ഉടുമ്പന്നൂര്‍: ജനവാസ മേഖലയിലെ പന്നി ഫാമുകളില്‍ നിന്നുള്ള ദുര്‍ഗന്ധവും മലിന ജലമൊഴുക്കലും കാരണം ജീവിതം ദു:സഹമായെന്ന് പരാതി. ഉടുമ്പന്നൂര്‍ പഞ്ചായത്തിലെ അഞ്ചാം വാര്‍ഡായ വേളൂരിലെ ഒമ്പതോളം കുടുംബങ്ങളാണ് പരാതിയുമായി അധികൃതരെ സമീപിച്ചിരിക്കുന്നത്. വനത്തോട് ചേര്‍ന്ന് കിടക്കുന്ന പ്രദേശമായ ഇവിടെ സാധാരണക്കാരായ ജനങ്ങളാണ് താമസിക്കുന്നത്. വന്യജീവി ശല്യം രൂക്ഷമായ പ്രദേശത്ത് നാലോളം പന്നിഫാമുകള്‍ പ്രവര്‍ത്തിക്കുന്നുണ്ട്. മഴക്കാലത്തും വേനലിലും ഉള്‍പ്പെടെ ഉറവ വെള്ളമൊഴുകുന്ന ഭൂമിയിലാണ് പന്നി ഫാമുകളുടെ പ്രവര്‍ത്തനം. ഫാമുകളില്‍ നിന്നൊഴുകുന്ന മലിന ജലം തങ്ങളുടെ കിണറുകളിലേക്ക് പതിക്കുന്നതായും കുടിവെള്ളത്തില്‍ മാലിന്യം കലരുന്നതായും പ്രദേശവാസികള്‍ പറഞ്ഞു. ഇതിന് പുറമേ സമീപത്തെ തോടുകളിലേക്കും ഫാമുകളില്‍ നിന്നുള്ള മലിന ജലം ഒഴുകിയെത്തുന്നുണ്ട്. പ്രദേശത്തെ ഹെക്ടര്‍ കണക്കിന് കൃഷിയിടങ്ങളിലും മാലിന്യം പരന്ന് കിടക്കുന്ന അവസ്ഥയാണ്. മിക്ക സമയങ്ങളിലും അതിരൂക്ഷമായ ദുര്‍ദന്ധമാണ് പ്രദേശത്തെന്നും നാട്ടുകാര്‍ പറഞ്ഞു. ദുര്‍ഗന്ധം മൂലം വീടുകളില്‍ ഇരുന്ന് ഭക്ഷണം കഴിക്കാന്‍ പോലും ആവാത്ത സ്ഥിതിയുമുണ്ട്. തുറസായ സ്ഥലത്ത് വലിയ കുഴികളില്‍ മറ്റിടങ്ങളിലേതുള്‍പ്പെടെയുള്ള മാലിന്യം വാഹനങ്ങളില്‍ എത്തിച്ച് തള്ളിയിരിക്കുകയാണ്. ഇതിന് പുറമേ ടണ്‍ കണക്കിന് മാലിന്യം കൂട്ടിയിട്ട് തുടര്‍ച്ചയായ ദിവസങ്ങളില്‍ കത്തിക്കുന്നുമുണ്ട്. മാലിന്യം കലര്‍ന്ന ജലം തുടര്‍ച്ചയായി ഉപയോഗിച്ചതിനെ തുടര്‍ന്ന് പ്രദേശത്തെ നിരവധിയാളുകള്‍ക്ക് മഞ്ഞപ്പിത്തം ഉള്‍പ്പെടെയുള്ള പകര്‍ച്ച വ്യാധി പടര്‍ന്ന് പിടിച്ചിരുന്നു. ഫാമുകള്‍ക്കെതിരെ പഞ്ചായത്തില്‍ ഉള്‍പ്പെടെ പരാതി നല്‍കിയെങ്കിലും പരിഹാരമുണ്ടായില്ല. ദുര്‍ഗന്ധവും മലിന ജലം ഉപയോഗിക്കേണ്ട സാഹചര്യവും രോഗങ്ങളും തുടര്‍ച്ചയായപ്പോള്‍ ഏതാനും ചില കുടുംബങ്ങള്‍ ഇവിടെ നിന്നും താമസം മാറുന്ന സാഹചര്യം പോലുമുണ്ടായി. ഏതാനും നാള്‍ മുമ്പ് പരാതി ശക്തമായപ്പോള്‍ പഞ്ചായത്തധികൃതര്‍ എത്തി പരിശോധന നടത്തി. ഇതില്‍ ഒരു ഫാമിന് പ്രവര്‍ത്തനാനുമതി ഇല്ലായിരുന്നെന്ന് കണ്ടെത്തിയതിനെ തുടര്‍ന്ന് അതിന് പഞ്ചായത്തധികൃതര്‍ പ്രവര്‍ത്തന നിരോധനം ഏര്‍പ്പെടുത്തി. എന്നാല്‍ ഫാമിന്റെ പ്രവര്‍ത്തനം നിര്‍ത്തി വയ്പ്പിക്കാന്‍ ഇതുവരെ സാധിച്ചിട്ടില്ലെന്ന് സമീപവാസികള്‍ പറയുന്നു. ഇക്കാര്യം ശ്രദ്ധയില്‍പ്പെടുത്തിയപ്പോള്‍ പോലീസ്, വെറ്റിനറി, ആരോഗ്യ വകുപ്പ് എന്നിവയുടെ സഹകരണത്തോടെ മാത്രമേ ഫാമിന്റെ പ്രവര്‍ത്തനം തടയാന്‍ തങ്ങള്‍ക്ക് സാധിക്കൂവെന്ന് പഞ്ചായത്ത് സെക്രട്ടറി മറുപടി നല്‍കിയതായും പ്രദേശവാസികള്‍ പറഞ്ഞു. നിലവില്‍ ദുര്‍ഗന്ധവും മലിനീകരണവും മൂലം ഒരു രീതിയിലും ഇവിടെ താമസിക്കാന്‍ സാഹചര്യമില്ലെന്നും എത്രയും വേഗം ബന്ധപ്പെട്ട അധികൃതര്‍ ഇടപെട്ട് തങ്ങള്‍ക്ക് സ്വന്തം വീടുകളില്‍ താമസിക്കാനുള്ള സാഹചര്യം ഒരുക്കി തരണമെന്നുമാണ് പ്രദേശവാസികളുടെ ആവശ്യം.
