തൊടുപുഴ: വര്‍ധിച്ചുവരുന്ന ലഹരിമരുന്ന് വ്യാപനം തടയാന്‍ എക്സൈസ് പരിശോധന കടുപ്പിച്ചതോടെ കഴിഞ്ഞ 40 ദിവസത്തിനിടെ ജില്ലയില്‍ റജിസ്റ്റര്‍ ചെയ്തത് 139 എന്‍.ഡി.പി.എസ് (കഞ്ചാവ്, ലഹരിമരുന്ന് എന്നിവയുമായി ബന്ധപ്പെട്ടവ) കേസുകള്‍. 173 അബ്കാരി കേസുകളും മാര്‍ച്ച് 1 മുതല്‍ ഈമാസം 9 വരെ റജിസ്റ്റര്‍ ചെയ്തു. എന്‍.ഡി.പി.എസ് കേസുകളില്‍ 139 പേരെയും അബ്കാരി കേസുകളില്‍ 165 പേരെയും അറസ്റ്റ് ചെയ്തു. കഴിഞ്ഞ മാസം സംസ്ഥാന വ്യാപകമായി എക്സൈസിന്റെ നേതൃത്വത്തില്‍ ഓപ്പറേഷന്‍ ‘ക്ലീന്‍ സ്ലേറ്റ്’ എന്ന പേരില്‍ സ്പെഷല്‍ ഡ്രൈവ് നടത്തിയിരുന്നു. ഇതിന്റെ ഭാഗമായി വാഹനപരിശോധന ഉള്‍പ്പെടെ കര്‍ശനമാക്കിയിരുന്നു. സ്പെഷല്‍ ഡ്രൈവില്‍ സിനിമാ മേക്കപ് ആര്‍ട്ടിസ്റ്റ് അടക്കം പിടിയിലായി. കഞ്ചാവ്, കഞ്ചാവ് ചെടികള്‍ എന്നിവയ്ക്കു പുറമേ മാരക ലഹരിമരുന്നായ എം.ഡി.എം.എയും ഹഷീഷ് ഓയിലും പിടികൂടിയവയില്‍ ഉള്‍പ്പെടുന്നു. സഞ്ചാരികളില്‍ നിന്നാണ് കൂടുതലായും ലഹരിവസ്തുക്കള്‍ പിടികൂടിയത്.
സ്പെഷല്‍ ഡ്രൈവ് അവസാനിച്ചെങ്കിലും ലഹരിവ്യാപനം തടയാന്‍ പരിശോധനകള്‍ ശക്തമായി തുടരുമെന്ന് ഇടുക്കി ഡപ്യൂട്ടി എക്സൈസ് കമ്മിഷണര്‍ കെ.എസ് സുരേഷ് പറഞ്ഞു. ജില്ലയിലെ വിനോദസഞ്ചാര കേന്ദ്രങ്ങളിലും അതിര്‍ത്തി ചെക്പോസ്റ്റുകളിലും കര്‍ശന പരിശോധനകളും നിരീക്ഷണവും തുടരാനാണ് തീരുമാനം. ജില്ലയിലെ സിനിമാ ഷൂട്ടിങ് ലൊക്കേഷനുകളിലും നിരീക്ഷണം നടത്തുന്നുണ്ട്. ജില്ലയില്‍ പൊലീസിന്റെ നേതൃത്വത്തിലും ലഹരി പരിശോധന ഊര്‍ജിതമായി നടന്നുവരികയാണ്. അതേസമയം ബോധവല്‍ക്കരണം, പരിശോധന, ശിക്ഷാനടപടികള്‍ എന്നിവ ഒരു വശത്തു നടക്കുമ്പോഴും മറുവശത്ത് ലഹരി ഒഴുക്ക് നിര്‍ബാധം തുടരുന്ന സ്ഥിതിവിശേഷമാണ്.
മാര്‍ച്ച് 1 മുതല്‍ ഏപ്രില്‍ 9 വരെ ജില്ലയില്‍ എക്സൈസ് നടത്തിയ പരിശോധനകളില്‍ ആകെ പിടികൂടിയവ:
കോട-615 ലിറ്റര്‍
ചാരായം-288 ലിറ്റര്‍
ഇന്ത്യന്‍ നിര്‍മിത വിദേശമദ്യം-545.795 ലിറ്റര്‍
കഞ്ചാവ്-3.929 കിലോഗ്രാം
കഞ്ചാവുചെടി-53 എണ്ണം
എം.ഡി.എം.എ-0.5 ഗ്രാം
ചരസ്-10 ഗ്രാം
ഹഷീഷ് ഓയില്‍-11.015 ഗ്രാം
നിരോധിത പുകയില ഉല്‍പന്നങ്ങള്‍-53.5 കിലോഗ്രാം
