ഇടുക്കി: വെണ്‍മണിയില്‍ ബൈക്കിലെത്തി വീട്ടമ്മയുടെ മാലപൊട്ടിച്ചു കടന്ന കേസിലെ പ്രതി കരുണാപുരം കമ്പംമെട്ട് സ്വദേശി വീരാളശേരില്‍ അമല്‍സജി(24)യെ കഞ്ഞിക്കുഴി പോലീസ് അറസ്റ്റു ചെയ്തു. ഞായറാഴ്ച പുലര്‍ച്ചെ കമ്പംമെട്ടില്‍ നിന്നാണ് ഇയാളെ പിടികൂടിയത്. ഇയാളെ കോടതിയില്‍ ഹാജരാക്കി.സജിയും ഇയാളുടെ സുഹൃത്ത് ചേര്‍ത്തല പട്ടണക്കാട് സ്വദേശി കാട്ടുംകാട്ടയില്‍ ലിഖിന്‍ ഇഗ്‌നേഷ്യസും (24) ചേര്‍ന്നാണ് മാല പൊട്ടിച്ച് കടന്നത്. ലിഖിനെ പോലീസ് ചേര്‍ത്തലയില്‍ നിന്നും പിടികൂടി. ഇയാളെ തിങ്കളാഴ്ച കോടതിയില്‍ ഹാജരാക്കും. .കഴിഞ്ഞ
പതിനൊന്നിന് ഉച്ചകഴിഞ്ഞ് മൂന്നിന് പശുവിന് പുല്ലുചെത്താന്‍ പോയ വീട്ടമ്മ വള്ളി യാംതടത്തില്‍ ബേബിയുടെ ഭാര്യ സിമിലി ( 61 ) പുല്ലു കെട്ടുമായി തിരികെ വീട്ടിലേക്കു പോകുന്ന വഴി ഇവരുടെ കഴുത്തില്‍ക്കിടന്ന നാലര പവന്‍ തൂക്കമുള്ള മാലയാണ് ബൈക്കിലെത്തിയ ഇവര്‍ പൊട്ടിച്ചു കടന്നത്. കറുത്ത ബൈക്കിലെത്തിയ ഇവര്‍ സിമിലിയുടെ സമീപം ബൈക്കു നിര്‍ത്തി. തുടര്‍ന്ന് പിലിരുന്നയാള്‍ ബൈക്കില്‍ നിന്നിറങ്ങി വന്നു വണ്ണപ്പുറത്തേക്കുള്ള വഴി ചോദിച്ചു. ഇവര്‍ വഴി പറഞ്ഞു കൊടുക്കുന്നതിനിടയില്‍ കഴുത്തില്‍ക്കിടന്ന മാല പൊട്ടിച്ചു ബൈക്കില്‍ കയറി സ്ഥലം വിട്ടു രണ്ടുപേരും ഹെല്‍മെറ്റും ജാക്കറ്റും ധരിച്ചിട്ടുണ്ടായിരുന്നു. ഇതുമൂലം ആളെ തിരിച്ചറിയാന്‍ കഴിഞ്ഞില്ല
സി.സി.ടി.വി കാമറ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ കണ്ടെത്തിയത്. രണ്ടു പേരും എറണാകുളത്ത് ഒരുമിച്ച് ജോലി ചെയ്യുന്ന വരാണ്. കടം വീട്ടാന്‍ വേണ്ടി ഇരുവരും ചേര്‍ന്ന് ആസൂത്രണം ചെയ്തതാണ് മാലപറിക്കലെന്ന് പോലീസ് പറഞ്ഞു.
