മൂന്നാർ : 1924 ജൂലൈ മാസം പതിനഞ്ചാം തീയതി പുലർച്ചെ പച്ച വിരിച്ച തേയില തോട്ടങ്ങൾക്ക് നടുവിലെ തൊഴിലാളി ലയങ്ങളിൽ നിന്നും തേയില നുള്ളുന്നതിനായി തൊഴിലാളികൾ ഇറങ്ങി. മഴക്കാലമാണ് അതിനുള്ള മുൻകരുതലുകൾ എടുത്തിട്ടുമുണ്ട്. കുറച്ച് ആശ്വാസം ഉണ്ടായിരുന്നത് മൂന്നാറിന്റെ കിഴക്ക് ഭാഗത്തുള്ള എസ്റ്റേറ്റുകളിൽ ആയിരുന്നു. കുണ്ടള, എല്ലപ്പെട്ടി, ചെണ്ടുവരൈ, ചുറ്റുവാരൈ എസ്റ്റേറ്റുകളിൽ പൊതുവേ മഴ കുറവാണ് ലഭിച്ചിരുന്നത്. എന്നാൽ പൊടുന്നനെ മാനം ഇരുണ്ടു കൂടി, എല്ലാ കാലങ്ങളിലും കുറവ് മഴ ലഭിച്ചിരുന്ന കിഴക്കൻ മേഖലയിൽ മഴ നിറഞ്ഞാടി. രാവിലെ 10 മണിക്ക് തന്നെ കൊളുന്ത് നുള്ളാൻ കഴിയാതെ തൊഴിലാളികൾ വീണ്ടും ലയങ്ങളിലേക്ക് മടങ്ങിപ്പോയി. ഇതാണ് മൂന്നാറിന്റെ മുഖം തന്നെ മാറ്റിയ 99ലെ വെള്ളപ്പൊക്കത്തിന്റെ തുടക്കം.
സംസ്ഥാനത്ത് ഒട്ടാകെ കർക്കിടകം ഒന്നിനാണ് മഴ കനത്തത്. നാലിന് അത് പ്രളയമായി മാറിയെന്നും ചരിത്രം പറയുന്നു. എന്നാൽ മൂന്നാറിന്റെ കിഴക്കൻ മേഖലയിൽ കർക്കിടകം പിറന്നത് തലേന്ന് അതായത് മിഥുനം 32ന് (1924 ജൂലൈ 15ന്).
മഴ കനത്ത് രണ്ടു ദിവസങ്ങൾക്കുള്ളിൽ പലസ്ഥലങ്ങളിലും ഉരുൾപൊട്ടലുകളും മണ്ണിടിച്ചിലുകളും ഉണ്ടായി.
ഇങ്ങനെ ഇടിഞ്ഞെത്തിയ കല്ലും മണ്ണും പാറയും മരങ്ങളും എല്ലാം മാട്ടുപ്പെട്ടിയിൽ രണ്ട് മലകൾക്ക് നടുവിലായി അടിഞ്ഞുകൂടി കൃത്രിമ അണക്കെട്ടും മാട്ടുപ്പെട്ടി തടാകവും രൂപപ്പെട്ടു. അതോടെ അന്നത്തെ മാർക്കറ്റും കടകളും തൊഴിലാളി ലയങ്ങളും മുങ്ങിപ്പോയി. മാട്ടുപ്പെട്ടി തേയില ഫാക്ടറിക്ക് ചുറ്റും പുഴയെന്ന പോലെ വെള്ളം എത്തി. ഇത്രയും ജലത്തെ താങ്ങിനിർത്താൻ പ്രകൃതി തന്നെ ഉണ്ടാക്കിയ തടയണയ്ക്ക് കഴിഞ്ഞില്ല, മഴ കനത്തു..തടയണ പൊട്ടി.. ബ്രിട്ടീഷുകാർ സ്വപ്നഭൂമിയായി പണികഴിപ്പിച്ച മൂന്നാർ പട്ടണം ആ ജല ഭീകരതയ്ക്ക് മുന്നിൽ തകർന്നടിയുകയായിരുന്നു. ജൂലൈ 18ന് വൈകിട്ട് അഞ്ചരയോട് കൂടി മൂന്നാർ മരക്കാർ ബിൽഡിംഗ് വെള്ളത്തിലായി. ഇപ്പോഴത്തെ പഴയ മൂന്നാറിലുള്ള തേയില ഫാക്ടറിയിലെ വൈദ്യുതി ബന്ധം വിച്ഛേദിച്ചത് കൊണ്ട് വൻ ദുരന്തം ഒഴിവായെന്നും ചരിത്രം ഓർമിപ്പിക്കുന്നു. മൂന്നാർ സപ്ലൈ അസോസിയേഷൻ എന്ന എംഎസ്എ നിമിഷങ്ങൾക്കുള്ളിൽ വെള്ളം മൂടാൻ പോകുന്നു എന്നറിഞ്ഞ മാനേജറും തൊഴിലാളികളും കയ്യിൽ കിട്ടിയ സാധനങ്ങളുമായി കെട്ടിടത്തിന് മുകളിൽ കയറി നിന്നാണ് ജീവൻ രക്ഷിച്ചത്. കനത്ത മഴയിൽ മാട്ടുപ്പെട്ടിക്ക് പുറമേ പെരിയവരൈ ഭാഗത്തും കൃത്രിമ തടാകം രൂപപ്പെട്ടു. ഈ ജലം കൂടി ഒഴുകിയെത്തിയപ്പോൾ ഇന്നത്തെ ഹെഡ് വർക്സ് ഡാം സ്ഥിതി ചെയ്യുന്ന സ്ഥലത്തും മറ്റൊരു കൃത്രിമ തടയണ രൂപപ്പെട്ടു.
