തൊടുപുഴ: ലഹരിയുടെ നീരാളി പിടുത്തത്തിൽ നിന്ന് ക്യാമ്പസുകളെ മുക്തമാക്കാൻ ആവശ്യമായ ഇടപെടലുകൾ നടത്തണമെന്ന് കെ.എസ്.യു സംസ്ഥാന പ്രസിഡൻ്റ് അലോഷ്യസ് സേവ്യർ.സംസ്ഥാന സർക്കാർ നടത്തുന്ന ലഹരി വിരുദ്ധ പോരാട്ടങ്ങൾക്ക് പൂർണ്ണ പിന്തുണ നൽകുമെന്നും കെ.എസ്.യു സംസ്ഥാന പ്രസിഡൻ്റ് വ്യക്തമാക്കി. യാത്ര തിരുവനന്തപുരത്ത് സമാപിക്കുമ്പോൾ മുഖ്യമന്ത്രിയെയും ബന്ധപ്പെട്ട അധികാരികളെയും നേരിൽ കണ്ട് നിർദ്ദേശങ്ങൾ സമർപ്പിക്കുമെന്നും അലോഷ്യസ് സേവ്യർ പറഞ്ഞു.
കേരളത്തെ കാർന്നു തിന്നുന്ന ലഹരി മാഫിയകൾക്കെതിരെ ജനമനസ്സുകളും സർക്കാർ സംവിധാനങ്ങളും ഉണർന്ന് പ്രവർത്തിക്കുന്ന മെന്നാവശ്യപ്പെട്ട് കൊണ്ട് “രാസ ലഹരി മാഫിയക്കെതിരെ വിദ്യാർത്ഥി മുന്നേറ്റം എന്ന മുദ്രാവാക്യം ഉയർത്തി കെ.എസ്.യു സംസ്ഥാന പ്രസിഡൻ്റ് അലോഷ്യസ് സേവ്യർ നയിക്കുന്ന “ക്യാമ്പസ് ജാഗരൻ യാത്രയ്ക്ക് തൊടുപുഴ ന്യൂമാൻ കോളേജിൽ നൽകിയ സ്വീകരണ യോഗത്തിൽ സംസാരിക്കുകയായിരുന്നു അദ്ദേഹം.
ജില്ലയുടെ ചുമതലയുള്ള സംസ്ഥാന ജന:സെക്രട്ടറി നിതിൻ മണക്കാട്ടുമണ്ണിൽ അദ്ധ്യക്ഷത വഹിച്ചു.എൻ.എസ്.യു.ഐ ദേശീയ ജന:സെക്രട്ടറി അനുലേഖ ബൂസ സംസ്ഥാന വൈസ് പ്രസിഡൻ്റുമാരായ അരുൺ രാജേന്ദ്രൻ, എം.ജെ യദുകൃഷ്ണൻ, മുഹമ്മദ് ഷമ്മാസ്, ആൻ സെബാസ്റ്റ്യൻ, ജില്ലാ പ്രസിഡൻ്റ് നിതിൻ ലൂക്കോസ്, സംസ്ഥാന ഭാരവാഹികളായ ജിതിൻ ഉപ്പുമാക്കൻ, അസ്ലം ഓലിക്കൻ, ജോസൂട്ടി ജോസഫ് ,നെസിയ മുണ്ടപ്പള്ളി ഡിസിസി ജനറൽ സെക്രട്ടറിമാരായ ടി.ജെപീറ്റർ, എൻ.ഐ ബെന്നി, കരിമണ്ണൂർ ബ്ലോക്ക് കോൺഗ്രസ് കമ്മിറ്റി പ്രസിഡന്റ് രാജു ഓടയ്ക്കൽ, കോൺഗ്രസ് മണ്ഡലംപ്രസിഡൻ്റുമാരായ സജീവ് എം എച്ച്, രാജേഷ് ബാബു, ഡിസിസി അംഗം ജാഫർ ഖാൻ മുഹമ്മദ് എന്നിവർ പ്രസംഗിച്ചു.
