ഒരാളെ നാട്ടുകാര്‍ പിടികൂടി പോലീസിന് കൈമാറി; രണ്ട് പ്രതികള്‍ രക്ഷപെട്ടു
തൊടുപുഴ: ഇരുചക്ര വാഹനത്തിലെത്തി വയോധികനെ ഇടിച്ച് വീഴ്ത്തി മൊബൈല്‍ ഫോണും പണവും കവര്‍ന്ന് രക്ഷപെടാന്‍ ശ്രമിച്ച കാപ്പാ കേസ് പ്രതികളായ മൂന്നംഗ സംഘത്തില്‍ ഒരാളെ നാട്ടുകാര്‍ പിടികൂടി പോലീസില്‍ ഏല്‍പ്പിച്ചു. കുമാരമംഗലം മാളിയേക്കല്‍ വീട്ടില്‍ ഷംസുദ്ദീന്‍ എന്ന വയോധികനാണ് അക്രമത്തിനിരയായത്. സംഭവത്തില്‍ തൊടുപുഴ ഉണ്ടപ്ലാവ് സ്വദേശി കാരകുന്നേല്‍ വീട്ടില്‍ ഷിനില്‍ റസാഖി (തക്കുടു -29) നെ കോടതി റിമാന്‍ഡ് ചെയ്തു. തൊടുപുഴ കുമാരമംഗലത്ത് വ്യാഴാഴ്ച വൈകിട്ട് നാലരയോടെയായിരുന്നു സംഭവം. കുമാരമംഗലം കറുക ഭാഗത്ത് റോഡരികില്‍ കൂടി കാല്‍നടയായി സഞ്ചരിക്കുകയായിരുന്നു ഷംസുദ്ദീന്‍. ഈ സമയം ഇതുവഴി ബൈക്കിലെത്തിയ പ്രതികള്‍ ഷംസുദ്ദിനെ ഇരുചക്ര വാഹനം കൊണ്ടിടിച്ച് വീഴ്ത്തി. തുടര്‍ന്ന് പഴ്സിലുണ്ടായിരുന്ന 3000 ത്തോളം രൂപയും മൊബൈല്‍ ഫോണും തട്ടിയെടുത്തു. ഇതിനെ എതിര്‍ത്തപ്പോള്‍ പ്രതികള്‍ ഷംസുദ്ദിനെ തലയില്‍ ഉള്‍പ്പെടെ ക്രൂരമായി മര്‍ദ്ദിച്ചു. ഷംസുദ്ദിന്റെ കരച്ചില്‍ കേട്ട് നാട്ടുകാര്‍ ഓടിയെത്തി. അപ്പോഴേക്കും മൂവര്‍ സംഘം ഇരുചക്ര വാഹനത്തില്‍ രക്ഷപെടാന്‍ ശ്രമിച്ചു. ഇതില്‍ ഒരാളായ ഷിനില്‍ റസാഖിനെ നാട്ടുകാര്‍ പിടികൂടി. തുടര്‍ന്ന് നാട്ടുകാര്‍ അറിയിച്ചതനുസരിച്ച് തൊടുപുഴയില്‍ നിന്നെത്തിയ പോലീസിന് ഷിനിലിനെ കൈമാറി. ഇയാളുടെ അറസ്റ്റ് രേഖപ്പെടുത്തിയ ശേഷം ഇന്നലെ കോടതിയില്‍ ഹാജരാക്കി റിമാന്‍ഡ് ചെയ്തു. ഇയാള്‍ക്കൊപ്പമുണ്ടായിരുന്ന രണ്ട് കൂട്ടു പ്രതികളെ തിരിച്ചറിഞ്ഞിട്ടുണ്ട്. സംഭവത്തിന് ശേഷം ഒളിവില്‍ പോയ ഇരുവരെയും പിടികൂടാന്‍ അന്വേഷണം ഊര്‍ജിതമാക്കിയതായി പോലീസ് പറഞ്ഞു. പ്രതികള്‍ മൂവരും കാപ്പ കേസില്‍ ഉള്‍പ്പെടുത്തി നാട് കടത്തിയവരാണ്. ജയിലില്‍ നിന്നും തിരികെ വന്ന ശേഷമാണ് വീണ്ടും അതിക്രമം നടത്തിയിരിക്കുന്നത്. തലയ്ക്ക് സാരമായി പരുക്കേറ്റ ഷംസുദ്ദീന്‍ തൊടുപുഴ ജില്ലാ ആശുപത്രിയില്‍ ചികിത്സ തേടി.
