തൊടുപുഴ: ജലവിഭവ വകുപ്പിന്റെ നിയന്ത്രണത്തിലുള്ള ഡാമുകള്‍ക്ക് ചുറ്റും ബഫര്‍ സോണ്‍ ഏര്‍പ്പെടുത്തിയ സര്‍ക്കാര്‍ തീരുമാനം അടിയന്തരമായി പിന്‍വലിക്കണമെന്ന് ഡി.സി.സി ജനറല്‍ സെക്രട്ടറി ബിജോ മാണി പത്രസമ്മേളനത്തില്‍ ആവശ്യപ്പെട്ടു. ദൂരവ്യാപകമായ പ്രത്യാഘാതമുണ്ടാക്കുന്ന ഈ ഉത്തരവിനെക്കുറിച്ച് ജലവിഭവ വകുപ്പ് മന്ത്രി റോഷി ആഗസ്റ്റിന്‍ മറുപടി പറയണം. സ്വന്തം വകുപ്പ് മണ്ഡലത്തിലെ ജനങ്ങളെ ബാധിക്കുന്ന തരത്തില്‍ ഉത്തരവിറക്കിയിട്ടും മിണ്ടാതിരിക്കുന്നത് മന്ത്രിയുടെ കഴിവുകേടാണ്.
പട്ടയ ഭൂമിയില്‍ വീടൊഴികെ ഒരു നിര്‍മാണത്തിനും ഇപ്പോള്‍ അനുമതിയില്ല. ഏലം പട്ടയ ഭൂമിയിലാകട്ടെ ഒരു നിര്‍മാണവും പാടില്ലന്നും ഉത്തരവിറക്കി. ദുരന്തനിവാരണ നിയമപ്രകാരം ജില്ലയില്‍ 13 പഞ്ചായത്തുകളില്‍ റെഡ്, ഓറഞ്ച് സോണുകളായി തിരിച്ച് നിര്‍മാണ പ്രവര്‍ത്തനങ്ങള്‍ക്ക് നിയന്ത്രണമേര്‍പ്പെടുത്തി. മതികെട്ടാന്‍ ചോലയുടെ ഒരു കിലോമീറ്റര്‍ ചുറ്റളവില്‍ ബഫര്‍സോണിന്റെ ഭാഗമായും നിര്‍മാണ പ്രവര്‍ത്തനങ്ങള്‍ തടഞ്ഞിരിക്കുകയാണ്. ഇങ്ങനെ ഇടതു സര്‍ക്കാരിന്റെ പല തരത്തിലുള്ള വിലക്കുകളാല്‍ ജനങ്ങള്‍ ദുരിതമനുഭവിക്കുമ്പോഴാണ് ഇപ്പോള്‍ ഡാമുകള്‍ക്ക് ചുറ്റും ബഫര്‍ സോണ്‍ തീരുമാനിച്ചിരിക്കുന്നത്.
കഴിഞ്ഞ ഡിസംബര്‍ 26 നാണ് ജലസംഭരണികളുടെ പരമാവധി വാട്ടര്‍ ലവല്‍ മുതല്‍ രണ്ട് കാറ്റഗറികളായി തിരിച്ച് ബഫര്‍സോണ്‍ തീരുമാനിച്ച് സര്‍ക്കാര്‍ ഉത്തരവിറക്കിയത്. ഇതില്‍ ആദ്യ 20 മീറ്റര്‍ ചുറ്റളവില്‍ ഒരു നിര്‍മാണവും പാടില്ല. 100 മീറ്റര്‍ ചുറ്റളവില്‍ നിര്‍മാണത്തിന് എക്‌സിക്യൂട്ടിവ് എന്‍ജിനീയറുടെ എന്‍.ഒ.സി വേണം. ഇവിടെയും 3 നിലകളിലുള്ള നിര്‍മാണപ്രവര്‍ത്തനങ്ങള്‍ക്കേ അനുമതി നല്‍കുകയുള്ളൂ.
