രാജകുമാരി: ഓശാന തിരുനാളിൽ മതസൗഹാര്‍ദ്ദത്തിന്റെ സന്ദേശം കുരുത്തോലയിലൂടെ പങ്കുവച്ച് ഹൈന്ദവ സഹോദരൻ.രാജാക്കാട് ഓണംപാറയില്‍ മോഹനനാണ് മതസൗഹാര്‍ദ്ദത്തിന്റെ പ്രതീകമായി രാജാക്കാട് ക്രിസ്തുരാജ ഫൊറോന പള്ളിക്ക് സ്വന്തം പുരയിടത്തിലെ കുരുത്തോല മുറിച്ചു നല്‍കി മാതൃകയായത്.
മോഹനന്‍ തന്റെ പുരയിടത്തിലുളള 18 തെങ്ങിന്റെ കുരുത്തോലകളാണ് പള്ളിക്ക് നല്‍കിയത്.ടൗണില്‍ മുനീന്ദ്ര ബാര്‍ബര്‍ ഷോപ്പ് എന്ന സ്ഥാപനം നടത്തുന്ന മോഹനന്‍ കുറെക്കാലമായി എല്ലാവര്‍ഷവും അടുത്തുളള പള്ളികളായ രാജാക്കാട്,ജോസ്ഗിരി പള്ളികളിൽ കുരുത്തോലകള്‍ നല്‍കാറുണ്ട്.ഹൈറേഞ്ച് മേഖലയില്‍ മണ്ടവീഴ്ചമൂലം തെങ്ങുകള്‍ വ്യാപകമായി നശിച്ചതിനെ തുടര്‍ന്ന് ഓശാന ഞായറാഴ്ചകളില്‍ പള്ളികളില്‍ കുരുത്തോല വിതരണം ചെയ്യുക ഏറെ പ്രതിസന്ധി ഉണ്ടാക്കിയിരുന്നു.ഇത് മനസ്സിലാക്കിയ മോഹനന്‍ രാജാക്കാട് പള്ളിയില്‍ കുരുത്തോല എത്തിച്ചു നല്‍കാമെന്ന് പറയുകയും കൊഴുക്കട്ട ശനിയാഴ്ച രാവിലെ തന്നെ ഓല വെട്ടിച്ച് പളളിയിലെത്തിച്ച് കൈമാറിയത്.കഴിഞ്ഞ 7 വര്‍ഷമായി മോഹനന്‍ പള്ളിയിൽ ഓശാന ശുശ്രൂഷകള്‍ക്കായി കുരുത്തോലകള്‍ നല്‍കാറുണ്ട്.മതത്തിന്റെ പേരില്‍ ചേരിതിരിഞ്ഞ് ചിന്തിക്കുന്ന ഈ കാലഘട്ടത്തില്‍ മതസൗഹാര്‍ദ്ദത്തിന്റെ നല്ല പാഠമാണ് മോഹനന്‍ പകര്‍ന്ന് നല്‍കുന്നത്.1089 കുടുംബക്കാരുള്ള രാജാക്കാട് ഇടവകയില്‍ മാത്രം ഓശാന തിരുനാളിന് നല്‍കാന്‍ 5000 ത്തിലധികം കുരുത്തോലകള്‍ ആവശ്യമുണ്ട്.ടൗൺ പള്ളിയായതിനാൽ സമീപ ഇടവകകളിൽ നിന്നും ഓശാന ഞായറാഴ്ച കൂടുതൽ വിശ്വാസികൾ എത്താറുണ്ട്.ഏലം കൃഷിയുടെ കടന്നുവരവിനെ തുടർന്ന് ഇടവക ഉള്‍പ്പെടുന്ന മേഖലയില്‍ തെങ്ങ് കൃഷി കുറവായതിനാല്‍ കുരുത്തോലക്ക് ക്ഷാമമുണ്ടെന്ന് അറിയാവുന്ന മോഹനൻ ഈ വർഷവും കുരുത്തോല തരാൻ തയ്യാറാണെന്ന് പള്ളിയിൽ മുൻകൂട്ടി അറിയിക്കുകയും.അത് വെട്ടി നൽകുകയും ചെയ്തു
തന്റെ പുരയിടത്തിലെ തെങ്ങിലുള്ളത് വെറും ഓലകളാണെന്നും അത് പള്ളിയിലെത്തി വെഞ്ചരിച്ച് നൽകുമ്പോൾ അത് വാങ്ങുന്നവർ പ്രാർത്ഥനാപൂർവ്വം സ്വീകരിച്ച് ഓശാന തിരുനാളിൽ പ്രദക്ഷിണത്തിന് ഉപയോഗിക്കുകയും തുടർന്ന് വീട്ടിലെ പ്രാർത്ഥനാ മുറിയിൽ വച്ച് പ്രാർത്ഥിക്കുകയും ചെയ്യുന്നത് മൂലം തനിക്ക് ഏറെ ദൈവാനുഗ്രഹമുണ്ടെന്ന് മോഹനൻ പറയുന്നു.
മത വിശ്വാസത്തിനപ്പുറം വിശാലമായ മനസ്സുള്ള മോഹനനുള്ളപ്പോള്‍ പള്ളികളില്‍ കുരുത്തോലയ്ക്ക് പ്രതിസന്ധി ഉണ്ടാകില്ലെന്നാണ് വൈദീകർ പറയുന്നത്.പള്ളിയിലെത്തിച്ച കുരുത്തോലകൾ വികാരി ഫാ.മാത്യു കരോട്ടുകൊച്ചറയ്ക്കൽ, സഹ വികാരി ഫാ. സെബാസ്റ്റ്യൻ മച്ചുകാട്ട് കൈക്കാരൻ ബിനോയി കൂനംമാക്കൽ,പാരീഷ് കൗൺസിൽ സെക്രട്ടറി സജി പൂവത്തിങ്കൽ,ഷൈൻകോവൂർ,മനോജ് തട്ടാറുകുന്നേൽ എന്നിവർ ചേർന്ന് ഏറ്റുവാങ്ങി.
