തൊടുപുഴ: മധ്യവേനല്‍ അവധിക്കാലം വിദ്യാര്‍ഥികള്‍ക്ക് ഉല്ലാസകരമാക്കുന്മനതിന് ജില്ലയുടെ വിവിധ മേഖലകളില്‍ വിപുലമായ സജ്ജീകരണങ്ങളാണ് ഒരുങ്ങുന്നത്. ജീവിത വിജയത്തിന്റെ പടികള്‍ ചവിട്ടിക്കയറാനും ലഹരിവസ്തുക്കളോടും മൊബൈല്‍ ഗെയിമുകളോടും വിടപറഞ്ഞ് പുതു തലുറയുടെ ഭാവി സുരക്ഷിതമാക്കുക എന്നതാണ് പദ്ധതി പ്രധാനമായും ലക്ഷ്യമിടുന്നത്. വിജ്ഞാനവും ഉല്ലാസവും പകരുന്ന സമ്മര്‍ ക്യാമ്പുകള്‍ വിവിധ സ്‌കൂളുകളുടെയും ക്ലബുകളുടെയും സംഘടനകളുടെയും നേതൃത്വത്തിലാണ് സജ്ജമാകുന്നത്.
കായിക താരങ്ങളാകാം
തൊടുപുഴ വെങ്ങല്ലൂരില്‍ പ്രവര്‍ത്തിക്കുന്ന സോക്കര്‍ സ്‌കൂളിന്റെ ആഭിമുഖ്യത്തില്‍ അവധിക്കാല ഫുട്‌ബോള്‍ കോച്ചിംഗ് ക്യാമ്പ് തുടങ്ങി. വെങ്ങല്ലൂര്‍ സുലഭ സൂപ്പര്‍മാര്‍ക്കറ്റിന് എതിര്‍വശത്തുള്ള സോക്കര്‍ സ്‌കൂള്‍ ഗ്രൗണ്ട്, തൊടുപുഴ ന്യൂമാന്‍ കോളജ് ഗ്രൗണ്ട്, മൂന്നാര്‍ കെ.ഡി.എച്ച് ഗ്രൗണ്ട് എന്നീ സെന്ററുകളില്‍ തിങ്കള്‍ മുതല്‍ വെള്ളിവരെ രാവിലെ ഏഴുമുതല്‍ ഒമ്പത് വരെയാണ് പരിശീലനം. അഞ്ചു മുതല്‍ 17 വയസുവരെയുള്ള ആണ്‍കുട്ടികള്‍ക്കും പെണ്‍കുട്ടികള്‍ക്കും പങ്കെടുക്കാം. ഫോണ്‍: 8606364223, 9605425395. നെടുങ്കണ്ടം സ്‌പോര്‍ട്‌സ് അസോസിയേഷന്റെ നേതൃത്വത്തില്‍ വിദ്യാര്‍ഥികള്‍ക്കായി രണ്ടുമാസത്തെ സമ്മര്‍ സ്‌പോര്‍ട്‌സ് ക്യാമ്പ് നടത്തും. ദിവസവും രാവിലെ ഏഴു മുതല്‍ ഒന്‍പത് വരെ വ്യായാമ മുറകള്‍, ഗ്രൂപ്പ് പ്രവര്‍ത്തനങ്ങള്‍, ഫണ്‍ ഗെയിമുകള്‍ എന്നിവയോടൊപ്പം ഫുട്‌ബോള്‍, ക്രിക്കറ്റ്, ജൂഡോ, അത്‌ലറ്റിക്‌സ് എന്നിവയില്‍ പരിശീലനം നല്‍കും. സൗഹൃദമത്സരങ്ങള്‍ ടൂര്‍ണമെന്റുകള്‍ എന്നിവയും ഇതോടൊപ്പം സംഘടിപ്പിക്കും. സ്വയം പ്രതിരോധം, ഫസ്റ്റ് എയ്ഡ്, സാഹസിക വിനോദങ്ങള്‍, വ്യക്തിത്വ വികസനം തുടങ്ങിയ പരിപാടികളും ഒരുക്കിയിട്ടുണ്ട്. അഞ്ച് വയസുമുതല്‍ 16 വയസുവരെയുള്ള ആണ്‍ കുട്ടികള്‍ക്കും പെണ്‍കുട്ടികള്‍ക്കും പങ്കെടുക്കാം. നെടുങ്കണ്ടം സിന്തറ്റിക് ട്രാക്ക് സ്റ്റേഡിയം, ടര്‍ഫ് കോര്‍ട്ട്, എന്‍.