ഇടക്കി: അനധികൃത പാറപൊട്ടിക്കലും മണ്ണെടുപ്പും നടത്തുന്നുവെന്ന പരാതിയില്‍ സി.പി.എം ജില്ലാ സെക്രട്ടറി സി.വി വര്‍ഗീസിനും മകന്‍ അമല്‍ വര്‍ഗീസിനും മകന്‍ സജിത്ത് കടലാടിമറ്റത്തിനുമെതിരേ ഉടുമ്പഞ്ചോല ഭൂ രേഖ തഹസീല്‍ദാര്‍ അന്വേഷണത്തിന് ഉത്തരവിട്ടതിനേതിരേ സി.പി.എം രംഗത്ത്. പേര് വയ്ക്കാത്ത വ്യാജ പരാതിയിന്‍മേല്‍ സ.ിപി.എം ജില്ലാ സെക്രട്ടറിക്കെതിരെയും കുടുംബാംഗങ്ങളുടെ പേരിലും നടത്തുന്ന അന്വേഷണത്തില്‍ ഗൂഢാലോചനയുണ്ടെന്ന് ജില്ലാ നേതൃത്വം പറഞ്ഞു. ജില്ലാ കലക്ടര്‍ക്ക് ലഭിച്ച ഊമക്കത്തില്‍ പ്രാഥമിക അന്വേഷണം പോലും നടത്താതെ സി.പി.എം എന്ന പാര്‍ട്ടിക്കും ജില്ലാ സെക്രട്ടറി എന്ന പദവിക്കും അപകീര്‍ത്തി ഉണ്ടാക്കുംവിധം പ്രത്യേക വാക്കുകള്‍ ഉപയോഗിച്ച് ഉത്തരവ് തയാറാക്കുകയും അത് അപ്പോള്‍ തന്നെ മാധ്യമങ്ങള്‍ക്ക് ചോര്‍ത്തി നല്‍കുകയും ചെയ്തതിലുള്ള ഗൂഢാലോചന പുറത്തു കൊണ്ടുവരാന്‍ നിയമപരമായും രാഷ്ട്രീയപരമായും ഇടപെടുമെന്ന് ജില്ലാ സെക്രട്ടറി സി.വി. വര്‍ഗീസ് പറഞ്ഞു. പാര്‍ട്ടിയെ അപകീര്‍ത്തിപ്പെടുത്താനും ജില്ലാ സെക്രട്ടറിയെ വ്യക്തിഹത്യ ചെയ്യാനുമാണ് ഉദ്യോഗസ്ഥര്‍ ഗൂഢാലോചന നടത്തിയിട്ടുള്ളത്. ജില്ലാ ഭരണകൂടത്തിലും താലൂക്ക് ഓഫീസിലും നടന്നിട്ടുള്ള ഗൂഢാലോചനയില്‍ ബാഹ്യശക്തികളുടെ ഇടപെടലും ഉണ്ടായിട്ടുണ്ടെന്ന് സി.വി പറഞ്ഞു. സി.പി.എം നേതാക്കളുടെ മക്കള്‍ ഓരോ വ്യക്തികളും വെവേറെ കുടുംബങ്ങളുമാണ്. മറ്റേതൊരാളെയും പോലെ വ്യവസ്ഥാപിതമായി മാര്‍ഗങ്ങളില്‍ ജീവിത മാര്‍ഗങ്ങള്‍ കണ്ടെത്തുന്നതിന് അവര്‍ക്കും സ്വാതന്ത്ര്യമുണ്ട്. എന്നാല്‍ സി.പി.എമ്മിന്റെ പ്രത്യേകമായ ഒരു സഹായവും ഇതിനായി നല്‍കുന്ന രീതിയില്ല. നിയമപരമല്ലാത്ത പ്രവര്‍ത്തനങ്ങള്‍ ഉണ്ടായിട്ടുണ്ടെങ്കില്‍ ബന്ധപ്പെട്ട ഉദ്യോഗസ്ഥര്‍ക്ക് അവരുടെ പേരില്‍ നടപടി സ്വീകരിക്കാമെന്നും, അതില്‍ പാര്‍ട്ടി ഇടപെടില്ലെന്നും ജില്ലാ സെക്രട്ടറി പറഞ്ഞു. അരപ്പതിറ്റാണ്ടോളമായി സംശുദ്ധമായ പൊതുപ്രവര്‍ത്തനം നടത്തി വരുന്ന സി.വി. വര്‍ഗീസിനെ സിപിഎമ്മിന്റെ ജില്ലാ സെക്രട്ടറി ആയതുകൊണ്ട് വേട്ടയാടാന്‍ മുതിര്‍ന്നാല്‍ പാര്‍ടി ഇത്തരം ദുഷ്പ്രവണതകള്‍ക്ക് മുന്നില്‍ കീഴടങ്ങില്ലെന്നും കൂടുതല്‍ കരുത്തോടെ നേരിടുമെന്നും നേതാക്കള്‍ പറഞ്ഞു.
