തൊടുപുഴ: വി.എസിനെ കുറിച്ച് ഓരോ ദേശത്തെ ജനവിഭാഗങ്ങള്‍ക്കും പറയാനുള്ളത് വ്യത്യസ്ഥങ്ങളായ കഥകളും അനുഭവങ്ങളുമാണ്. അത്തരത്തിലൊന്നാണ് ട്രൈബല്‍ മേഖലയായ ഇടുക്കി പൂമാലയില്‍ നിന്നുള്ളത്. ഒരു പ്രദേശത്തെ ആദിവാസികളെ ഒന്നാകെ വൃക്ക തട്ടിപ്പിനിരയാക്കാനുള്ള ഗൂഢ നീക്കത്തെയാണ് വി.എസിന്റെ സമയോചിതമായ ഇടപെടലിലൂടെ ഇല്ലാതാക്കിയത്. വി.എസ് ഓര്‍മ്മയാകുന്നതിന്റെ പശ്ചാത്തലത്തില്‍ 2002ല്‍ നടന്ന ആ സംഭവത്തെ ഓര്‍ത്തെടുക്കുകയാണ് വൃക്ക തട്ടിപ്പിനിരയായ ആളുകളും ഇവിടുത്തെ പൊതു പ്രവര്‍ത്തകരും.
കോഴിക്കോട് കേന്ദ്രീകരിച്ചുള്ള സംഘമാണ് വൃക്ക ദാനം ചെയ്യുന്നവര്‍ക്ക് അഞ്ചും പത്തും ലക്ഷം രൂപാ വാഗ്ദാനം ചെയ്ത് തട്ടിപ്പ് നടത്തിയത്. വൃക്ക നല്‍കി വന്‍ തുക ലഭിച്ച പ്രദേശവാസികളില്‍ ചിലരെ ഇടനിലക്കാരുമാക്കി. നാട്ടിലെങ്ങും സാമ്പത്തിക പ്രതിസന്ധി രൂക്ഷമായ സമയമായിരുന്നതിനാല്‍ ആദിവാസി വിഭാഗത്തില്‍പ്പെട്ട നിരവധിയാളുകള്‍ ഈ ചതിക്കുഴിയില്‍ വീഴുകയും ചെയ്തു. ഇതിന്റെ തുടര്‍ച്ചയായി കോഴിക്കോടുള്ള സ്വകാര്യ ആശുപത്രിയില്‍ എത്തി ശസ്ത്രക്രിയയ്ക്ക് വിധേയരായി. എന്നാല്‍ വാഗ്ദാനം വിശ്വസിച്ച് വൃക്ക നല്‍കിയ പലര്‍ക്കും പണം ലഭിച്ചില്ല.
മിക്കവര്‍ക്കും യാത്രാ ചിലവിനുള്ള പണം മാത്രമാണ് ലഭിച്ചത്. ഇവരില്‍ ചിലര്‍ ചെറിയ തോതില്‍ പരാതിയൊക്കെ ഉയര്‍ത്തിയെങ്കിലും ആദിവാസി വിഭാഗത്തില്‍ ഉള്ളവരായതിനാല്‍ സംഭവം ഒതുങ്ങിപ്പോയിക്കൊള്ളുമെന്ന് തട്ടിപ്പ് സംഘം ഉറപ്പിച്ചു. ഇവര്‍ വീണ്ടും കൂടുതല്‍ ആളുകളെ കോഴിക്കോടിന് കൊണ്ടുപോകാനുള്ള ശ്രമങ്ങള്‍ തുടര്‍ന്നു.