എസ്.എ അക്കാദമി എന്നിവിടങ്ങളിലാണ് പരിശീലനം നല്‍കുന്നത്. പരിശീലനം പൂര്‍ത്തിയാക്കുന്നവര്‍ക്ക് സര്‍ട്ടിഫിക്കറ്റും നല്‍കും. മലങ്കര എസ്റ്റേറ്റ് ക്ലബിന്റെ ആഭ്യമുഖത്തില്‍ മലങ്കര പെരുമറ്റം ഏബ്രഹാം പുന്നൂസ് സ്റ്റേഡിയത്തില്‍ ഫുട്‌ബോള്‍ കോച്ചിംഗ് ക്യാമ്പ് നടത്തും. 18 വയസില്‍ താഴെ പ്രായമുള്ള ആണ്‍ കുട്ടികള്‍ക്കാണ് പ്രവേശനം. രാവിലെ ഏഴു മുതല്‍ ഒന്പതുവരെയും വൈകുന്നേരം നാലുമുതല്‍ ആറുവരെയുമാണ് സമയം. ഏപ്രില്‍, മെയ് മാസങ്ങളിലായി നടക്കുന്ന ക്യാമ്പില്‍ പങ്കെടുക്കാന്‍ താത്പര്യമുള്ള കുട്ടികള്‍ 6282582673, 8075519622 എന്ന നമ്പരില്‍ പേര് രജിസ്റ്റര്‍ ചെയ്യണം.
അഭ്യസിക്കാം ആയോധനവും
ഷുബുക്കായി കരാട്ടെ ഫെഡറേഷന്റെ നേതൃത്വത്തില്‍ കരാട്ടെ സ്‌പോര്‍ട്‌സ് അക്കാദമിയില്‍ അവധിക്കാല കരാട്ടെ പരിശീലന ക്ലാസ് ഏപ്രില്‍ അഞ്ചുമുതല്‍ മേയ് 30 വരെ നടക്കും. കരിമണ്ണൂര്‍ മാസ് ഓഡിറ്റോറിയം, തൊടുപുഴ ഗാന്ധിസ്‌ക്വയറിലെ മുനിസിപ്പല്‍ ഓഡിറ്റോറിയം എന്നിവിടങ്ങളിലാണ് ക്ലാസ്. ആയോധന കലകളിലൂടെ കുട്ടികളില്‍ ആത്മവിശ്വാസം വളര്‍ത്തുകയും സ്വയം പ്രതിരോധിക്കാന്‍ അവരെ പ്രാപ്തരാക്കുകയുമാണ് ചെയ്യുന്നത്. ചിട്ടയായ പരിശീലന രീതികളിലൂടെ അച്ചടക്കം പരിശീലിക്കാനും ക്രിയാത്മക ചിന്തയും കായിക ക്ഷമതയും വളര്‍ത്താനും ലക്ഷ്യമിടുന്നു. കരാട്ടെ ബ്ലാക്ക് ബെല്‍റ്റില്‍ സെവന്‍ത്ഡാന്‍ നേടിയ ബേബി ഏബ്രഹാമാണ് പരിശീലനം നല്‍കുന്നത്. പൊലീസ് അക്കാദമി, ജില്ലയിലെ സ്‌കൂളുകള്‍, കോളജുകള്‍ തുടങ്ങിയ സ്ഥലങ്ങളിലും ഇദ്ദേഹത്തിന്റെ നേതൃത്വത്തില്‍ സ്വയംപ്രതിരോധ പരിശീലനം നല്‍കിവരുന്നുണ്ട്. ഫോണ്‍: 9961835358. മുട്ടം ഐ.എസ്.എം.എ കളരി പരിശീലന കേന്ദ്രത്തില്‍ കളരി പരിശീലനം ആരംഭിച്ചു. ആരോഗ്യം, അച്ചടക്കം, കൃത്യനിഷ്ഠ, ഏകാഗ്രത, ശുചിത്വം, ചുമതലാബോധം തുടങ്ങിയവ പരിശീലനത്തിലൂടെ ലഭ്യമാകുന്നു. ഫോണ്‍: 9633055470.
