‘തില്ലാന’ ബഡ്‌സ് ജില്ലാതല കലോത്സവത്തിന് സമാപനം
തൃശൂര്‍:
നിറഞ്ഞ കൈയടികളും മനസ്സുനിറയ്ക്കുന്ന കലാപ്രകടനങ്ങളുമായി ‘തില്ലാന’ ബഡ്‌സ് ജില്ലാതല കലോത്സവത്തിന് സമാപനം. കുടുംബശ്രീ ജില്ലാ മിഷന്‍ തദ്ദേശസ്ഥാപനങ്ങളുമായി ചേര്‍ന്നാണ് കലോത്സവം സംഘടിപ്പിച്ചത്. തൃശൂര്‍ ടൗണ്‍ ഹാള്‍, ഫൈന്‍ ആര്‍ട്‌സ് കോളേജ്, ?ഗവ. ബോയ്‌സ് ഹയര്‍സെക്കന്‍ഡറി സ്‌കൂള്‍ എന്നീ വേദികളിലായാണ് മത്സരങ്ങള്‍ നടന്നത്. 20 ബഡ്‌സ് സ്‌കൂളില്‍ നിന്നായി 150 പേര്‍ പങ്കെടുത്തു.
ജില്ലയിലെ എല്ലാ ബഡ്‌സ് സ്‌കൂളിലെയും കുട്ടികളെയും അധ്യാപകരെയും ഉള്‍പ്പെടുത്തിയാണ് തില്ലാന അരങ്ങേറിത്. ബഡ്‌സ് സ്‌കൂളിലെ കുട്ടികള്‍ തയ്യാറാക്കിയ വ്യത്യസ്ഥ ഉല്‍പ്പന്നങ്ങളുടെ പ്രദര്‍ശനവും വിപണനവുമുണ്ടായി. ഭിന്നശേഷിക്കാരായ കുട്ടികള്‍ക്ക് സാമൂഹിക മുന്നേറ്റത്തിനൊപ്പം സാമ്പത്തിക സ്വാശ്രയത്വം കൈവരിക്കാനുള്ള മാര്‍ഗങ്ങള്‍ കൂടി ലഭ്യമാക്കുകയാണ് കുടുംബശ്രീയുടെ ലക്ഷ്യം. അതിനായി ഭിന്നശേഷിക്കാരായ കുട്ടികള്‍ക്കും സ്വന്തമായി ഉപജീവനമാര്‍ഗമൊരുക്കാനും അതുവഴി അവരെ സമഗ്രവികാസം കൈവരിക്കാന്‍ സഹായിക്കുകയും കലാപരമായ കഴിവുകള്‍ വളര്‍ത്തിയെടുക്കാനുമാണ് കുടുംബശ്രീ വിവിധ പ്രവര്‍ത്തനങ്ങള്‍ മുന്നോട്ടുവയ്ക്കുന്നത്.