ഇടുക്കി ജില്ലയില്‍ മലങ്കര ഡാമാണ് ജലവിഭവ വകുപ്പിന്റെ നിയന്ത്രണത്തിലുള്ളത്. അറക്കുളം, കുടയത്തൂര്‍, മുട്ടം, ഇടവെട്ടി, ആലക്കോട് വെള്ളിയാമറ്റം എന്നീ ആറ് പഞ്ചായത്തുകളിലെ നൂറ് കണക്കിന് കുടുംബങ്ങളാണ് ഈ ഡാമിന്റെ വൃഷ്ടി പ്രദേശത്ത് താമസിക്കുന്നത്. ഒട്ടേറെ പട്ടിക ജാതി/പട്ടികവര്‍ഗ കോളനികളും ഈ ബഫര്‍ സോണ്‍ പരിധിയിലുണ്ട്. ഇവരുള്‍പ്പടെ ആയിരക്കണക്കിന് കുടുംബങ്ങളെ ഈ ഉത്തരവ് പ്രതികൂലമായി ബാധിക്കും.
ഇപ്പോള്‍ ജലവിഭവ വകുപ്പിന്റെ നിയന്ത്രണത്തിലുള്ള ഡാമുകളില്‍ മാത്രമാണ് ബഫര്‍ സോണ്‍ തീരുമാനിച്ചിരിക്കുന്നതെങ്കിലും വൈകാതെ മറ്റു ഡാമുകളുടെ പരിധിയിലും ബഫര്‍സോണ്‍ ബാധകമാക്കാനാണ് സര്‍ക്കാരിന്റെ നീക്കം. അങ്ങനെ വന്നാല്‍ കാഞ്ചിയാര്‍, അയ്യപ്പന്‍കോവില്‍, ഉപ്പുതറ വില്ലേജുകളിലെ മൂന്ന് ചെയിന്‍ മേഖലയിലും കല്ലാര്‍കുട്ടിയടക്കമുള്ള 10 ചെയിന്‍ മേഖലയിലും ഇനി പട്ടയം നല്‍കാന്‍ കഴിയാതെ വരും. ബഫര്‍സോണ്‍ നടപ്പാക്കാന്‍ നീക്കമുള്ളതിനാലാണ് പത്ത് ചെയിന്‍ മേഖലയില്‍ പട്ടയം നല്‍കുന്ന കാര്യം സര്‍ക്കാരിന്റെ പരിഗണനയില്‍ ഇല്ലന്ന് വൈദ്യുതി മന്ത്രി ഇടുക്കിയില്‍ വന്നപ്പോള്‍ പറയാന്‍ കാരണം.
കേരളത്തില്‍ 20 ഡാമുകളാണ് ജലവിഭവ വകുപ്പിന് കീഴിലുള്ളത്. ഇതില്‍ 9 എണ്ണം പാലക്കാട് ജില്ലയിലും 3 എണ്ണം തൃശൂര്‍ ജില്ലയിലുമാണ്. ഇടുക്കി, എറണാകുളം, കോഴിക്കോട്, കണ്ണൂര്‍, വയനാട്, പത്തനംതിട്ട, കൊല്ലം, തിരുവനന്തപുരം ജില്ലകളില്‍ ഓരോ ഡാമുകളും വകുപ്പിന് കീഴില്‍ ഉണ്ട്.
ജലസംഭരണികളുടെ വൃഷ്ടി പ്രദേശം ജണ്ടകെട്ടി തിരിച്ചിട്ടുണ്ട്. ഇതിന് പുറത്തേക്ക് ബഫര്‍ സോണ്‍ വ്യാപിക്കുന്നത് അംഗീകരിക്കാനാവില്ല. മറ്റൊരിടത്തും ഭൂമിയില്ലാത്തവരും പത്ത് സെന്റില്‍ താഴെ മാത്രം ഭൂമിയുള്ളവരുമായ ആയിരകണക്കിന് കുടുംബങ്ങള്‍ സര്‍ക്കാര്‍ പ്രഖ്യാപിച്ച ബഫര്‍ സോണ്‍ മേഖലയില്‍ താമസിക്കുന്നുണ്ട്. ഇവര്‍ക്ക് ഒരു വീട് പോലും നിര്‍മിക്കാന്‍ കഴിയാത്ത സ്ഥിതിയാണ് ഈ ഉത്തരവ് മൂലം ഉണ്ടാകുക. അടിയന്തരമായി ഈ ഉത്തരവ് പിന്‍വലിക്കാന്‍ സര്‍ക്കാര്‍ തയാറാകണമെന്നും ബിജോ മാണി ആവശ്യപ്പെട്ടു
