തൊടുപുഴ: ദേശീയപാത 85ലെ നിര്‍മ്മാണ നിരോധനവുമായി ബന്ധപ്പെട്ട വിഷയത്തില്‍ മുഖ്യമന്ത്രി നിലപാട് വ്യക്തമാക്കണമെന്ന് ഇടുക്കി എം.പി ഡീന്‍ കുര്യാക്കോസ്. നിര്‍മ്മാണ നിരോധനം ഏര്‍പ്പെടുത്തിയ ഹൈക്കോടതി വിധിക്ക് പിന്നില്‍ സംസ്ഥാന സര്‍ക്കാരിന്റെ ഉത്തരവാദിത്വ രാഹിത്യമാണ്. നിലവില്‍ നേര്യമംഗലം മുതല്‍ വാളറ വരെയുള്ള നിര്‍മാണമാണ് നിരോധിച്ചിരിക്കുന്നത്. ഈ പ്രദേശം വനമാണെന്ന് ഹൈക്കോടതിയില്‍ നല്‍കിയ സത്യവാങ്മൂലത്തിലൂടെ സര്‍ക്കാര്‍ തന്നെ സ്ഥാപിച്ചിരിക്കുകയാണ്. ചീഫ് സെക്രട്ടറിയുടെ യോഗത്തിനും തീരുമാനത്തിനും എതിരായി അഡീഷണല്‍ ചീഫ് സെക്രട്ടറിയാണ് ഹൈക്കോടതിയില്‍ സത്യവാങ് മൂലം സമര്‍പ്പിച്ചത്.
ദേശീയ പാതയുടെ നിര്‍മാണം തടഞ്ഞുകൊണ്ടുള്ള ഇക്കാല ഉത്തരവിന് ശേഷം തങ്ങളുടെ ഭാഗത്ത് വീഴ്ച്ച സംഭവിച്ചിട്ടില്ലായെന്ന് വരുത്തിത്തീര്‍ക്കാനാണ് സര്‍ക്കാര്‍ ശ്രമിക്കുന്നത്. ഉദ്യോഗസ്ഥര്‍ക്കൊ സര്‍ക്കാരിനൊ ആര്‍ക്കാണ് പിഴവ് സംഭവിച്ചതെന്ന് വ്യക്തമാക്കണം. വിധിയെ സംബന്ധിച്ച കാര്യങ്ങള്‍ മനസിലാക്കാതെ മന്ത്രിമാരായ റോഷി അഗസ്റ്റിനും, എ.കെ. ശശീന്ദ്രനും തെറ്റു ചെയ്ത ഉദ്യോഗസ്ഥരെ ന്യായീകരിക്കുകയാണ്. ചീഫ് സെക്രട്ടറി തലത്തില്‍ കൈക്കൊണ്ട തീരുമാനം അട്ടിമറിച്ചതില്‍ മന്ത്രി മാര്‍ക്കോ ഉന്നത ഉദ്യോഗസ്ഥര്‍ക്കോ പങ്കില്ലെങ്കില്‍, തെറ്റ് ചെയ്തവര്‍ക്കെതിരെ നടപടി സ്വീകരിക്കണം. അതിന് കഴിഞ്ഞില്ലെങ്കില്‍ രാജിവച്ചൊഴിയണം. മന്ത്രിമാര്‍ ഉദ്യോഗസ്ഥരെ ന്യായീകരിച്ച് ജനാധിപത്യത്തിന്റെ വില കളയുകയാണ്.
അഡീഷണല്‍ ചീഫ് സെക്രട്ടറി കെ.ആര്‍. ജ്യാതിലാല്‍ ഹൈക്കോടതിയില്‍ സമര്‍പ്പിച്ച സത്യവാങ്മൂലം, ചീഫ് സെക്രട്ടറിക്കു വേണ്ടിയെന്ന് പറഞ്ഞ് നല്‍കിയപ്പോള്‍ സര്‍ക്കാരിന്റെ അഭിപ്രായമായി അതു മാറി. സത്യവാങ് മൂലത്തിലെ പരാമര്‍ശങ്ങള്‍ വസ്തുതകള്‍ക്ക് നിരക്കാത്തതും, 2024 ഓഗസ്റ്റില്‍ ചീഫ് സെക്രട്ടറി വിളിച്ച് ചേര്‍ത്ത യോഗത്തില്‍ കൈക്കൊണ്ട തീരുമാനത്തിന് ഘടകവിരുദ്ധമായ കാര്യങ്ങളുമായിരുന്നു. ഉദ്യോഗസ്ഥര്‍ക്ക് ഉണ്ടായ പിഴവാണ് നിര്‍മാണം നിര്‍ത്തി വെയ്പ്പിക്കാന്‍ കാരണം. അവസരം മുതലാക്കിയ ഫോറസ്റ്റ് ഉദ്യോഗസ്ഥര്‍, ഹൈവേ അതോറിറ്റി ആവശ്യപ്പെട്ട മേഖലക്ക് പകരമായി 38 ലക്ഷം രൂപ ആവശ്യപ്പെട്ടതിന് പുറമെ 4.60 കോടി രൂപ മനുഷ്യ വന്യജീവി പ്രശ്‌നം പരിഹരിക്കാന്‍ എന്ന പേരില്‍ ആവശ്യപ്പെട്ടു. പദ്ധതി മുടങ്ങാതിരിക്കാന്‍ ഹൈവേ അതോറിറ്റി 5.5 കോടി രൂപ നല്‍കി. ഗുണ്ടാ പിരിവ് നടത്തുന്ന രീതിയില്‍ വാങ്ങിയ ഈ പണം കൊണ്ട് എന്ത് പദ്ധതിയാണ് വന്യ ജീവി പ്രശ്‌നം പരിഹരിക്കാനായി നടപ്പാക്കിയത്.
ഗൂഢാലോചന നടത്തി നാടിനെ വഞ്ചിച്ച സര്‍ക്കാരിനെതിരെ പ്രതിഷേധം ഉയരുകയാണ്. തെറ്റു ചെയ്ത ഉദ്യോഗസ്ഥര്‍ക്കെതിരെ നടപടി സ്വീകരിക്കണം. ദേശീയപാതയിലെ നിര്‍മ്മാണ പ്രതിസന്ധിയില്‍ അടിയന്തരമായി മുഖ്യമന്ത്രിയും സര്‍ക്കാരും ഇടപെടണമെന്നും ഡീന്‍ കുര്യാക്കോസും പൊതുപ്രവര്‍ത്തകനായ സിജുമോന്‍ ഫ്രാന്‍സിസും പത്രസമ്മേളനത്തില്‍ ആവശ്യപ്പെട്ടു.
