപ്പോള്‍ വരും പോകും എന്നൊന്നും ഒരു കൃത്യതയുമില്ല
പാവങ്ങള്‍ക്ക് ചികിത്സ തേടാന്‍ മറ്റൊരിടവുമില്ല; ദുരിതത്തിലായി രോഗികള്‍
തൊടുപുഴ: പാവപ്പെട്ടവും സാധാരണക്കാരുമടക്കം നിത്യേന നൂറ് കണക്കിനാളുകള്‍ ആശ്രയിക്കുന്ന തൊടുപുഴയിലെ ജില്ലാ ആശുപത്രിയില്‍ ചികിത്സക്കായി രോഗികള്‍ മണിക്കൂറുകളും ദിവസങ്ങളും കാത്തിരിക്കേണ്ട ഗതികേടില്‍. ചിലപ്പോഴാകട്ടെ ഏറെ ദൂരത്ത് നിന്നും കഷ്ടപ്പെട്ട് എത്തി ചികിത്സ നേടാനാകാതെ മടങ്ങേണ്ടിയും വരുന്നുണ്ട്. നാല്‍പ്പതോളം ഡോക്ടര്‍മാരും ഇരുന്നൂറിലധികം ജീവനക്കാരുമാണ് ആശുപത്രിയില്‍ ആകെയുള്ളത്. ലക്ഷങ്ങള്‍ പ്രതിഫലം വാങ്ങുന്ന ഡോക്ടര്‍മാരില്‍ പലരും ആഴ്ചയില്‍ ഒന്നോ രണ്ടോ ദിവസം മാത്രമാണ് ഡ്യൂട്ടിക്കെത്തുന്നതെന്ന് ആശുപത്രി വികസന സമിതി അംഗങ്ങള്‍ തന്നെ പറയുന്നു. രാവിലെ എട്ട് മണി മുതല്‍ ഒരു മണി വരെയാണ് ഡോക്ടര്‍മാരുടെ ഡ്യൂട്ടി സമയം. ഇത്
പ്രതീക്ഷിച്ച് രോഗികളും കൂട്ടിരിപ്പുകാരും ഓ.പി ചീട്ടുമെടുത്ത് ഏഴര മുതല്‍ അതാത് ഡോക്ടര്‍മാരുടെ കാബിനുകള്‍ക്ക് മുന്നില്‍ വരി വരിയായി കാത്ത് നില്‍ക്കും. ആവശ്യത്തിന് ഇരിപ്പിടമില്ലാത്തതിനാല്‍ അവശരായവരില്‍ പലരും നിലത്തും മറ്റുമാണ് ഇരിക്കുന്നത്. എന്നാല്‍ പല ഡോക്ടര്‍മാരും ഒമ്പതും പത്തും മണിയാകുമ്പോഴാണ് ആശുപത്രിയിലേക്ക് എത്തുക. ഇതില്‍ തന്നെ ചിലര്‍ ഒന്നോ രണ്ടോ മണിക്കൂറുകള്‍ മാത്രമാണ്
കാബിനില്‍ ഇരുന്ന് രോഗികളെ പരിശോധിക്കാറുള്ളൂവെന്നും പരാതിയുണ്ട്. ഡോക്ടര്‍മാര്‍ കാബിനില്‍ ഇല്ലാത്ത കാര്യം തിരക്കുമ്പോള്‍ ജീവനക്കാര്‍ വ്യക്തമായ മറുപടി നല്‍കാറുമില്ല. അവധിയുള്ള ഡോക്ടര്‍മാര്‍ എന്ന് വരുമെന്നതിലും കൃത്യമായ വിവരം ലഭിക്കാറില്ല. പല ഡോക്ടര്‍മാരും ഹാജര്‍ രേഖപ്പെടുത്താനും ശമ്പളം മാത്രം ലക്ഷ്യമിട്ടും