തൊടുപുഴ: തെരുവുനായ ശല്യം രൂക്ഷമാകുമ്പോഴും ജില്ലയിലെ എ.ബി.സി സെന്റര്‍ നിര്‍മാണം അനിശ്ചിതത്വത്തില്‍. എ.ബി.സി സെന്റര്‍ ഇല്ലാത്ത ഏക ജില്ലയായ ഇടുക്കിയില്‍ സെന്റര്‍ നിര്‍മിക്കാനുള്ള നടപടികള്‍ തുടങ്ങിയിട്ട് വര്‍ഷങ്ങള്‍ പിന്നിട്ടെങ്കിലും തറക്കല്ലിടല്‍ മാത്രമായി പ്രവര്‍ത്തനം ഒതുങ്ങി. കുയിലിമലയില്‍ ജില്ലാ പഞ്ചായത്ത് വിട്ടു നല്‍കിയ അരയേക്കര്‍ സ്ഥലത്താണ് നായ്ക്കളുടെ വന്ധ്യംകരണത്തിനും മറ്റുമായുള്ള എബിസി സെന്റര്‍ നിര്‍മിക്കുന്നത്.
നായ കടിയേൽക്കുന്നവരുടെ എണ്ണത്തിൽ ദിനംപ്രതി വർദ്ധന
എ.ബി.സി സെന്റര്‍ നിര്‍മാണം അനന്തമായി നീളുകയാണെങ്കിലും ജില്ലയില്‍ നായ്ക്കളുടെ കടിയേല്‍ക്കുന്നവരുടെ എണ്ണത്തില്‍ കുറവില്ല.
കഴിഞ്ഞ ദിവസം മാത്രം ജില്ലയില്‍ നായ്ക്കളുടെ കടിയേറ്റത് 13 പേര്‍ക്കാണ്. ഈ മാസം ഇതുവരെ നായയുടെ കടിയേറ്റ് ജില്ലയിലെ സര്‍ക്കാര്‍ ആശുപത്രികളില്‍ എത്തിയവര്‍ 283 പേരാണ്. തെരുവുനായ്ക്കളുടെ ആക്രമണത്തില്‍ പരിക്കേറ്റവരും വളര്‍ത്തുനായയുടെ കടിയേറ്റവരും ഇതില്‍ ഉള്‍പ്പെടുന്നു. ജില്ലയുടെ വിവിധ ഭാഗങ്ങളില്‍ തെരുവുനായ ശല്യം രൂക്ഷമാണ്.
നിരത്തുകൾ കീഴടക്കി തെരുവ് നായകൾ
രാപകല്‍ ഭേദമില്ലാതെ അലഞ്ഞുതിരിയുന്ന നായ്ക്കള്‍ ജനങ്ങളെ ആക്രമിക്കുന്ന സംഭവങ്ങളും വര്‍ധിച്ചു. രാത്രിസമയത്തു തിരക്കൊഴിഞ്ഞാല്‍ പല ടൗണുകളും നിരത്തുകളും നായ്ക്കള്‍ കൈയടക്കുന്ന സ്ഥിതിയാണ്. കാല്‍നട യാത്രക്കാര്‍ക്കാണ് ഇവ കൂടുതല്‍ ഭീഷണി. കൊച്ചുകുട്ടികള്‍ മുതല്‍ മുതിര്‍ന്നവര്‍ വരെ ആക്രമണത്തിന് ഇരകളായിട്ടുണ്ട്. നായ്ക്കള്‍ റോഡിനു കുറുകെ ചാടി വാഹനങ്ങള്‍ക്കും ഭീഷണി ഉയര്‍ത്തുന്നു. തെരുവുനായ്ക്കള്‍ വളര്‍ത്തുമൃഗങ്ങളെ ആക്രമിച്ചു കൊന്ന സംഭവങ്ങളും ഒട്ടേറെയുണ്ട്.