വി.എസിന്റെ ശ്രദ്ധ നാടിന് രക്ഷയായി
അന്നത്തെ പ്രതിപക്ഷ നേതാവായിരുന്ന വി.എസ് അച്ചുതാനന്ദന്‍ തട്ടിപ്പ് വാര്‍ത്തയറിഞ്ഞ് അക്കാലത്ത് വാഹന സൗകര്യം പോലും ഇല്ലാതിരുന്ന മലോയോര മേഖലയായ മേത്തൊട്ടിയിലെത്തി. തട്ടിപ്പിനിരയായവരുടെ വീടുകള്‍ സന്ദര്‍ശിച്ച് കാര്യങ്ങള്‍ ചേദിച്ചറിഞ്ഞു. ദരിദ്ര ചുറ്റുപാടുള്ളവരുടെ ദൗര്‍ബല്യം ചൂഷണം ചെയ്താണ് വൃക്ക തട്ടിപ്പ് നടത്തിയിരുന്നതെന്ന് വി.എസ് മനസിലാക്കി. വൃക്ക തട്ടിപ്പിനിരയായവരുടെ വീടുകള്‍ സന്ദര്‍ശിച്ച് തിരികെ വന്ന വി.എസ് പൂമാല സാമിക്കവലയില്‍ പൊതു യോഗം നടത്തി. വി.എസിന്റെ പ്രസംഗത്തോടെയാണ് കാര്യത്തിന്റെ ഗൗരവം പൊതു സമൂഹത്തില്‍ ചര്‍ച്ചയാകുന്നതും ആരോഗ്യ വകുപ്പും പോലീസും ഉള്‍പ്പെടെ സര്‍ക്കാര്‍ സംവീധാനങ്ങള്‍ ഉണര്‍ന്ന് പ്രവര്‍ത്തിക്കാന്‍ തുടങ്ങിയതും. വൃക്ക നല്‍കിയവരില്‍ ചിലര്‍ പിന്നീട് വിവിധ തരത്തിലുള്ള ശാരീരിക ബുദ്ധിമുട്ട് നേരിടുകയും അകാലത്തില്‍ മരണമടയുകയും ചെയ്തു.
കല്ലും കയറ്റിറക്കവും താണ്ടി വി.എസ് എത്തി; ശരീരത്ത് വടുക്കളുമായി ജീവിക്കുന്നവര്‍ക്ക് ആശ്വാസമാകാന്‍
വി.എസ് ഇടപെട്ടതുകൊണ്ടാണ് കൂടുതല്‍ പേര്‍ വഞ്ചിതരാകാതിരുന്നതെന്ന് തട്ടിപ്പിനിരയായ മേത്തൊട്ടി പതിക്കല്‍ മോഹനന് പറഞ്ഞു. റേഷനറരി വാങ്ങാന്‍ പോലും പണമില്ലാതിരുന്ന മോഹനന് രണ്ടര ലക്ഷം രൂപയാണ് വാഗ്ദാനം ചെയ്തത്. എന്നാല്‍ വൃക്ക നല്‍കിയ മോഹനന് ആകെ ലഭിച്ചത് അമ്പതിനായിരം രൂപ മാത്രം. ഇതിനെതിരെ നിമവഴി തേടിയെങ്കിലും തനിക്ക് നീതി ലഭിച്ചില്ലെന്ന് മോഹനന് പറഞ്ഞു. അന്ന് ശരീരത്ത് നടത്തിയ ശസ്ത്രക്രിയയുടെ വടുക്കളുമായാണ് മോഹനന് ഇന്നും ജീവിക്കുന്നത്. പൂമാല ടൗണിലെത്തിയ വി.എസിനെ കല്ലും മണ്ണും നിറഞ്ഞ വഴിയിലൂടെ മേത്തൊട്ടിക്ക് പോകാനുള്ള ഏക ആശ്രയമായിരുന്ന ജീപ്പിലായിരുന്നു കൊണ്ടുപോയത്. കയറ്റവും ഇറക്കവുമുള്ള റോഡില്‍ പലകുറി ജീപ്പ് വഴുതി പിന്നോട്ട് പോയപ്പോള്‍ നാട്ടുകാര്‍ ചേര്‍ന്ന് തള്ളി കയറ്റുകയായിരുന്നുവെന്ന് അന്നത്തെ വഴികാട്ടിയും ഇപ്പോഴത്തെ സി.പി.എം പൂമാല ലോക്കല്‍ കമ്മിറ്റിയംഗവുമായ എം.ഇ നാരായണന്‍ ഓര്‍ക്കുന്നു.