സംഗീതവും നൃത്തവും
തൊടുപുഴ ഡിപോള്‍ ഇന്റര്‍നാഷണല്‍ ആക്കാദമിയില്‍ അവധിക്കാല ക്ലാസുകള്‍ ഉടന്‍ ആരംഭിക്കും. ഉപകരണ സംഗീതം (ഡ്രം, പിയാനോ, ഗിത്താര്‍) വോക്കല്‍ മ്യൂസിക്ക്, ക്ലാസിക്കല്‍ ഡാന്‍സ്, കരാട്ടെ എന്നിവയിലാണ് പരിശീലനം നല്‍കുന്നത്. വിദഗ്ധരായ അധ്യാപകരുടെ നേതൃത്വത്തിലാണ് ക്ലാസുകള്‍ നടത്തുന്നത്. ഫോണ്‍: 8078521512. തൊടുപുഴ നാദോപാസനയുടെ നേതൃത്വത്തില്‍ കുട്ടികള്‍ക്കായി അവധിക്കാല സംഗീത പരിശീലനം നടത്തും. കര്‍ണാടക സംഗീതം, കീ ബോര്‍ഡ്, പിയാനോ, ഗിത്താര്‍, വയലിന്‍ (വെസ്റ്റേണ്‍), തബല, ശാസ്ത്രീയ നൃത്തം, പെയിന്റിംഗ് എന്നിവയിലാണ് പരിശീലനം നല്‍കുന്നത്. ഏപ്രില്‍, മെയ് മാസങ്ങളിലാണ് ക്ലാസുകള്‍ ക്രമീകരിച്ചിരിക്കുന്നത്. സിഎംഐ സഭയുടെ നേതൃത്വത്തില്‍ 38 വര്‍ഷമായി സംഗീതപരിശീലനം നടത്തിവരുന്നുണ്ട്. വിശാലമായ ക്ലാസ് റൂം, വിദഗ്ധരായ അധ്യാപകര്‍ എന്നിവരുടെ നേതൃത്വത്തിലാണ് മികവ് പുലര്‍ത്തുന്ന പരിശീലന പരിപാടികള്‍ സംഘടിപ്പിച്ചിരിക്കുന്നത്. ഫോണ്‍: 9645030212,9447266246.
ലോക ഭാഷകളിലും ആര്‍ട്ടിഫിഷല്‍ ഇന്റലിജന്‍സിലും പരിശീലനം
തൊടുപുഴ ഉപാസനയില്‍ വിദ്യാര്‍ഥികള്‍ക്കായി പാണ്ടോര 2കെ25 എന്ന പേരില്‍ സമ്മര്‍ക്യാമ്പ് നടത്തും. ഒമ്പത് മുതല്‍ പ്ലസ്ടുവരെയുള്ളവര്‍ക്ക് 21 മുതല്‍ 25 വരെയാണ് ക്യാമ്പ്. കരിയര്‍ ഗൈഡന്‍സ്, ജര്‍മന്‍ഭാഷാ പ്രാരംഭപരിശീലനം, ആര്‍ട്ടിഫിഷല്‍ ഇന്റലിജന്‍സ് പരിശീലനം, ഫോട്ടോ ഗ്രഫി വീഡിയോ എഡിറ്റിംഗ് പരിശീലനം, ഇംഗ്ലീഷ് ഭാഷാ പരിശീലനം, പ്രസംഗം, അബാക്കസ്, യോഗ, ഓര്‍മശക്തി വര്‍ധിപ്പിക്കല്‍, വേഗത്തില്‍ വായിക്കുന്നതിനുള്ള പരിശീലനം, ഗ്രൂപ്പ് ഗെയിംസ്, സംഗീത പരിശീലനം, കൗണ്‍സലിംഗ്, ഉല്ലാസ യാത്ര തുടങ്ങിയവയാണ് നടത്തുന്നത്. ഫോണ്‍: 9447266246,9400318143.