വരുന്നവരാണെന്ന് ആശുപത്രി വികസന സമിതിയംഗങ്ങള്‍ ആരോപിച്ചു. രോഗികളോടോ സമൂഹത്തോടോ യാതൊരു പ്രതിബദ്ധതയും ഇവര്‍ക്കില്ലെന്നും ആക്ഷേപമുണ്ട്. ചികിത്സാ സംബന്ധമായ കാര്യങ്ങള്‍ പോലും അന്വേഷിച്ചാല്‍ ധിക്കാരത്തോടെയും അഹങ്കാരത്തിലുമാണ് പല ഡോക്ടര്‍മാരും ജീവനക്കാരും മറുപടി നല്‍കുകയെന്ന പരാതി കാലങ്ങളായുണ്ട്. ആശുപത്രിയിലെ വികസന പ്രവര്‍ത്തനങ്ങളുള്‍പ്പെടെ പല കാര്യങ്ങള്‍ക്കുമെന്ന പേരില്‍ പണം യഥേഷ്ടമാണ് ചിലവഴിക്കുന്നത്. ഇതുമായി ബന്ധപ്പെട്ട് പല കാര്യങ്ങളിലും വ്യക്തത കുറവുണ്ടെന്നും ആക്ഷേപമുണ്ട്. എച്ച്.എം.സി ഫണ്ടില്‍ നിന്നും ആശുപത്രിയില്‍ ചിലവഴിച്ചതായി പറയുന്ന ഒരു കോടിയിലധികം രൂപയുടെ കണക്ക്് വിജിലസിന്റെ പരിഗണയിലാണ്. കേരളത്തില്‍ ജനറല്‍ ആശുപത്രികള്‍ ഇല്ലാത്ത ഏക ജില്ലയാണ് ഇടുക്കി. തൊടുപുഴയില്‍ പ്രവര്‍ത്തിക്കുന്ന ജില്ലാ ആശുപത്രി എന്നത് തൊടുപുഴ താലൂക്കിലെ ഏറ്റവും വലിയ സര്‍ക്കാര്‍ ആശുപത്രിയാണ്. ഇതുകൊണ്ട് തന്നെ ജനങ്ങളുടെ ഏക പ്രതീക്ഷയുമാണ്. സ്വകാര്യ ആശുപത്രികള്‍ എല്ലാം തന്നെ ഭീമമായ രീതിയില്‍ ചികിത്സാ ചാര്‍ജ്ജുകള്‍ വര്‍ദ്ധിപ്പിച്ചിരിക്കുകയാണ്. സാധാരണക്കാരായ രോഗികള്‍ക്ക് മറ്റൊരാശ്രയം തൊടുപുഴ താലൂക്കില്‍ വേറെയില്ല. ചെറിയൊരു അസുഖമായി ചെന്നാല്‍ പോലും കോട്ടയം മെഡിക്കല്‍ കോളേജിലേക്ക് റഫര്‍ ചെയ്യുന്നതാണ് ഈ ആശുപത്രിയിലെ രീതി. കോടികള്‍ ശമ്പളത്തിനായി ചിലവഴിക്കുമ്പോള്‍ ആര്‍ക്കും നിയന്ത്രണമില്ലാത്ത ആശുപത്രിയായി മാറിയിരിക്കുകയാണ് തൊടുപുഴയില്‍ പ്രവര്‍ത്തിക്കുന്ന ജില്ലാ ആശുപത്രിയെന്നാണ് ആരോപണം. ഡോക്ടര്‍മാര്‍ ഉള്‍പ്പെടെയുള്ളവര്‍ കൃത്യ സമയത്ത് ഹാജരാകുകയും ഡ്യൂട്ടി പൂര്‍ത്തിയാക്കുകയും ചെയ്യുന്നുണ്ടോയെന്ന് കര്‍ശന പരിശോധന നടത്തണമെന്ന ആവശ്യവും ശക്തമാണ്.
