കരിമണ്ണൂർ: പഞ്ചായത്തിലെ നെയ്യശ്ശേരിയിൽ റബ്ബർ ഷീറ്റിന് തീ പിടിച്ച് വൻ നാശനഷ്ടം. ഇന്നലെ രാവിലെ പത്തരയോടെ ആയിരുന്നു സംഭവം. വാഴേപ്പറമ്പിൽ സിബി മാത്യുവിന്റെ വീടിനോട് ചേർന്നുള്ള ഔട്ട് ഹൗസിലെ അടുക്കളയിലാണ് തീപിടുത്തം ഉണ്ടായത്. ഉണക്കാൻ ഇട്ടിരുന്ന റബ്ബർ ഷീറ്റുകളിലേക്ക് അടുപ്പിൽ നിന്നും തീ പടരുകയായിരുന്നു. തുടക്ക സമയത്ത് സംഭവം വീട്ടുകാരുടെ ശ്രദ്ധയിൽപ്പെട്ടില്ല. തീ ആളിപ്പടർന്നപ്പോഴാണ് എല്ലാവരും വിവരമറിഞ്ഞത്. ഉടൻ തന്നെ വീട്ടുകാർ അടുക്കളയിൽ നിന്നും ഗ്യാസ് സിലിണ്ടർ മാറ്റുകയും മോട്ടോർ പമ്പ് ചെയ്ത് തീ അണയ്ക്കുവാൻ ശ്രമിക്കുകയും ചെയ്തു. എങ്കിലും പൂർണ്ണമായും ശ്രമം വിജയിക്കാത്തതിനാൽ സഹായത്തിനായി തൊടുപുഴ അഗ്നി രക്ഷാ സേനയിൽ വിവരമറിയിക്കുകയും ചെയ്തു. ഉടൻതന്നെ സ്റ്റേഷൻ ഓഫീസർ ബിനു സെബാസ്റ്റ്യൻ്റെ നേതൃത്വത്തിൽ രണ്ട് യൂണിറ്റ് സേനാംഗങ്ങൾ സ്ഥലത്തെത്തി. പക്ഷെ, തീപിടുത്തം ഉണ്ടായ സ്ഥലത്തേക്ക് എത്തിച്ചേരുവാനുള്ള ഏകദേശം ഒരു കിലോമീറ്റർ ദൂരം ചെറുതും, ഇടുങ്ങിയതുമായ വഴി ആയതിനാൽ വളരെയേറെ പ്രയാസപ്പെട്ടാണ് സംഭവസ്ഥലത്തേക്ക് എത്തപ്പെട്ടത്.
റബ്ബർ ഷീറ്റുകളിലേക്ക് ആളിപ്പടർന്ന തീ അണയ്ക്കുന്നതിനോട് ഒപ്പം തന്നെ അടുക്കളയുടെ മറ്റ് ഭാഗങ്ങളിലേക്ക് തീ പടരാതിരിക്കുവാനുമുള്ള ശ്രമങ്ങളാണ് അഗ്നി രക്ഷാ സേന ആദ്യം കൈക്കൊണ്ടത്. തുടർന്ന് അരമണിക്കൂർ സമയം കഠിനമായി പ്രയത്നിച്ച് തീ പൂർണ്ണമായും അണക്കുകയും ചെയ്തു. അടുക്കളയിലെ ജനലുകളിലേക്ക് തീ പടരുകയും ചില്ലുകൾ പൊട്ടിവീഴുകയും ചെയ്തു. ഏകദേശം 150 ഷീറ്റുകളാണ് ഉണക്കാൻ ഇട്ടിരുന്നത്. ഷീറ്റ്, ചിമ്മിനി, ആസ്ബറ്റോസ് ഷീറ്റ്, അടുക്കളയിൽ സൂക്ഷിച്ചിരുന്ന കാലിത്തീറ്റ തുടങ്ങിയവയ്ക്ക് എല്ലാമായി പ്രാഥമിക വിലയിരുത്തലിൽ 40,000 രൂപയുടെ നഷ്ടം കണക്കാക്കുന്നു. തീ പിടിച്ച അടുക്കള സ്ഥിതി ചെയ്യുന്നത് താമസിക്കുന്ന വീടിനോട് ചേർന്നായിരുന്നെങ്കിലും അവിടേക്ക് തീ പടരാതിരുന്നത് സേനയുടെ പ്രവർത്തനഫലമായാണ്.
അസിസ്റ്റൻ്റ് സ്റ്റേഷൻ ഓഫീസർ ബിജു പി. തോമസ്, സീനിയർ ഫയർ ഓഫീസർ എം.എൻ വിനോദ് കുമാർ, ഗ്രേഡ് സീനിയർ ഫയർ ഓഫീസർമാരായ ബിബിൻ എ. തങ്കപ്പൻ, ബിനോദ് എം.കെ, പി.എൻ അനൂപ്, ഫയർ ഓഫീസർമാരായ അനിൽ നാരായണൻ, ജെയിംസ് നോബിൾ, എഫ്.എസ് ഫ്രിജിൻ, ജെസ്റ്റിൻ ജോയി ഇല്ലിക്കൽ, ഹോം ഗാർഡ് രാജീവ് ആർ. നായർ എന്നിവരായിരുന്നു അഗ്നി രക്ഷാ സേനാ സംഘത്തിൽ ഉണ്ടായിരുന്നത്.
