തൊടുപുഴ: വ്യാജ രേഖ ചമച്ച് സംസ്ഥാന പോലീസ് ഹൗസിങ് സഹകരണ സംഘത്തില്‍ നിന്നും വനിതാ പോലീസ് ഉദ്യോഗസ്ഥ വായ്പ എടുത്തതായി പോലീസ് ഉദ്യോഗസ്ഥന്റെ പരാതി. സംഭവത്തില്‍ വാഗമണ്‍ സ്‌റ്റേഷനിലെ വനിതാ പോലീസ് ഉദ്യോഗസ്ഥക്കെതിരെ കേസെടുത്ത് കാളിയാര്‍ പോലീസ് അന്വേഷണം ആരംഭിച്ചു. കരിമണല്‍ സ്റ്റേഷനില്‍ ജോലി ചെയ്യുന്ന പോലീസ് ഉദ്യോഗസ്ഥനാണ് തന്റെ പേരില്‍ വ്യാജ ഒപ്പിട്ട് വായ്പ എടുത്തുവെന്ന പരാതിയുമായി രംഗത്തെത്തിയത്. എറണാകുളത്ത് പ്രവര്‍ത്തിക്കുന്ന പൊലീസ് ഹൗസിങ് സഹകരണ സംഘത്തില്‍ നിന്ന് അഞ്ച് ലക്ഷം വായ്പ എടുത്തത് ഇപ്പോള്‍ കുടിശികയായി 10 ലക്ഷം രൂപ ആയി. വായ്പ കുടിശിക ആയതിനെ തുടര്‍ന്ന് പല പ്രാവശ്യം നോട്ടീസ് നല്‍കിയെങ്കിലും പണം തിരികെ അടച്ചിരുന്നില്ല. ഇതിന്റെ തുടര്‍ച്ചയായി സഹകരണ സംഘത്തിന്റെ നേതൃത്വത്തില്‍ ജപ്തി നടപടികളിലേക്ക് കടന്നു. ഇതേ തുടര്‍ന്ന് കഴിഞ്ഞ ദിവസമാണ് ഇടുക്കി ജില്ലാ പോലീസ് മേധാവിക്ക് മുന്നില്‍ പരാതിയുമായി പൊലീസുകാരനെത്തിയത്. വനിതാ പോലീസ് ഉദ്യോഗസ്ഥയും പരാതിക്കാരനായ പോലീസുകാരനും കരിങ്കുന്നം പോലീസ് സ്റ്റേഷനില്‍ ജോലി നോക്കുമ്പോള്‍ ഇടുക്കിയിലുള്ള ജില്ലാ പോലീസ് കോ. ഓപ്പറേറ്റീവ് സൊസൈറ്റിയില്‍ നിന്നും വായ്പ എടുത്തിരുന്നു. അന്ന് പരാതിക്കാരനാണ് വനിതാ പോലീസ് ഉദ്യോഗസ്ഥക്ക് ജാമ്യം നിന്നത്. പിന്നീട് 2021ല്‍ തന്റെ വ്യാജ ഒപ്പിട്ട അപേക്ഷ സംസ്ഥാന സഹകരണ സംഘത്തില്‍ നല്‍കിയെന്നും അപേക്ഷയുടെ അടിസ്ഥാനത്തില്‍ സഹകരണ സംഘത്തില്‍ നിന്നും കണ്‍ഫര്‍മേഷന്‍ ലെറ്റര്‍ ഇടുക്കി ജില്ലാ പോലീസ് ഓഫീസില്‍ അയക്കുകയും അതിന്റെ മറുപടിയുടെ അടിസ്ഥാനത്തില്‍ വായ്പ നല്‍കിയെന്നുമാണ് പരാതിയില്‍ പറയുന്നത്. അന്ന് ജാമ്യക്കാരന്‍ നേരിട്ട് ഹാജരായി ജാമ്യകരാറില്‍ ഒപ്പിടേണ്ട ആവശ്യമില്ലെന്നാണ് പറയുന്നത്. വായ്പ എടുക്കുന്നതിന് ഒന്നില്‍ കൂടുതല്‍ ജീവനക്കാരുടെ സാലറി സര്‍ട്ടിഫിക്കറ്റ് ഇത്തരത്തില്‍ ഹാജരാക്കേണ്ടതുണ്ടോയെന്നും സംശയം ഉയര്‍ന്നിട്ടുണ്ട്.
വിശദമായ അന്വേഷണം നടത്തും
പരാതിയില്‍ കേസ് രജിസ്റ്റര്‍ ചെയ്തിട്ടുണ്ടെന്ന് കാളിയാര്‍ എസ്.എച്ച്.ഒ എച്ച്.എല്‍ ഹണി പറഞ്ഞു. സംഭവത്തിന്റെ നിജസ്ഥിതി അന്വേഷിച്ച് ബോധ്യപ്പെട്ട ശേഷം മാത്രമെ യതാര്‍ഥ വസ്തുത എന്താണെന്ന് മനസിലാകൂ. ഒപ്പ് വ്യാജമായി ഇട്ടതാണോയെന്നതുള്‍പ്പെടെയുള്ള കാര്യങ്ങള്‍ വിശദമായി പരിശോധിക്കും. റവന്യൂ റിക്കവറി നടപടികളിലേക്ക് കടന്നതോടെ ജാമ്യക്കാരന്‍ പരാതിനല്‍കിയതാണോ എന്ന് ഉള്‍പ്പെടെയുള്ള കാര്യങ്ങളും അന്വേഷണ വിധേയമാക്കുമെന്നും എച്ച്.എല്‍ ഹണി പറഞ്ഞു.