ഈ തടയണയ്ക്കും ജലപ്രഭാവത്തെ തടഞ്ഞുനിർത്താൻ ആയില്ല. ഇതോടെ പള്ളിവാസൽ വരെയുള്ള ഭാഗങ്ങളിലെ നിരവധി ഭാഗങ്ങൾ ചരിത്രത്തിന്റെ ഭാഗമായി. ഈ പ്രളയത്തിലും മണ്ണിടിച്ചിലിലും ആണ് ഇന്ന് നമ്മൾ കണ്ട് ആസ്വദിക്കുന്ന ആറ്റുകാട് വെള്ളച്ചാട്ടം ഉണ്ടായത്.
അന്നത്തെ കണ്ണൻ ദേവൻ കമ്പനിയുടെ മാനേജർ ആയിരുന്ന എ എഫ് എഫ് മാർട്ടിൻ സായിപ്പിന്റെ ഭാര്യ വയലറ്റ് മാർട്ടിൻ മദാമ്മയുടെ 1924 സൈക്ലോൺ എന്ന വിവരണത്തിൽ മൂന്നാർ പ്രളയത്തിന്റെ ദൃശ്യങ്ങൾ അതുപോലെ വ്യക്തമാണ്.
എത്രപേർ മരിച്ചുവെന്നോ എത്ര പേർ ഒഴുകിപ്പോയെന്നോ കണക്കുകൾ ലഭ്യമായിരുന്നില്ല. കാട്ടുമൃഗങ്ങളോടും പകർച്ചവ്യാധികളോടും പടവെട്ടി മണ്ണിൽ പൊന്നു വിളയിച്ച നിരവധി പേർ ജീവനറ്റ ശരീരങ്ങളായി പെരിയാറിലൂടെ ഒഴുകി അറബിക്കടലിൽ എത്തിയെന്ന വരികൾ ഇപ്പോഴും മൂന്നാറുകാരുടെ കണ്ണുനിറയ്ക്കും.
സമുദ്രനിരപ്പിൽ നിന്നും 6000 അടി ഉയരത്തിലുള്ള മൂന്നാർ പട്ടണത്തെ മൂന്നാഴ്ച കൊണ്ട് 480 സെന്റീമീറ്റർ കണക്കിൽ പെയ്ത മഴ തകർത്തെറിഞ്ഞപ്പോൾ, ആ പ്രളയം മായിച്ചു കളഞ്ഞത് അതിരുകളും അടയാളങ്ങളും മാത്രമല്ല, ചരിത്രത്തെ കൂടിയായിരുന്നു. കേരളത്തിന്റെ പല പ്രധാന ചരിത്ര രേഖകളും നശിച്ചു പോയത് ഈ പ്രളയ കാലത്താണെന്നും പറയപ്പെടുന്നു.
