തൊടുപുഴ: സിപിഐ ഇടുക്കി ജില്ലാ സമ്മേളനം ജൂലൈ 17 ,18 ,19 ,20 തീയതികളിൽ കട്ടപ്പനയിൽ നടക്കുമെന്ന് സിപിഐ ജില്ലാ സെക്രട്ടറി കെ സലിംകുമാർ വാർത്താ സമ്മേളനത്തിൽ പറഞ്ഞു. ചണ്ഡീഗഡിൽ നടക്കുന്ന ഇരുപത്തിയഞ്ചാം പാർട്ടി കോൺഗ്രസിന്റെ മുന്നോടിയായി നടക്കുന്ന സമ്മേളനം രാജ്യത്തിലെ രാഷ്ട്രീയ സാഹചര്യങ്ങളും, ജില്ലയിലെ ജനങ്ങൾ നേരിടുന്ന ജീവിത പ്രശ്നങ്ങളും ചർച്ച ചെയ്യും.
രാജ്യത്തിന്റെ എല്ലാ തലങ്ങളിലും വർഗീയ ഫാസിസം പിടിമുറുക്കുകയാണ്, നമ്മുടെ രാജ്യത്തിന്റെ ഭരണഘടന തന്നെ മാറ്റണമെന്നും മനുസ്മൃതിയുടെ അടിസ്ഥാനത്തിൽ പുതിയ ഭരണഘടന വേണം എന്നും, ആർഎസ്എസ് പരസ്യമായി ആവശ്യപ്പെടുന്നു. മതനിരപേക്ഷതയും, സോഷ്യലിസം എന്ന പേരും ബിജെപിക്ക് ദഹിക്കുന്നില്ല. ഇന്ത്യയെ വീണ്ടും സവർണ്ണ ആധിപത്യത്തിലേക്ക് നയിക്കാനാണ് ഇവർ ശ്രമിക്കുന്നത്. മതവിദ്വേഷം ആളിക്കത്തിക്കുന്നു, മതവും വിശ്വാസവും ഉപയോഗപ്പെടുത്തിക്കൊണ്ട് ജനപിന്തുണ നേടാനാണ് ഇവർ ശ്രമിക്കുന്നത്. അടുത്ത പഞ്ചായത്ത് തെരഞ്ഞെടുപ്പിൽ കോടികൾ വാരിയെറിഞ്ഞ് എങ്ങനെയും കുറെ പഞ്ചായത്ത്കളിലെങ്കിലും ജയിക്കാനാണ് രാജീവ് ചന്ദ്രശേഖരന്റെ നേതൃത്വത്തിലുള്ള ബിജെപിയുടെ സംസ്ഥാന നേതൃത്വം ശ്രമിക്കുന്നത്. ഇതിനെതിരെ ജനങ്ങളെ അണിനിരത്തുന്നതിനുള്ള പരിപാടികൾക്ക് സമ്മേളനം രൂപം നൽകും. ജില്ലയിലെ ജനങ്ങൾ നേരിടുന്ന നിരവധിയായ ജീവിതപ്രശ്നങ്ങൾ ഉണ്ട്, പട്ടയം, സി എച്ച് ആർ ഉൾപ്പെടെയുള്ള വിഷയങ്ങളും ജീവിതപ്രശ്നങ്ങളും സമ്മേളനം ചർച്ച ചെയ്യുന്നതാണ്.
വാഴൂർ സോമൻ അടിമാലിയിൽ ഉദ്ഘാടനം ചെയ്ത്, സംസ്ഥാന കൗൺസിൽ അംഗം ജയാ മധു നയിക്കുന്ന പതാകജാഥയും, തൊടുപുഴ വഴിത്തല ഭാസ്കരൻ സ്മൃതി മണ്ഡപത്തിൽ ജില്ലാ എക്സിക്യൂട്ടീവ് അംഗം സി യു ജോയ് ഉദ്ഘാടനം ചെയ്ത് വി ആർ പ്രമോദ് നയിക്കുന്ന ബാനർ ജാഥയും, സംസ്ഥാന കൗൺസിൽ അംഗം കെ കെ ശിവരാമൻ പാമ്പനാർ എസ് കെ ആനന്ദൻ സ്മൃതി മണ്ഡപത്തിൽ നിന്ന് ഉദ്ഘാടനം ചെയ്ത് സംസ്ഥാന കൗൺസിൽ അംഗം ജോസ് ഫിലിപ്പ് നയിക്കുന്ന കൊടിമര ജാഥയും, മൂന്നാർ സി എ കുര്യൻ സ്മൃതി മണ്ഡപത്തിൽ നിന്ന് സംസ്ഥാന കൗൺസിൽ അംഗം എം വൈ ഔസേപ്പ് ഉദ്ഘാടനം ചെയ്ത് പി. മുത്തുപ്പാണ്ടി നയിക്കുന്ന ഛായാചിത്ര ജാഥയും, കാഞ്ചിയാർ വി പി കുട്ടപ്പൻ നായർ സ്മൃതി മണ്ഡപത്തിൽ നിന്നും ഡിസി അസിസ്റ്റന്റ് സെക്രട്ടറി പ്രിൻസ് മാത്യു കൈമാറി, എ ഐ വൈ എഫ് ജില്ലാ സെക്രട്ടറി കെ ജെ ജോയ്സ് നയിക്കുന്ന ദീപശിഖാ ജാഥയും, കട്ടപ്പന ആർ ശ്രീധരൻ സ്മൃതി മണ്ഡപത്തിൽ നിന്നുള്ള ഛായാചിത്ര ജാഥയും, റെഡ് വോളണ്ടിയർ മാർച്ചിന്റെ അകമ്പടിയോടെ, വി പി കുട്ടപ്പൻ നായർ നഗറിലെ സമ്മേളന നഗരിയിൽ സമാപിക്കും.
