ക്രിസ്ത്യന്‍ പള്ളിയുടെ പോസ്റ്റര്‍ ഉപയോഗിച്ചുള്ള പ്രചരണം വിവാദത്തിലേക്ക്
തൊടുപുഴ: ആസന്നമായ തദേശ-നിയമസഭാ തെരഞ്ഞെടുപ്പുകള്‍ മുന്നില്‍ കണ്ട് ബി.ജെ.പിയുടെ രാഷ്ട്രീയ തന്ത്രം. ക്രിസ്ത്യന്‍ പള്ളിയുടെ പോസ്റ്റര്‍ ഉപയോഗിച്ച് ബി.ജെ.പി ന്യൂനപക്ഷ മോര്‍ച്ചയെ ഉപയോഗിച്ച് പ്രധാനമന്ത്രി നരേന്ദ്ര മോദിയുടെ 75-ാം ജന്മ ദിനം ആഘോഷിക്കാനുള്ള സംഭവം തൊടുപുഴയില്‍ വിവാദമായി.
മുതലക്കോടം സെന്റ് ജോര്‍ജ് ഫൊറോന പള്ളിയുടെ ചിത്രം വച്ച് ബി.ജെ.പി ന്യൂനപക്ഷ മോര്‍ച്ച ജില്ലാ കമ്മിറ്റിയുടെ നേതൃത്വത്തില്‍ സമൂഹ മാധ്യമങ്ങളിലൂടെ പ്രചരിപ്പിച്ച പോസ്റ്ററാണ് ഇപ്പോള്‍ വിവാദത്തിന് ആദാരം. പ്രധാനമന്ത്രി നരേന്ദ്ര മോദിയുടെ 75-ാം ജന്മ ദിനമായ ബുധനഴാഴ്ച രാവിലെ മുതലക്കോടം പള്ളിയില്‍ കുര്‍ബാനയും കേക്ക് മുറിക്കലും നടത്തുമെന്നായിരുന്നു പോസ്റ്ററില്‍ കൂടി പ്രചരിപ്പിച്ചത്. ന്യൂന പക്ഷ മോര്‍ച്ച ജില്ല പ്രസിഡന്റ് ജോയി കോയിക്കകുടിയുട നേതൃത്വത്തില്‍ നടത്തുന്ന ആഘോഷ പരിപാടികളില്‍ ബി.ജെ.പി സംസ്ഥാന വൈസ് പ്രസിഡന്റ് ഷോണ്‍ ജോര്‍ജ്, ദേശീയ ഉപാധ്യക്ഷന്‍ നോബിള്‍ മാത്യു, ബി.ജെ.പി ഇടുക്കി നോര്‍ത്ത് ജില്ല പ്രസിഡന്റ് പി.പി സാനു തുടങ്ങിയവര്‍ പങ്കെടുക്കുമെന്നാണ് പോസ്റ്ററില്‍ ഉണ്ടായിരുന്നത്. പ്രധാന മന്ത്രിയുടെ ഉള്‍പ്പെടെയുള്ള ഏഴ് നേതാക്കളുടെ ചിത്രവും അതിനടിയില്‍ പശ്ചാത്തലമായി മുതലക്കോടം പള്ളിയുടെ ഫോട്ടോയും ഉണ്ടായിരുന്നു. ഇത് സമൂഹ മാധ്യമത്തിലൂടെ പ്രചരിച്ചതോടെ ഒരു വിഭാഗം ആളുകള്‍ പ്രതിഷേധവുമായി രംഗത്ത് വന്നിരുന്നു. അതേ സമയം കോതമംഗലം രൂപതക്കോ മുതലക്കോടം ഇടവകക്കോ ഇത്തരത്തിലുള്ള ആഘോഷവുമായി ഒരു ബന്ധവുമില്ലെന്ന് വികാരി ഫാ. സെബാസ്റ്റ്യന്‍ ആരോലിച്ചാലില്‍ ഇടവകക്കാര്‍ക്കായി പുറത്തിറക്കിയ കുറിപ്പില്‍ വ്യക്തമാക്കി. പോസ്റ്ററില്‍ പറയുന്നതു പോലെയുള്ള ഒരു ആഘോഷ പരിപാടികളും പള്ളിയില്‍ നടന്നിട്ടില്ല. പള്ളിയുടെ ചിത്രം ഉപയോഗിച്ച് പോസ്റ്റര്‍ നിര്‍മിച്ചതിനെ അപലപിക്കുന്നുവെന്നും രാഷ്ട്രീയ ലക്ഷ്യത്തിനു വേണ്ടിയോ ലാഭത്തിനു വേണ്ടിയോ കൂദാശകളെയും പള്ളിയെയും പള്ളി പരിസരത്തെയും ഉപയോഗിക്കുന്നത് അംഗീകരിക്കാനാവില്ലെന്നും വികാരി കുറിപ്പില്‍ വ്യക്തമാക്കി. പള്ളിയില്‍ കുര്‍ബ്ബാനയ്ക്കിടെയും വികാരി ഇക്കാര്യം ആവര്‍ത്തിച്ചു.
അതേ സമയം തങ്ങള്‍ പള്ളിയില്‍ കുര്‍ബാനക്ക് പണം നല്‍കിയിരുന്നുവെന്നും തുടര്‍ന്ന് കുരിശിന് സമീപം 75 തിരികള്‍ കത്തിച്ചതായും ന്യൂനപക്ഷ മോര്‍ച്ച ജില്ലാ പ്രസിഡന്റ് ജോയി കോയിക്കക്കുടി പറഞ്ഞു. പിന്നീട് മുതലക്കോടത്ത് തന്നെയുള്ള റിട്ടയര്‍ ചെയ്ത വൈദികര്‍ താമസിക്കുന്ന സാന്‍ജോ ഭവനില്‍ എത്തിയാണ് കേക്ക് മുറിച്ചതെന്നും വിവിധ മേഖലകളില്‍ നിന്ന് വരുന്ന പ്രവര്‍ത്തകര്‍ക്ക് സ്ഥലം അറിയുന്നതിനാണ് പള്ളിയുടെ ചിത്രം കൂടി പോസ്റ്ററില്‍ ഉള്‍പ്പെടുത്തിയതെന്നും ജോയി പറഞ്ഞു
