അടിമാലി: ടൂറിസം രംഗത്ത് വനിതകളുടെ പ്രാധാന്യം ഉറപ്പാക്കി ആഗോള വനിതാ സമ്മേളനത്തിന് മൂന്നാറിൽ തുടക്കമായി. മൂന്നു ദിവസം നീണ്ടുനിൽക്കുന്ന സമ്മേളനം മൂന്നാർ വിരിപാറ ഗ്രാൻ്റ് ക്ലിഫ് റിസോർട്ടിലാണ് നടക്കുന്നത്.
കേരള റെസ്‌പോൺസിബിൾ ടൂറിസം മിഷൻ സൊസൈറ്റിയും, സംസ്ഥാന സർക്കാരിൻ്റെ ടൂറിസം വകുപ്പും ചേർന്നാണ് പരിപാടി സംഘടിപ്പിച്ചത്. വിനോദ സഞ്ചാരത്തെയും ഉത്തരവാദിത്ത ടൂറിസത്തെയും കുറിച്ചുള്ള ആഗോള വനിതാ സമ്മേളനത്തിനാണ് മൂന്നാറിൽ തുടക്കമായത്. ലിംഗഭേദം ഉൾക്കൊള്ളുന്നതും സ്ത്രീ സൗഹൃദവുമായ വിനോദസഞ്ചാരം പ്രോത്സാഹിപ്പിക്കുന്നതിനുള്ള കേരളത്തിൻ്റെ ശ്രമങ്ങളെ മുന്നോട്ട്
കൊണ്ടു പോവുകയാണ് പദ്ധതിയുടെ ലക്ഷ്യം. ഡിസംബർ 2 ന് സമാപിക്കും. സാമൂഹിക പങ്കാളിത്തത്തിനും പാരിസ്ഥിതിക സുസ്ഥിരതയ്ക്കും ഊന്നൽ നൽകിക്കൊണ്ട് ആഗോളതലത്തിൽ പ്രശംസ നേടിയ ഉത്തരവാദിത്ത ടൂറിസം (ആർ.ടി) സംരംഭത്തിലൂടെ സ്ത്രീ സൗഹൃദവും സുസ്ഥിരവുമായ ടൂറിസം പ്രവർത്തനങ്ങളിൽ കേരളത്തിൻ്റെ നേട്ടങ്ങൾ പ്രദർശിപ്പിക്കാൻ ഈ പരിപാടി ലക്ഷ്യമിടുന്നതായി ഭാരവാഹികൾ പറഞ്ഞു. ആഗോള വിദഗ്ധർ, പങ്കാളികൾ, നയരൂപകർത്താക്കൾ എന്നിവരുമായി കോൺഫറൻസ് ചർച്ച ചെയ്യും. പ്രധാന സെഷനുകൾക്ക് പുറമേ, സഹകരണത്തിനുള്ള വിലയേറിയ അവസരങ്ങൾ സൃഷ്ടിക്കുന്നതിനായി ഒരു സമർപ്പിത ത്രിദിന പ്രദർശനവും ബി2ബി നെറ്റ്‌വർക്കിംഗ് സെഷനും സംഘടിപ്പിക്കും. ഓൺലെെ ലിനൂടെ സംസ്ഥാന ടൂറിസം വകുപ്പ് മന്ത്രി മുഹമ്മദ് റിയാസ് ഉദ്ഘാടനം ചെയ്തു. അഡ്വ.
ഡീൻ കുര്യാക്കോസ് എം.പി ഭദ്രദീപം തെളിയിച്ചു. അഡ്വ. എ.രാജ എം.എൽ.എ അധ്യക്ഷത വഹിച്ചു. ഇൻ്റർനാഷണൽ സെൻ്റർ ഫോർ റെസ്‌പോൺസിബിൾ ടൂറിസം ഗ്ലോബൽ ചെയർമാൻ ഡോ. ഹരോൾഡ് ഗുഡ്‌വിൻ മുഖ്യ പ്രഭാഷണം നടത്തി. ടൂറിസം സെക്രട്ടറി ബിജു പ്രഭാകർ, ടൂറിസം ഡയറക്ടർ ഷിഖ സുരേന്ദ്രൻ, കേരള റസ്പോൻസിബിൾ ടൂറിസം മിഷൻ സി.ഇ.ഒ: ഡോ. രൂപേഷ് കുമാർ, ജിഷ ദിലീപ്, എസ്. സ്വാമിനാഥൻ, അഡ്വ . എം. ഭവ്യ, പ്രവീൺ ജോസ് എന്നിവർ പ്രസംഗിച്ചു.
