തൊടുപുഴ: ജില്ലാ ആശുപത്രിയിലെ ഡോക്ടര്‍മാരുടേയും സര്‍ജന്റെയും ചികിത്സാ പിഴവ് മൂലം കാലിലുണ്ടായ മുറിവിനുള്ളില്‍ ലോഹക്കഷണവുമായി യുവാവ് നടന്നത് രണ്ടാഴ്ച. ഇതിന് പുറമേ മുറിവില്‍ പഴുപ്പ് ബാധിച്ച് കാല് നിലത്ത് വയ്ക്കാന്‍ വയ്യാത്ത അവസ്ഥയിലുമായി. ഒടുക്കം ജില്ലാ ആശുപത്രിയിലെ ചികിത്സാ പിഴവ് കണ്ടെത്തിയതാകട്ടെ പ്രാഥമികാരോഗ്യ കേന്ദ്രവും. ഇടവെട്ടി സ്വദേശി വടക്കേചെറുകോട്ടില്‍ മുഹമ്മദ് ഹാജയാണ് ജില്ലാ ആശുപത്രിയില്‍ ചികിത്സ തേടിയെത്തി ദുരിതത്തിലായത്. മാര്‍ച്ച് 29ന് ജോലി സ്ഥലത്ത് വച്ചാണ് മുഹമ്മദ് ഹാജയുടെ കാലില്‍ ഗ്രൈന്‍ഡര്‍ തട്ടി മുറിവുണ്ടായത്. ഉടന്‍ തന്നെ ജില്ലാ ആശുപത്രിയിലെത്തി ഡോക്ടറെ കണ്ടു. ആഴത്തിലുള്ള മുറിവായതിനാല്‍ ഞരമ്പ് മുറിഞ്ഞിട്ടുണ്ടോയെന്ന് അറിയാനായി ഡോക്ടറുടെ നിര്‍ദ്ദേശ പ്രകാരം എക്‌സ് റേ എടുത്ത് പരിശോധിക്കുകയും ചെയ്തു.
തുടര്‍ന്ന് മുറിവില്‍ തുന്നലിട്ട് ഒന്നിടവിട്ട ദിവസങ്ങളില്‍ ആശുപത്രിയില്‍ വന്ന് മുറിവില്‍ മരുന്ന് വച്ച് ഡ്രസ് ചെയ്യണമെന്നും നിര്‍ദ്ദേശിച്ചു. ഇതനുസരിച്ച് ഏപ്രില്‍ ഒന്നിനെത്തി. എന്നാല്‍ പഴുപ്പ് കുറയാത്തതിനാല്‍ രണ്ടാം തീയതി പിന്നെയുമെത്തി ഡോക്ടറെ കണ്ട് കാര്യം പറഞ്ഞു. ഡോക്ടറാകട്ടെ സര്‍ജന്റെ അടുക്കലേക്ക് പറഞ്ഞയച്ചു. പരിശോധന നടത്തി സര്‍ജ്ജന്‍ തുടര്‍ന്നുള്ള എല്ലാ ദിവസവും മുറിവില്‍ മരുന്ന് വച്ച് ഡ്രസ് ചെയ്യാന്‍ നിര്‍ദ്ദേശിച്ച് മടക്കി. സര്‍ജന്റെ നിര്‍ദ്ദേശ പ്രകാരം പിന്നീടുള്ള ദിവസങ്ങളില്‍ ജില്ലാ ആശുപത്രിയിലെത്തി മരുന്ന് വച്ചെങ്കിലും പഴുപ്പ് കുറയുന്നുണ്ടായിരുന്നില്ല.
ഇക്കാര്യം ശ്രദ്ധയില്‍പ്പെടുത്തിയപ്പോള്‍ എട്ടാം തീയതി തുന്നല്‍ നീക്കാന്‍ സര്‍ജന്‍ നിര്‍ദ്ദേശിച്ചു. ഇതിന് ശേഷവും മാറ്റമുണ്ടായില്ല. ഈ സമയമൊക്കെയും ആശുപത്രിയില്‍ നിന്ന് നല്‍കിയ ആന്റിബയട്ടിക് മരുന്നുകള്‍ ഉപയോഗിക്കുന്നുണ്ടായിരുന്നു. എന്നാല്‍ പിന്നീടും പഴുപ്പും വേദനയും കുറയുകയോ കാല് നിലത്ത് കുത്താനോ പറ്റാത്ത സ്ഥിതി തുടര്‍ന്നു. ഇതോടെ ഇന്നലെ രാവിലെ ഇടവെട്ടിയിലെ പ്രാഥമിക ആരോഗ്യ കേന്ദ്രത്തിലെത്തി ഡോക്ടറെ കണ്ടു. ഇവിടുത്തെ ഡോക്ടര്‍ നടത്തിയ പരിശോധനയില്‍ കാലിലെ മുറിവിനുള്ളില്‍ അപകടത്തിനിടയാക്കിയ ഡ്രൈന്‍ഡറിന്റെ ഒരു ലോഹക്കഷണം തറഞ്ഞിരിക്കുന്നതായി കണ്ടെത്തി. അത് നീക്കം ചെയ്ത് പുതുതായി മരുന്ന് വച്ചപ്പോഴാണ് അല്‍പ്പം ആശ്വാസമായതെന്ന് മുഹമ്മദ് ഹാജ പറഞ്ഞു.
സംഭവത്തില്‍ ഇത്രനാളും ചികിത്സിച്ച ജില്ലാ ആശുപത്രിയിലെ ഡോക്ടര്‍ക്കും സര്‍ജ്ജനും ഡ്രസിങ് നടത്തിയ നഴ്‌സുമാര്‍ക്കും എതിരെ ആശുപത്രി സൂപ്രണ്ടിന് രേഖാമൂലം പരാതി നല്‍കിയിരിക്കുകയാണ് മുഹമ്മദ് ഹാജ. സംഭവത്തില്‍ കുറ്റക്കാര്‍ക്കെതിരെ ശിക്ഷാ നടപടി സ്വീകരിക്കണമെന്നാണ് ആവശ്യം.
