രാജകുമാരി : ആനയിറങ്കൽ പുതുപ്പെരട്ടിനു സമീപം കാട്ടാനയുടെ ജഡം കണ്ടെത്തി. ഇന്നലെ രാവിലെയാണ് 6 വയസ്സിൽ അധികം പ്രായമുള്ള പിടിയാനയുടെ ജഡം തോട്ടം തൊഴിലാളികൾ കണ്ടത്. ഇവർ അറിയിച്ചതനുസരിച്ച് ദേവികുളം റെയിഞ്ച് ഓഫീസർ അഖിൽ കെ. ബാബു, ബോഡിമെട്ട് സെക്ഷൻ ഫോറസ്റ്റ് ഓഫീസർ സി.കെ. സുജിത്ത് എന്നിവരുടെ നേതൃത്വത്തിൽ ഉദ്യോഗസ്ഥർ സ്ഥലത്തെത്തി.
കാട്ടാനക്കൂട്ടത്തിനൊപ്പം നടന്നു പോയപ്പോൾ കാൽവഴി കൊക്കയിലേക്ക് പതിച്ചതിനെ തുടർന്നുണ്ടായ പരുക്കാണ് പിടിയാന ചരിയാൻ കാരണമെന്നാണ് വനംവകുപ്പിന്റെ നിഗമനം. ആനയുടെ ജഡത്തിന് രണ്ട് ദിവസത്തിലധികം പഴക്കമുണ്ട്. ഏതാനും ദിവസങ്ങളായി പ്രദേശത്ത് കാട്ടാനക്കൂട്ടത്തിന്റെ സാന്നിധ്യം ഉണ്ടായിരുന്നു എന്ന് തൊഴിലാളികൾ പറഞ്ഞു.
വനം വകുപ്പ് സീനിയർ വെറ്ററിനറി സർജൻ ഡോ.റിനോജ് ജോസഫ് , ഡോ.ജിൻസി ജോസഫ്, ഡോ. ആർ.അനുരാജ് എന്നിവരുടെ നേതൃത്വത്തിലുള്ള സംഘം ആനയുടെ ജഡം പോസ്റ്റ്മോർട്ടം നടത്തിയ ശേഷം സംസ്കരിച്ചു.