പതാക ജില്ലാ സെക്രട്ടറി കെ സലിംകുമാറും, ബാനർ ജില്ലാ അസിസ്റ്റന്റ് സെക്രട്ടറി പി പളനിവേലും, ദീപശിഖ കെ കെ ശിവരാമനും, ചായാചിത്രങ്ങൾ സ്വാഗതസംഘം ചെയർമാൻ വി കെ ധനപാലും, കൊടിമരം സ്വാഗതസംഘം ജനറൽ കൺവീനർ വി ആർ ശശിയും ഏറ്റുവാങ്ങും. തുടർന്നു നടക്കുന്ന പൊതുസമ്മേളനം ബഹു : സംസ്ഥാന റവന്യൂ മന്ത്രി കെ രാജൻ ഉദ്ഘാടനം ചെയ്യും. വി ആർ ശശി സ്വാഗതം പറയും, സത്യൻ മൊകേരി , കെ കെ അഷറഫ്, ഇ എസ് ബിജിമോൾ, എന്നിവർ പ്രസംഗിക്കും. ജോസ് ഫിലിപ്പ് നന്ദി രേഖപ്പെടുത്തും .
18 ന് രാവിലെ 9.45 ന് പ്രതിനിധി സമ്മേളനം കാനം രാജേന്ദ്രൻ നഗറിൽ (കട്ടപ്പന ടൗൺ ഹാൾ) കെ കെ ശിവരാമൻ പതാക ഉയർത്തും. പാർട്ടി ദേശീയ എക്സിക്യൂട്ടീവ് അംഗം കെ പി രാജേന്ദ്രൻ പ്രതിനിധി സമ്മേളനം ഉദ്ഘാടനം ചെയ്യും. 18 ന് 4 മണിക്ക് “ഇന്ത്യൻ സ്വാതന്ത്ര്യ സമരവും രാഷ്ട്രീയ പാർട്ടികളും” എന്ന വിഷയത്തിൽ നടക്കുന്ന സെമിനാർ പി പി സുനീർ എംപി ഉദ്ഘാടനം ചെയ്യും. സംസ്ഥാന എക്സിക്യൂട്ടീവ് അംഗം കെ കെ അഷ്‌റഫ് മോഡറേറ്ററായ സെമിനാറിൽ ബഹു: സംസ്ഥാന കൃഷി വകുപ്പ് മന്ത്രി പി പ്രസാദ് വിഷയം അവതരിപ്പിക്കും ,അഡ്വക്കേറ്റ് സേനാപതി വേണു, അഡ്വക്കേറ്റ് കെഎസ് അരുൺകുമാർ, കമല സദാനന്ദൻ എന്നിവർ ചർച്ചയിൽ പങ്കെടുക്കും .
18ന് രാവിലെ പ്രിൻസ് മാത്യു രാഷ്ട്രീയ റിപ്പോർട്ടും, ജില്ലാ സെക്രട്ടറി കെ സലിംകുമാർ പ്രവർത്തന റിപ്പോർട്ടും അവതരിപ്പിക്കും. 18 ,19 തീയതികളിൽ പ്രതിനിധികൾ റിപോർട്ടുകൾ ചർച്ച ചെയ്യും.
19 ന് ഉച്ചയ്ക്ക് 12 മണിയ്ക്ക് ആദ്യ കാല പാർട്ടി നേതാക്കളുടെ കുടുംബാംഗങ്ങളേ ആദരിക്കും , ആദരിയ്ക്കൽ ചടങ്ങ് ദേശീയ കൗൺസിൽ അംഗം സത്യൻ മൊകേരി ഉദ്ഘാടനം ചെയ്യും .
20ന് സംസ്ഥാന സമ്മേളന പ്രതിനിധികളെയും, പുതിയ ജില്ലാ കമ്മിറ്റിയെയും തെരഞ്ഞെടുക്കും. വാർത്ത സമ്മേളനത്തിൽ സി പി ഐ ജില്ലാ സെക്രട്ടറി കെ സലിംകുമാർ, കെ കെ ശിവരാമൻ തൊടുപുഴ മണ്ഡലം സെക്രട്ടറി വി ആർ പ്രമോദ് , മൂലമറ്റം മണ്ഡലം സെക്രട്ടറി സുനിൽ സെബാസ്റ്റ്യൻ തുടങ്ങിയവർ പങ്കെടുത്തു.
