മൂന്നാർ: ഗോൾഡൻ വില്ലേജ് എന്ന കേന്ദ്ര ബഹുമതി ലഭിച്ച കാന്തല്ലൂരിൽ സ്ട്രോബറി കർഷകർ പ്രതിസന്ധിയിൽ. കാലവസ്ഥാ വ്യതിയാനമാണ് കർഷകർക്ക് വലിയ വെല്ലുവിളി സമ്മാനിച്ചിട്ടുള്ളത്. അപ്രതീക്ഷിത കാലവസ്ഥാ വ്യതിയാനങ്ങളുടെ ഭാഗമായി മഴയുടെ അപ്രതീക്ഷിത വരവ്, സ്ട്രോബെറി വിളകളെ പ്രതികൂലമായി ബാധിച്ചിട്ടുണ്ട്. സ്ട്രോബറി തോട്ടങ്ങളിൽ വൻതോതിലാണ് പഴങ്ങൾ അഴുകി പോകുന്നത്. ശക്തിയേറിയ വെയിലിനൊപ്പം അപ്രതീക്ഷിതമായി ഉണ്ടായ മഴയാണ് ഇത്തരം പ്രതിസന്ധിക്ക് കാരണമെന്ന് കർഷകർ പറയുന്നു. കഴിഞ്ഞ ദിവസങ്ങളിൽ തമിഴ്നാട്ടിൽ പെയ്ത മഴയുടെ ഭാഗമായി കാന്തല്ലൂർ മേഖലകളിലും ഇടവിട്ട ദിവസങ്ങളിൽ മഴ ലഭിച്ചിരുന്നു. പക്ഷിമൃഗാദികളുടെ ശല്യവും സ്ട്രോബറി കർഷകർക്ക് വെല്ലുവിളിയാണ്. വലിയതോതിൽ കൃഷി ചെയ്യുന്ന ആളുകൾ തങ്ങളുടെ തോട്ടങ്ങൾക്ക് മുകളിൽ പ്ലാസ്റ്റിക് വലകൾ വിരിച്ചാണ് ഒരു പരിധിവരെ സംരക്ഷണം ഒരുക്കുന്നത്.
വിപണിയിലെ പ്രശ്നങ്ങളും കർഷകരെ വല്ലാതെ വലയ്ക്കുകയാണ്. സ്ഥിരമായ വിപണി ലഭ്യതയുടെ അഭാവം, വിലകളിലെ അനിശ്ചിതത്വം എന്നിവ കർഷകർക്ക് സാമ്പത്തിക നഷ്ടങ്ങൾ ഉണ്ടാക്കുന്നുണ്ട്. മുൻപ് ഹോർട്ടികോർപ്പ് അടക്കമുള്ള ഏജൻസികൾ കാന്തല്ലൂരിൽ വിപണന സാധ്യതാ സൗകര്യം ഏർപ്പെടുത്തിയിരുന്നു. എന്നാൽ ഇപ്പോൾ ഇത്തരം സൗകര്യങ്ങളും ഇവിടെ അന്യമാണെന്ന് കർഷകർ പറയുന്നു. ഇത് മൂലം തമിഴ്നാട്ടിൽ നിന്നുമെല്ലാം ഇടനില വ്യാപാരികൾ ഇവിടെ നിന്നും കുറഞ്ഞ വിലയ്ക്ക് സ്ട്രോബറി വാങ്ങി കൊണ്ടുപോകുന്നത് വലിയ നഷ്ടമാണ് കർഷകർക്ക് സമ്മാനിക്കുന്നത്. ഇത്തരം ഘട്ടങ്ങളിൽ 200 മുതൽ 250 വരെയാണ് യഥാർത്ഥത്തിൽ കർഷകന് ലഭിക്കുന്ന വില. 500 മുതൽ 800 രൂപ വരെ കിലോഗ്രാമിന് വില വാങ്ങിയാണ് ആവശ്യക്കാരന് വ്യാപാരികൾ ചില്ലറ വിൽക്കുന്നത്. ഫെബ്രുവരി, മാർച്ച് മാസങ്ങളിൽ വിനോദസഞ്ചാരികളുടെ ഗണ്യമായ കുറവും സ്ട്രോബറി കർഷകന് വെല്ലുവിളിയായിട്ടുണ്ട്.
വിനോദസഞ്ചാരികൾ അധികമായി എത്തിയിരുന്ന സമയങ്ങളിൽ തോട്ടത്തിലെത്തി നേരിട്ട് സ്ട്രോബറി വാങ്ങി കൊണ്ടുപോകുന്ന സഞ്ചാരികൾ ധാരാളമായിരുന്നു. വ്യാപകമായി കൃഷി ചെയ്യുന്ന കർഷകർക്ക് തൊഴിലാളികളുടെ കുറവും വില്ലനായിട്ടുണ്ട്. കൃഷിക്കായി ആവശ്യമായ തൊഴിൽശക്തിയുടെ കുറവും പ്രത്യേകിച്ച് വിളവെടുപ്പ് സമയത്ത്, കർഷകർക്ക് വലിയ പ്രശ്നങ്ങളാണ് സൃഷ്ടിക്കുന്നത്. ആധുനിക രീതിയിൽ സ്ട്രോബറി കൃഷി ചെയ്യുന്നതിന് ഒട്ടനവധി സാങ്കേതിക വിദ്യകൾ ഉണ്ടെങ്കിലും കാന്തല്ലൂർ പോലെയുള്ള മലയോര മേഖലകളിലെ ഉൾഗ്രാമങ്ങളിൽ ഇത്തരം സൗകര്യങ്ങൾ ഇല്ലാത്തതും പ്രതിസന്ധിയാണ്. ആധുനിക കൃഷി സാങ്കേതിക വിദ്യകളുടെ അഭാവം വിളയുടെ ഉൽപാദനക്ഷമത കുറയ്ക്കുന്നു. ഈ വെല്ലുവിളികളെ മറികടക്കാൻ, കർഷകർക്ക് സർക്കാർ പിന്തുണയും, ആധുനിക സാങ്കേതിക വിദ്യകളുടെ പ്രയോഗവും, വിപണി സൗകര്യങ്ങളുടെ മെച്ചപ്പെടുത്തലും ആവശ്യമാണെന്ന് കർഷകർ പറയുന്നു. വളരെ വലുപ്പമേറിയതും രുചിയുള്ളതുമായ സ്ട്രോബറി പടങ്ങളാണ് കാന്തല്ലൂരിലെ കൃഷിത്തോട്ടങ്ങളിൽ വിളയുന്നത്.
