രാജകുമാരി: ചിന്നക്കനാൽ 301 കോളനിയിൽ വീണ്ടും വീടുകൾക്ക് നേരെ കാട്ടാന ആക്രമണം. ശനിയാഴ്ച രാത്രി 301 കോളനി ഇടിക്കുഴി സ്വദേശികളായ സാവിത്രി, ലക്ഷ്മി എന്നിവരുടെ വീടുകൾക്ക് നേരെയാണ് ചക്കക്കൊമ്പന്റെ ആക്രമണം ഉണ്ടായത്. ഈ സമയം രണ്ടു വീടുകളിലും ആളുകൾ ഉണ്ടായിരുന്നില്ല. രണ്ട് വീടുകളുടെയും ഭിത്തി തകർത്ത ചക്കക്കൊമ്പൻ വീട്ടുപകരണങ്ങളും നശിപ്പിച്ചു. ഒരിടവേളയ്ക്ക് ശേഷമാണ് 301 കോളനിയിൽ കാട്ടാന ആക്രമണം ഉണ്ടാകുന്നത്. 301 കോളനിക്ക് സമീപം ഇന്നലെ പകലും ചക്കക്കൊമ്പൻ നിലയുറപ്പിച്ചിട്ടുണ്ടായിരുന്നു. ആനയിറങ്കൽ ജലാശയത്തിന്റെ മറുകരയിൽ ശങ്കരപാണ്ഡ്യമെട്ടിന് സമീപം മറ്റൊരു കാട്ടാനക്കൂട്ടവും ഉണ്ടായിരുന്നു.