3.5 കോടിയുടെ പദ്ധതി
കുയിലിമലയില്‍ എബിസി സെന്റര്‍ നിര്‍മിക്കാനായി മൂന്നരക്കോടിയുടെ പദ്ധതിയാണ് തയാറാക്കിയത്. ജില്ലയുടെ പല ഭാഗത്തും അലഞ്ഞുതിരിയുന്ന തെരുവുനായ്ക്കളെ കണ്ടെത്തി പിടികൂടി വാഹനത്തില്‍ കയറ്റി എബിസി സെന്ററില്‍ എത്തിച്ചു വന്ധ്യംകരിച്ചു പരിപാലിക്കുന്നതിനാണു ലക്ഷ്യം.
നേരത്തെ രണ്ട് ബ്ലോക്കുകളുടെ പരിധിയില്‍ ഒരു സെന്റര്‍ വീതം നാല് കേന്ദ്രങ്ങള്‍ ആരംഭിക്കാനായിരുന്നു പദ്ധതിയിട്ടിരുന്നതെങ്കിലും പ്രദേശവാസികളുടെ എതിര്‍പ്പിനെ തുടര്‍ന്ന് ഇത് തുടങ്ങാനായില്ല. തുടര്‍ന്നാണ് ജില്ലാ ആസ്ഥാനത്ത് ജനവാസമേഖലയില്‍ നിന്നും മാറി സെന്റര്‍ തുടങ്ങാന്‍ ജില്ലാ പഞ്ചായത്ത് തീരുമാനിച്ചത്. കുയിലിമല മൈക്രോവേവ് റോഡിനു സമീപമാണ് നിര്‍മിക്കുന്നത്. ഇവിടെ നിന്നിരുന്ന മരങ്ങള്‍ മുറിച്ചു മാറ്റുകയും നിര്‍മാണ പ്രവര്‍ത്തനത്തിനു തുടക്കമിടുന്നതിന്റെ ഭാഗമായി ശിലാസ്ഥാപനം നടത്തുകയും ചെയ്തു.
20 ലക്ഷം രൂപ ജില്ലാ പഞ്ചായത്ത് വിഹിതവും ബാക്കി ജില്ലയിലെ ബ്ലോക്ക്, ഗ്രാമ പഞ്ചായത്തുകളുടെ ഫണ്ട് വിഹിതവും ചേര്‍ത്ത് നിര്‍മാണം നടത്തായിരുന്നു പദ്ധതി. എന്നാല്‍ ജില്ലാ പഞ്ചായത്ത് തുക വകയിരുത്തിയെങ്കിലും ഗ്രാമ, ബ്ലോക്ക് പഞ്ചായത്തുകളുടെ വിഹിതമായ തുക ലഭ്യമാകാത്തതാണ് പദ്ധതിയ്ക്ക് തടസമായി നില്‍ക്കുന്നതെന്ന് ജില്ലാ പഞ്ചായത്ത് പ്രസിഡന്റ് രാരിച്ചന്‍ നീറണാക്കുന്നേല്‍ പറഞ്ഞു. ജില്ലാ പഞ്ചായത്തിന്റെ ഫണ്ട് വിനിയോഗിച്ചാണ് ഇതു വരെയുള്ള പ്രവര്‍ത്തനങ്ങള്‍ നടത്തിയത്. ധനമന്ത്രിയുമായി ബന്ധപ്പെട്ട് ഈ സാമ്പത്തിക വര്‍ഷം തന്നെ ഫണ്ട് ലഭ്യമാക്കുന്നതിനുള്ള നടപടികള്‍ സ്വീകരിക്കുമെന്നും ലഭിയ്ക്കുന്ന മുറയ്ക്ക് നിര്‍മാണ പ്രവര്‍ത്തനം ഊര്‍ജിതമാക്കുമെന്നും അദ്ദേഹം പറഞ്ഞു.
