മുട്ടം: അമിത വേഗത്തില്‍ എത്തിയ കാര്‍ ഓട്ടോറിക്ഷയുടെ പിറകില്‍ ഇടിച്ച് ഓട്ടോ ഡ്രൈവര്‍ക്ക് പരിക്ക്. അറക്കുളം സ്വദേശി പുത്തന്‍പുരക്കല്‍ ശിവകുമാറി(56)നാണ് പരിക്കേറ്റത്. തലയ്ക്ക് പരിക്കേറ്റ ശിവകുമാറിനെ തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇടിയുടെ ആഘാതത്തില്‍ തെറിച്ചു വീണ ഓട്ടോ സമീപത്ത് നിര്‍ത്തിയിട്ടിരുന്ന മറ്റൊരു കാറിലേക്കാണ് ചെന്ന് പതിച്ചത്.
മുട്ടം ഭാഗത്ത് നിന്നും മൂലമറ്റം റൂട്ടില്‍ സഞ്ചരിക്കുകയായിരുന്നു ഇരു വാഹനങ്ങളും. ഇന്നലെ വൈകുന്നേരം 5.30 മണിയോടെ ശങ്കരപ്പള്ളിക്ക് സമീപമാണ് അപകടം. കാറിലെത്തിയവര്‍ മദ്യപിച്ചിരുന്നതായി പോലീസ് പറഞ്ഞു. മൂന്ന് വാഹനങ്ങള്‍ക്കും സാരമായ കേടുപാടുകള്‍ സംഭവിച്ചു. മുട്ടം ശങ്കരപ്പള്ളി റൂട്ടില്‍ അപകടങ്ങളും അമിത വേഗവും നിത്യ സംഭവമാണ്. നിരവധി സൂചന ബോര്‍ഡുകളും വേഗ നിയന്ത്രണ സംവിധാനങ്ങളും ഉണ്ടെങ്കിലും അവയൊന്നും പാലിക്കപ്പെടുന്നില്ല. ഈ മേഖലയില്‍ പോലീസ് പെട്രോളിംഗ് ശക്തമാക്കണമെന്ന് പ്രദേശവാസികള്‍ ആവശ്യപ്പെട്ടു.
