തൊടുപുഴ: ഉടുമ്പന്നൂര്‍ ഗ്രാമപഞ്ചായത്തില്‍ നടപ്പിലാക്കുന്ന സംയോജിത കൃഷി ജനകീയ കാമ്പെയിനിന്റെ ഭാഗമായി നടപ്പാക്കുന്ന നിറപ്പൊലിമ പദ്ധതിയിലൂടെ പൂപ്പാടങ്ങളില്‍ പങ്കാളികളാവുകയാണ് കുടുംബശ്രീ പ്രവര്‍ത്തകര്‍. കൃഷിക്കൂട്ടങ്ങളുടെയും മറ്റ് വ്യക്തിഗത കൃഷിക്കാരുടെയും നേതൃത്വത്തില്‍ നാടിന്റെ പച്ചക്കറിയും പൂക്കളുമായി ഓണത്തെ വരവേല്‍ക്കുക എന്നതാണ് പദ്ധതിയുടെ ലക്ഷ്യം. ഇതിനായി പഞ്ചായത്തിന്റെ പല പ്രദേശങ്ങളിലായി 21 ഏക്കര്‍ സ്ഥലത്ത് വിവിധ ഇനം പച്ചക്കറികളുടെയും ഏഴ് ഏക്കര്‍ സ്ഥലത്ത് ചെണ്ടുമല്ലി പൂക്കളുടേയും കൃഷി ആരംഭിച്ചിരുന്നു. ഈ സംരംഭവുമായി കൈകോര്‍ത്തു കൊണ്ടാണ് കുടുംബശ്രീ ഗ്രൂപ്പുകളുടെ നേതൃത്വത്തില്‍ നിറപ്പൊലിമ പദ്ധതി ആരംഭിച്ചിട്ടുള്ളത്.
സംസ്ഥാനമൊട്ടാകെ ജനകീയ പങ്കാളിത്തത്തോടെ നടപ്പിലാക്കുന്ന സംയോജിത കൃഷി കാമ്പെയിനിന്റെ ഭാഗമായി സെപ്റ്റംബര്‍ ഒന്ന് മുതല്‍ ഗ്രാമപഞ്ചായത്തിന്റെ നേതൃത്വത്തില്‍ ഉടുമ്പന്നൂരിന്റെ പച്ചക്കറികളും പൂക്കളുമായി ഓണവിപണി ഒരുക്കുമെന്ന് പഞ്ചായത്ത് അധികൃതര്‍ അറിയിച്ചു. ഇടമറുക് വാര്‍ഡില്‍ നടന്ന നടീല്‍ ഉത്സവം ഗ്രാമപഞ്ചായത്ത് പ്രസിഡന്റ് എം. ലതീഷ് ഉത്ഘാടനം ചെയ്തു.
ചടങ്ങില്‍ സി.ഡി.എസ് വൈസ് ചെയര്‍പേഴ്‌സണ്‍ ജയശ്രീ ഗോപാലകൃഷ്ണന്‍ അധ്യക്ഷയായി. കൃഷി ഓഫീസര്‍ കെ. അജിമോന്‍, സി.ഡി.എസ് അംഗം ഉഷ പി.ജി,
ഗ്രാമപഞ്ചായത്ത് ആരോഗ്യ- വിദ്യാഭ്യാസ സ്ഥിരം സമിതി അധ്യക്ഷ സുലൈഷ സലിം, എ.ഡി.എസ് ചെയര്‍പേഴ്‌സണ്‍ മോളി മാത്യൂസ് തുടങ്ങിയവര്‍ സംസാരിച്ചു.