നീന്തല്‍ പരീശീലവും
ഇടുക്കി ജില്ലാ അക്വാറ്റിക് അസോസിയേഷന്റെ നേതൃത്വത്തില്‍ നടത്തുന്ന ജില്ലയിലെ ഏക പരിശീലന കേന്ദ്രമായ വണ്ടമറ്റം അക്വാറ്റിക് സെന്ററില്‍ കുട്ടികള്‍ക്കായി അവധിക്കാല നീന്തല്‍പരിശീലനം നടത്തും. വിവിധ പ്രായത്തിലുള്ളവര്‍ക്കായി രണ്ട് സ്വിമ്മിംഗ് പൂളുകള്‍ ഇതിനായി സജ്ജമാക്കിയിട്ടുണ്ട്. രണ്ടുവയസുമുതല്‍ എട്ടുവയസുവരെയുള്ള കുട്ടികള്‍ക്കായി പ്രത്യേക പരിശീലനം നല്‍കും. സ്ത്രീകള്‍ക്കും മുതിര്‍ന്നവര്‍ക്കുമായി പ്രത്യേക ബാച്ചുകളുണ്ട്. ഇതിനു പുറമേ കരാട്ടെ, ഷട്ടില്‍ബാഡ്മിന്റണ്‍, യോഗപരിശീലനവും നല്‍കും. 20 വര്‍ഷമായി സമ്മര്‍ ക്യാമ്പ് നടത്തിവരുന്നുണ്ട്. പരിശീലനം പൂര്‍ത്തിയാക്കുന്നവര്‍ക്ക് ഇടുക്കി ജില്ലാ അക്വാറ്റിക് അസോസിയേഷന്റെ സര്‍ട്ടിഫിക്കറ്റുകളും നല്‍കും. ദേശീയ, അന്തര്‍ ദേശീയ താരങ്ങളാണ് പരിശീലനം നല്‍കുന്നത്. ലോക ഓഷ്യന്‍മെന്‍ ചാമ്പ്യന്‍ ബേബി വര്‍ഗീസാണ് പരിശീലനത്തിന് നേതൃത്വം നല്‍കുന്ന്. ഫോണ്‍: 9447223674. അക്വാറ്റിക് സെന്ററില്‍ അവധിക്കാല നീന്തല്‍ പരിശീലനം നടത്തും. സുരക്ഷിതവും നിലവാരവുമുള്ള പരിശീലന സൗകര്യമുള്ള ഇവിടെ രാവിലെയും വൈകുന്നേരവുമാണ് പരിശീലനം. മുട്ടം, കുടയത്തൂര്‍ എന്നിവിടങ്ങളില്‍നിന്നുള്ളവര്‍ക്ക് പ്രത്യേക വാഹന സൗകര്യവും ലഭ്യമാക്കും. ഫോണ്‍: 9400618888.
ഗണിതശാസ്ത്രത്തില്‍ മികവ് വര്‍ദ്ധിപ്പിക്കാം
തൊടുപുഴ ജ്യോതി സൂപ്പര്‍ബസാറില്‍ പ്രവര്‍ത്തിക്കുന്ന എസ്.എം.എ അബാക്കസില്‍ അവധിക്കാല പരിശീലന ക്ലാസുകള്‍ ആരംഭിക്കും. ഗണിതശാസ്ത്രത്തില്‍ കുട്ടികളുടെ മികവ് വര്‍ധിപ്പിക്കുന്നതിനുള്ള പരിശീലന പദ്ധതിയാണിത്. ദൈനംദിന ഗ്രഹണ പരിശീലനത്തിലൂടെ കുട്ടികളിലെ ഏകാഗ്രതയും ഓര്‍മശക്തിയും ബുദ്ധിശക്തിയും ആത്മവിശ്വാസവും വര്‍ധിപ്പിക്കുകയാണ് അബാക്കസ് പരിശീലനത്തിലൂടെ ലക്ഷ്യമിടുന്നത്.