ഓർമ്മയായി തീവണ്ടിയും
മൂന്നാറിൽ അക്കാലത്ത് ഒരു തീവണ്ടി യാത്രയുണ്ടായിരുന്നു എന്ന് പറഞ്ഞാൽ പലരും ഇപ്പോഴും അതിശയിക്കും. മൂന്നാർ സ്റ്റേഷൻ തീവണ്ടി പാതയായിരുന്ന ഗുണ്ടല വാലി റെയിൽവേ സ്റ്റേഷൻ എന്നറിയപ്പെട്ടിരുന്ന നാനോറയിൽ പാതയും 99 ലെ വെള്ളപ്പൊക്കത്തിൽ ചരിത്രത്തിലെ ഓർമ്മയായി മാറി. പിന്നീട് ഈ തകർന്ന റെയിൽവേ പാത പുനർ നിർമിക്കാൻ കമ്പനിയും ശ്രമിച്ചില്ല. പകരം ചരക്കുകൾ മാറ്റുന്നതിനായി റോപ്പ് വേ കൊണ്ടുവന്നു. ഇതും ഇന്ന് മൂന്നാറിന് ഓർമ്മയാണ്. വെസ്റ്റേൺ ഔട്ട്ലെറ്റ് എന്ന് ഇംഗ്ലീഷുകാർ പേരിട്ടു വിളിച്ച പഴയ ആലുവ മൂന്നാർ റോഡും കരിന്തിരി മലയിടിഞ്ഞ് ഓർമ്മയായി മാറി.
മൂന്നാറിന്റെ പുനർജന്മം
വന്യമൃഗങ്ങളോടും പകർച്ചവ്യാധികളോടും പടപട്ടി മണ്ണിൽ പൊന്നു വിളയിച്ച കുടിയേറ്റ കർഷകന്റെ മനസ്സ് ആ പ്രളയത്തിനു മുന്നിലും തോറ്റു കൊടുക്കാൻ തയ്യാറായിരുന്നില്ല. യുദ്ധകാല അടിസ്ഥാനത്തിൽ മൂന്നാർ പട്ടണം പുനർ നിർമ്മിക്കുക എന്നതായിരുന്നു ലക്ഷ്യം. ശ്രീലങ്കയിൽ വേരുകളുള്ള എച്ച് ഓ എൽ മരക്കാർ മൂന്നാർ റെയിൽവേയുടെ ഭാഗമായി മൂന്നാറിൽ എത്തിയിരുന്നു. ഇദ്ദേഹത്തിന്റെ നേതൃത്വത്തിലാണ് മൂന്നാറിന്റെ പുനർജന്മം ഉണ്ടായതെന്നും ചരിത്രം പറയുന്നു.
ഇനിയൊരു പ്രളയം മൂന്നാറിൽ ഉണ്ടായാലും കടകളെ ബാധിക്കരുത് എന്ന ചിന്തയിലാണത്രേ ഇപ്പോൾ നമ്മൾ കാണുന്ന മൂന്നാർ ബസാർ ഉയരത്തിൽ പണികഴിപ്പിച്ചത്.
ആശ്രയമായി ദേവാലയവും.
1924 -ൽ മൂന്നാറിനെ തകർത്തെറിഞ്ഞ വെള്ളപ്പൊക്കത്തിൽ നിന്നും രക്ഷനേടാനായി ജനം ആശ്രയിച്ചതും ദുരിതാശ്വാസ കേന്ദ്രമായ് നിലകൊണ്ടതും മൂന്നാർ കാർമൽ മലയിലെ കത്തോലിക്ക ദേവാലയമായ മൗണ്ട് കാർമ്മലാണ്. അന്ന് നിറുത്താതെ പെയ്ത മഴ യിൽ തടയണ തകർന്ന് മലമുകളിലെ പട്ടണം വെള്ളത്തിൽ മുങ്ങിയപ്പോൾ ഉയർന്ന് വന്ന വെള്ളം വിശുദ്ധ അന്തോണീസിന്റെ കുരിശടിയിലെ പുണ്യാളൻ്റെ കാലിൽ തൊട്ട് മലവെള്ളപ്പാച്ചിൽ പിൻവാങ്ങിയെന്നും ചരിത്രം രേഖപ്പെടുത്തുന്നു.
99-ലെ (1924) വെള്ളപ്പൊക്കത്തിൽ നിന്നുള്ള രക്ഷയ്ക്കു കാരണഭൂതനായ വിശുദ്ധ അന്തോണീസിനെ ജാതിമതഭേദമന്യേ മൂന്നാറിൻ്റെ പഴയ-പുതിയ തലമുറകൾ തിരികൾ കത്തിച്ചു വണങ്ങുന്ന ഇപ്പോഴും മൂന്നാറിൽ സജീവമാണ്.
ഇപ്പോഴും മഴ കനക്കുമ്പോൾ ദുരിതാശ്വാസ ക്യാമ്പായി മാറുന്നതും ഇതേ ദേവാലയം തന്നെയാണെന്നതും അതിനൊരു കാരണമാകാം.
