ഇടുക്കി: കുമളി ബസ് സ്റ്റാന്റില്‍ കെ.എസ്.ആര്‍.ടി.സി ബസ് യാത്രികന്റെ കാലിലൂടെ കയറിയിറങ്ങി. തിങ്കളാഴ്ച ഉച്ചകഴിഞ്ഞാണ് സംഭവം നടന്നത്. തമിഴ്‌നാട് സ്വദേശിയായ പി. രാസുവിനാണ് ഗുരുതരമായി പരുക്കേറ്റത്. മധുരയില്‍ നിന്ന് കൊല്ലത്തേക്ക് പോവുകയായിരുന്ന കെ.എസ്.ആര്‍.ടി.സി ബസ് സ്റ്റാന്റിനുള്ളിലേക്ക് പ്രവേശിക്കുന്നതിനിടെ ബസിന് മുന്നിലൂടെ കടന്നുപോവുകയായിരുന്ന രാസുവിന്റെ കാല്‍ ടയറിനടിയില്‍പ്പെടുകയായിരുന്നു. കാലിന്റെ മുട്ടിന് താഴെ ടയര്‍ കയറിയിറങ്ങിയതിനെ തുടര്‍ന്ന് ഇദ്ദേഹത്തിന് സാരമായ പരുക്കേറ്റു. ഉടന്‍ തന്നെ ബസ് കണ്ടക്ടറും നാട്ടുകാരും ചേര്‍ന്ന് രാസുവിനെ കുമളിയിലെ സ്വകാര്യ ആശുപത്രിയില്‍ എത്തിച്ച് പ്രഥമശുശ്രൂഷ നല്‍കി. കൂടുതല്‍ വിദഗ്ധ ചികിത്സയ്ക്കായി അദ്ദേഹത്തെ തേനി മെഡിക്കല്‍ കോളജിലേക്ക് മാറ്റി.
