കട്ടപ്പന: അപകടത്തില്‍പെട്ട ബൈക്കില്‍ നിന്നും തെറിച്ചു വീണ അധ്യാപകന്‍ എതിര്‍ ദിശയില്‍ വന്ന ലോറി കയറി മരിച്ചു. കുമളി മുരിക്കടി സ്വദേശി പുളിയന്‍മല ക്രൈസ്റ്റ് കോളജ് അധ്യാപകനായ പുളിക്കപീടികയില്‍ ജോയ്‌സ് പി. ഷിബു (25) ആണ് മരിച്ചത്. വ്യാഴാഴ്ച രാവിലെ 8.15 ഓടെ പുളിയന്‍മല -തൊടുപുഴ റോഡില്‍
പുളിയന്‍മല കമ്പനിപ്പടിയിലായിരുന്നു അപകടം.
പുളിയന്‍മലയില്‍ നിന്നും കട്ടപ്പന ഭാഗത്തേക്ക് വരികയായിരുന്ന ജോയ്‌സിന്റെ ബൈക്ക് മുന്നില്‍ പോകുകയായിരുന്ന ഓട്ടോറിക്ഷയില്‍ ഇടിച്ച് നിയന്ത്രണം വിട്ട് മറിയുകയായിരുന്നു. റോഡിലേക്ക് തെറിച്ചു വീണ ജോയിസിന്റെ ശരീരത്തിലൂടെ എതിര്‍ ദിശയില്‍ വന്ന ലോറി കയറിയിറങ്ങി.
ഓടിക്കൂടിയ നാട്ടുകാരും യാത്രക്കാരും ജോയ്‌സിനെ കട്ടപ്പനയിലെ ആശുപത്രിയിലെത്തിച്ചെങ്കിലും സംഭവ സ്ഥലത്തു തന്നെ മരിച്ചിരുന്നു. ക്രൈസ്റ്റ് കോളജിലെ പൂര്‍വ വിദ്യാര്‍ഥി കൂടിയായ ജോയ്‌സ് ബി.ബി.എ അധ്യാപകനായി ജോലി ചെയ്യുകയായിരുന്നു. വണ്ടന്‍മേട് പോലീസ് സ്ഥലത്തെത്തി മേല്‍ നടപടികള്‍ സ്വീകരിച്ചു. സംസ്‌കാരം വെള്ളി പകല്‍ 11ന് കുമളി അട്ടപ്പള്ളം സെന്റ് തോമസ് ഫൊറോന പള്ളി സെമിത്തേരിയില്‍. അച്ഛന്‍: ഷിബു. അമ്മ: സോളി. സഹോദരി: ജോജിയ.
