തൊടുപുഴ: ഇടുക്കിയിലൂടെ കടന്ന് പോകുന്ന ദേശീയപാതാ 85ന്റെ നിര്‍മാണത്തില്‍ അന്വേഷണം നടത്താനുള്ള ഹൈക്കോടതിയുടെ ഇടക്കാല ഉത്തരവിന് പിന്നാലെ കോടതിയില്‍ ഹര്‍ജി നല്‍കിയ പരിസ്ഥിതി പ്രവര്‍ത്തകന്‍ എം.എന്‍ ജയചന്ദ്രന്റെ വീട് യൂത്ത് കോണ്‍ഗ്രസ് പ്രവര്‍ത്തകര്‍ ഉപരോധിച്ചു. യൂത്ത് കോണ്‍ഗ്രസ് തൊടുപുഴ, ദേവികുളം അസംബ്ലി കമ്മറ്റികളുടെ നേതൃത്വത്തിലെത്തിയ പ്രവര്‍ത്തകരാണ് ജയചന്ദ്രന്റെ അനക്കൂട് കവലയിലുള്ള വീടിന് മുന്നില്‍ ഉപരോധ സമരം നടത്തിയത്. പ്രതിഷേധ മുദ്രാവാക്യവുമായി എത്തിയ യൂത്ത് കോണ്‍ഗ്രസ് പ്രവര്‍ത്തകര്‍ എം.എന്‍ ജയചന്ദ്രന്റെ വീടിന്റെ ഗേറ്റ് താഴിട്ട് പൂട്ടുകയായിരുന്നു. വനം വകുപ്പു മായുള്ള എം.എന്‍ ജയചന്ദ്രന്റെ അവിശുദ്ധ കൂട്ടുകെട്ടാണ് ഹര്‍ജിക്ക് പിന്നില്‍ എന്ന് യൂത്ത് കോണ്‍ഗ്രസ് പ്രവര്‍ത്തകര്‍ ആരോപിച്ചു.
ജനദ്രോഹ നടപടികളുമായി ഇനിയും മുന്നോട്ട് പോയാല്‍ എം.എന്‍ ജയചന്ദ്രനെ വീടിന് പുറത്തിറങ്ങാന്‍ അനുവദിക്കില്ലന്ന് പ്രവര്‍ത്തകര്‍ മുന്നറിയിപ്പ് നല്‍കി. സമര ശേഷം പോലീസ് എത്തിയാണ് ഗേറ്റ് തുറന്നു കൊടുത്തത്. സമരപരിപാടി യൂത്ത് കോണ്‍ഗ്രസ് മുന്‍ സംസ്ഥാന സെക്രട്ടറി എം.എ അന്‍സാരി ഉദ്ഘാടനം ചെയ്തു. യൂത്ത് കോണ്‍ഗ്രസ് തൊടുപുഴ നിയോജക മണ്ഡലം പ്രസിഡന്റ് ബിലാല്‍ സമദ് അദ്യക്ഷത വഹിച്ചു. ദേവികുളും നിയോജക മണ്ഡലം പ്രസിഡന്റ് അനില്‍ കനകന്‍ മുഖ്യപ്രഭാഷണം നടത്തി.
ജില്ലാ ജനറല്‍ സെക്രട്ടറിമാരായ ബിബിന്‍ അഗസ്ത്യന്‍, ഷാനു ഷാഹുല്‍, ഫസല്‍ സുലൈമാന്‍ എന്നിവര്‍ പ്രസംഗിച്ചു. നേതാക്കളായ ലിജോ ജോസ് മഞ്ചപ്പിള്ളി, എബി ജോര്‍ജ്, ആഷിന്‍ ടോമി, ഗിരീഷ് കുമാര്‍, വൈശാഖ് എം.എസ് എന്നിവര്‍ നേതൃത്വം നല്‍കി.
