മൂന്നാർ : പി പളനിവേലിന്റെ മരണത്തോട് കൂടി മൂന്നാറിലെ തോട്ടം തൊഴിലാളി ജനതയ്ക്ക് നഷ്ടമായത് തൊഴിലാളിയായിരുന്ന ഒരു തൊഴിലാളി നേതാവിനെയാണ്. മൂന്നാർ തെന്മല എസ്റ്റേറ്റ് ന്യൂ ഡിവിഷനിലെ തൊഴിലാളി ദമ്പതികളുടെ മകനായി ആണ് പി പളനിവേൽ ജനിച്ചത്. എട്ടാം ക്ലാസ് വിദ്യാഭ്യാസം പൂർത്തിയാക്കിയപ്പോൾ കുടുംബത്തിന്റെ കഷ്ടത ഉൾക്കൊണ്ട് തൊഴിലാളിയായി മാറുകയായിരുന്നു. പിന്നീട് ഇതേ സ്റ്റേറ്റിൽ തോട്ടം തൊഴിലാളിയായി അദ്ദേഹം സേവനം ആരംഭിച്ചു. ഇവിടെവച്ചാണ് പി പളനിവേൽ എന്ന തൊഴിലാളി നേതാവ് ജന്മം കൊണ്ടത്. പിന്നീടങ്ങോട്ട് ദേവികുളത്തെ തൊഴിലാളികൾക്ക് വേണ്ടിയായി ജീവിതം.
മൂന്നാറിലെ പല ഐതിഹാസിക സമരങ്ങളിലും മുഖ്യപങ്കുവഹിച്ച പ്രധാനിയാണ് പി പളനിവേൽ. മൂന്നാറിലെ സാധാരണക്കാരായ തോട്ടം തൊഴിലാളികൾക്ക് സ്വന്തമായി ഭൂമി ലഭിക്കണമെന്ന ആവശ്യത്തിന് പിന്നിൽ നിരന്തര പോരാട്ടങ്ങളുമായി ഇറങ്ങിയിരുന്ന പളനിവേൽ കുറ്റിയാർവാലിയിൽ തൊഴിലാളികൾക്ക് ഭൂമി ലഭിച്ച സമരമാർഗങ്ങളിലും മുൻപന്തിയിൽ ആയിരുന്നു. എന്നാൽ ഇത് പൂർണമായിരുന്നില്ലെന്നും മുഴുവൻ തൊഴിലാളികൾക്കും ഭൂമി ലഭിക്കണമെന്ന് ആവശ്യപ്പെട്ടുള്ള സമരം തുടരെയായിരുന്നു രോഗം പിടികൂടിയത്. രോഗം ശരീരം തളർത്തിയപ്പോഴും തൊഴിലാളികൾക്ക് ഒപ്പം നിൽക്കാനുള്ള മനസ്സ് പോയിരുന്നില്ല. ഇതാണ് പി പളനിവേലിനെ വ്യത്യസ്തനാക്കുന്നത്.
ചെറിയ പ്രായത്തിൽ തന്നെ മൂന്നാർ പഞ്ചായത്തിലേക്ക് മത്സരിക്കുകയും ജനപ്രതിനിധി ആവുകയും ചെയ്തു. പിന്നീട് ദേവികുളം ബ്ലോക്ക് പഞ്ചായത്ത് പ്രസിഡണ്ടായിരിക്കുന്ന കാലഘട്ടത്തിലാണ് ബ്ലോക്ക് പഞ്ചായത്തിന് സ്വന്തമായി ഒരു ആസ്ഥാനമന്ദിരം പണികഴിപ്പിച്ചത്. പിന്നീട് ജില്ലാ പഞ്ചായത്ത് അംഗവും പ്രസിഡന്റുമായി. ഈ കാലയളവിൽ ദേവികുളം ജനതയ്ക്ക് വേണ്ടി നിരന്തരം പോരാടിയ ആളായിരുന്നു പളനിവേൽ. പൊതുരംഗങ്ങളിൽ സജീവമായി നിൽക്കുകയും അതേസമയം തൊഴിലാളി പോരാട്ടങ്ങളിൽ, തൊഴിലാളികൾക്ക് അർഹമായ ശമ്പളവും ഡിഎയും അടക്കം വാങ്ങിയെടുക്കുന്ന ചർച്ചകളിലും തനിക്കൊപ്പം ഉണ്ടായിരുന്ന ജനറൽ സെക്രട്ടറിയുടെ നഷ്ടം മൂന്നാറിനും തങ്ങൾക്കും നികത്താൻ ആകുന്നതല്ലെന്ന് ദേവികുളം എസ്റ്റേറ്റ് വർക്കേഴ്സ് യൂണിയൻ പ്രസിഡന്റ് എം വൈ ഔസേപ്പ് പറയുന്നു.
