കാഞ്ഞാര്‍: ലക്ഷങ്ങള്‍ മുടക്കി ഓട നിര്‍മ്മിച്ചിട്ടും മഴവെള്ളം കുത്തിയൊലിച്ച് ഒഴുന്നത് സംസ്ഥാന പാതയിലൂടെ. തൊടുപുഴ – മൂലമറ്റം സംസ്ഥാന പാതയിലെ കാഞ്ഞാര്‍ കൂവപ്പള്ളി ജങ്ഷനിലെ ഓടയാണ് പ്രയോജന രഹിതമായിരിക്കുന്നത്. ഓടയുടെ നിര്‍മ്മാണം പൂര്‍ത്തിയായി ഏതാനും നാള്‍ കഴിഞ്ഞപ്പോള്‍ മുതല്‍ വെള്ളം ഓടയിലൂടെ ഒഴുകാതെ റോഡിലൂടെയാണ് ഒഴുകുന്നതെന്ന് സമീപവാസികള്‍ പറഞ്ഞു. അധികൃതരുടെ അശാസ്ത്രീയ ഓട നിര്‍മ്മാണം കാരണം പൊതുഖജനാവില്‍ നിന്നും ലക്ഷങ്ങള്‍ പാഴായി പോയതയായും ആക്ഷേപമുണ്ട്.
കൂവപ്പള്ളി റോഡില്‍ നിന്നും മഴവെള്ളം കുത്തിയൊലിച്ച് വന്ന് ജങ്ഷനില്‍ വെള്ളക്കെട്ടും ചെളിയും കല്ലുകളും നിറയുന്നത് സ്ഥിരം കാഴ്ചയായിരുന്നു. നാട്ടുകാരുടെ നിരന്തര പരാതിക്കും പ്രതിഷേധത്തിനും ശേഷമാണ് ഇവിടെ പുതിയ ഓട നിര്‍മ്മിക്കാന്‍ തീരുമാനിച്ചത്. വെള്ളക്കെട്ട് ഉണ്ടാകുന്ന സമയത്ത് ഇവിടെ ഗതാഗത തടസവും നിത്യ സംഭവമായിരുന്നു. റോഡില്‍ വെള്ളം കെട്ടിക്കിടക്കുന്നത് സമീപത്തെ വ്യാപാര സ്ഥാപനങ്ങള്‍ക്കും വലിയ ബുദ്ധിമുട്ട് ഉണ്ടാക്കിയിരുന്നു. കാല്‍ നടയാത്രക്കാരുടെ ദേഹത്തും വാഹനങ്ങള്‍ കടന്നു പോകുമ്പോള്‍ വെള്ളം പതിക്കുന്നതും പതിവാണ്. ഇതിനെല്ലാം ശാശ്വത പരിഹാരം എന്ന നിലയിലയിലാണ് ഓട നിര്‍മ്മിച്ച് സ്ലാബ് ഇടാന്‍ പൊതുമരാമത്ത് വകുപ്പധികൃതര്‍ തീരുമാനിച്ചത്. പദ്ധതിയുടെ ഭാഗമായി സമീപത്ത് പുതിയതായി കലുങ്കും നിര്‍മ്മിച്ചു. ഈ കലുങ്കിന്റെ ഭാഗത്തേക്ക് കൂവപ്പള്ളി റോഡില്‍ നിന്നും വരുന്ന വെള്ളം ഓടയിലൂടെ എത്തിക്കാനായിരുന്നു പദ്ധതി. ഇതിനായി മാസങ്ങളോളം സംസ്ഥാന പാതയില്‍ ഒറ്റവരി ഗതാഗതവും അനുവദിച്ച് ഓട നിര്‍മ്മാണവും ആരംഭിച്ചു. ഒച്ചിഴയുന്ന വേഗതയിലാണ് പണികള്‍ നടന്നത്. അതിനും നാട്ടുകാര്‍ക്ക് വലിയ പരാതി ഇല്ലായിരുന്നു. അല്‍പം താമസിച്ചാലും പണി തീരുമ്പോള്‍ പ്രദേശത്തെ വെള്ളക്കെട്ടിന് പരിഹാരമാകുമെന്ന് നാട്ടുകാര്‍ വിചാരിച്ചു. നാളുകള്‍ നീണ്ട കാത്തിരിപ്പിനൊടുവില്‍ ഓടയുടെ പണി തീര്‍ന്നു. പിന്നെ സ്ലാബിടാനുള്ള കാത്തിരിപ്പായി. പിന്നീട് സ്ലാബും ഓടയുടെ മുകളില്‍ സ്ഥാപിച്ചു. ഇതോടെ ഏറെ നാള്‍ അലട്ടിയിരുന്ന പ്രശ്‌നം പരിഹരിച്ചുവെന്ന് നാട്ടുകാര്‍ കരുതി. എന്നാല്‍ ജൂണ്‍ എത്തും മുമ്പേ ശക്തമായ മഴയില്‍ കൂവപ്പള്ളി റോഡില്‍ നിന്നും കുത്തിയൊലിച്ച് എത്തുന്ന വെള്ളം ഓടയില്‍ വീഴാതെ റോഡിലൂടെ തന്നെയാണ് ഒഴുകിയത്. ഓട നിര്‍മ്മിച്ചില്ലായിരുന്നെങ്കില്‍ അത്രയും പണമെങ്കിലും ലാഭിക്കാമായിരുന്നുവെന്നാണ് നാട്ടുകാര്‍ പറയുന്നത്. ഇതിന് പുറമേ ജല വിതരണക്കുഴല്‍ സ്ഥാപിക്കാനായി ഈ ഭാഗത്ത് എടുത്ത കുഴി വേണ്ട വിധം മൂടിയിട്ടില്ല. മൂടിയ ഭാഗത്താകട്ടെ വീണ്ടും വലിയ കുഴി ഉണ്ടായിട്ടുമുണ്ട്. ഇതും വലിയ അപകട സാധ്യതയാണ് ഉണ്ടാക്കുന്നത്.
