ഇടുക്കി: കാലാവസ്ഥയിലുണ്ടായ വ്യതിയാനത്തെ തുടര്‍ന്ന് തമിഴ്‌നാട്ടില്‍ മുന്തിരി ചെടികള്‍ കരിഞ്ഞുണങ്ങുന്നു. പകല്‍ ചൂടും രാത്രിയിലെ മഞ്ഞുവീഴ്ചയും മുലമുണ്ടാകുന്ന ചാര രോഗമാണ് മുന്തിരി ചെടികള്‍ കരിഞ്ഞുണങ്ങാന്‍ കാരണമായി പറയുന്നത്. തമിഴില്‍ ചാമ്പല്‍ നോയ് എന്നറിയപ്പെടുന്ന ചാര രോഗം ഇപ്പോള്‍ മുന്തിരി തോട്ടങ്ങളില്‍ വ്യാപകമായിക്കൊണ്ടിരിക്കുകയാണ്.
വള്ളികള്‍ ഇരുണ്ട നിറത്തില്‍ കരിഞ്ഞുണങ്ങുന്നതും മുന്തിരി കുലകള്‍ ദൃഡതയില്ലാതെ വരണ്ടു പോകുന്നതുമാണ് ലക്ഷണം. ചാര രോഗം വ്യാപകമായതോടെ മുന്തിരി വിലയും കുതിച്ചുയര്‍ന്നു. തോട്ടങ്ങളില്‍ ചില്ലറ വില്‍പന കിലോയ്ക്ക് മുപ്പത് മുതല്‍ എഴുപത് രൂപ വരെയായിരുന്നത് നൂറു രൂപയായി ഉയര്‍ന്നു. തേനി ജില്ലയില്‍ മാത്രം എണ്ണായിരത്തിലധികം ഏക്കറിലാണ് മുന്തിരി കൃഷിയുള്ളത്. ഇതില്‍ മുപ്പത് ശതമാനത്തിലധികം തോട്ടങ്ങളില്‍ കൃഷി നാശമുണ്ടായി എന്നാണ് റിപ്പോര്‍ട്ട്. മുന്തിരി ചെടികള്‍ കരിഞ്ഞുണങ്ങുന്നത് കര്‍ഷകരെ ആശങ്കയിലാക്കിയിരിക്കയാണ്.
രോഗ ബാധയെ തുടര്‍ന്ന് കഴിഞ്ഞ ഒന്നര മാസമായി വിളവെടുപ്പിലും മാന്ദ്യതയായിരുന്നു. ചെടികളുടെ ഇലയും വള്ളികളും കരിഞ്ഞുണങ്ങി മുന്തിരി കുലകളുടെ വളര്‍ച്ച മുരടിച്ച തോട്ടങ്ങളാണ് ഏറെയും. തേനി ജില്ലയില്‍ മുന്തിരി ഉല്‍പാദനം പകുതിയായി കുറഞ്ഞു. എല്ലാ സീസണിലും വിളവെടുപ്പ് നടത്താവുന്ന വിധമാണ് കര്‍ഷകര്‍ മുന്തിരി തോട്ടങ്ങള്‍ ഒരുക്കിയിരുന്നത്. മുന്തിരി കായ്ച്ച് തുടങ്ങിയാല്‍
നാലു മാസത്തോളം വിളവെടുപ്പ് നടത്താനാകും. എന്നാല്‍ ചാര രോഗം കൃഷിയുടെ താളം തെറ്റിച്ചു. വിളവെടുപ്പ് കഴിയുന്ന തോട്ടങ്ങളിലെ ചെടികളില്‍ നിന്ന് പഴകിയതും വരണ്ടതുമായ വള്ളികള്‍ വെട്ടി വെടിപ്പാക്കി അടുത്ത കൃഷിക്ക് തോട്ടങ്ങള്‍ ഒരുക്കുകയാണ് കൃഷി രീതി. കത്തുന്ന വെയിലും മഞ്ഞു വീഴ്ചയും തുടര്‍ന്നാല്‍ മുന്തിരി കൃഷിയെ ദോഷമായി തന്നെ ബാധിക്കും. രണ്ടിനം മുന്തിരിയാണ് തേനി ജില്ലയില്‍ കൃഷി ചെയ്യുന്നത്. ഓടപെട്ടിയിലാണ് അരിയില്ലാത്ത പച്ച മുന്തിരി കൃഷി വ്യാപകമായുള്ളത്. സുരുളി പെട്ടി, ഗുഡല്ലൂര്‍, കെ.ജി. പെട്ടി, കാമയ്യാ കൗണ്ടര്‍ പെട്ടി, രാജപ്പന്‍ പെട്ടി എന്നിവിടങ്ങളിലെല്ലാം നിരവധി മുന്തിരി തോട്ടങ്ങളുണ്ട്. തമിഴ്‌നാട്ടിലെ മുന്തിരി ഉല്‍പാദനത്തിന്റെ എഴുപത് ശതമാനവും കേരളത്തിലാണ് വിറ്റഴിയുന്നത്. മുന്തിരിതോട്ടങ്ങള്‍ കാണാനും മുന്തിരി കായ്ച്ച് കിടക്കുന്ന തോട്ടങ്ങളില്‍ നിന്ന് സെല്‍ഫിയെടുക്കാനെത്തുന്ന മലയാളികള്‍ ഏറെയാണ്. തേക്കടി കാണാനെത്തുന്ന സഞ്ചാരികള്‍ കമ്പത്തെ മുന്തിരി തോട്ടങ്ങളും സന്ദര്‍ശിച്ചാണ് മടങ്ങുക. മുന്തിരി വൈനും, ജ്യൂസും തോട്ടങ്ങളില്‍ തന്നെ ലഭ്യമാണ്. തോട്ടങ്ങളില്‍ മുന്തിരി കുലകള്‍ മുഴുവനായി കീടനാശിനിയില്‍ മുക്കിയാണ് മൂപ്പെത്തിക്കുന്നത്. കീടനാശിനിയുടെ പ്രയോഗം അധികമായതിനാല്‍ തോട്ടങ്ങളില്‍ നിന്ന് മുന്തിരി ജ്യൂസ് കഴിക്കുന്നവരുടെ എണ്ണവും വിരളമാണ്.
