മറയൂര്‍: ആറുവയസുകാരിയെ പീഡിപ്പിച്ച കേസില്‍ മൊബൈല്‍ ടവര്‍ കേന്ദ്രീകരിച്ച് നടത്തിയ അന്വേഷണത്തില്‍ പ്രതി മറയൂര്‍ പോലീസിന്റെ പിടിയിലായി. കളമശേരി തൃത്താക്കര തലക്കോട്ടില്‍ വീട്ടില്‍ നിരഞ്ജന്‍ (19) ആണ് അറസ്റ്റിലായത്. ഇതര സംസ്ഥാന തൊഴിലാളികളുടെ മകളായ ആറുവയസുകാരിയെ കളമശേരിയില്‍ വച്ച് ഒരു മാസത്തിനിടെ രണ്ട് തവണ ലൈംഗികമായി പീഡിപ്പിച്ചുവെന്നാണ് കളമശേരി പോലീസ് സ്റ്റേഷനില്‍ ലഭിച്ച പരാതി.
പരാതിയെ തുടര്‍ന്ന് അന്വേഷണം ആരംഭിച്ച പോലീസ്, പ്രതിയുടെ മൊബൈല്‍ ലൊക്കേഷന്‍ മറയൂര്‍-കാന്തല്ലൂര്‍ ഭാഗത്ത് ലഭിച്ചതിനെ തുടര്‍ന്ന് മറയൂര്‍ പോലീസിനെ വിവരമറിയിച്ചു. തുടര്‍ന്ന് മറയൂര്‍ എസ്.ഐ. മാഹിന്‍ സലിമിന്റെ നേതൃത്വത്തില്‍ സി.പി.ഒ.മാരായ സജുസണ്‍, ഹരികൃഷ്ണന്‍, ആല്‍ബിന്‍ ജോസഫ് എന്നിവര്‍ ഉള്‍പ്പെട്ട സംഘം, കാന്തല്ലൂര്‍ ഭ്രമരം വ്യൂ പോയിന്റില്‍ അഞ്ചംഗ സംഘത്തോടൊപ്പം വിനോദസഞ്ചാരിയായി എത്തിയ പ്രതിയെ കസ്റ്റഡിയിലെടുത്തു.
മറയൂര്‍ പോലീസ് സ്റ്റേഷനില്‍ കസ്റ്റഡിയില്‍ വെച്ചിരുന്ന പ്രതിയെ കളമശേരി പോലീസ് എത്തി ഏറ്റെടുത്ത് കൊണ്ടുപോയി.
