മൂന്നാർ : പഴയ മൂന്നാറിലെ ടാറ്റ ഫുട്ബോൾ മൈതാനത്ത് ലോകകപ്പ് കാണാം എന്ന് പറഞ്ഞാൽ ആരും ആദ്യമൊന്ന് അമ്പരക്കും. എന്നാൽ ഇത് വാസ്തവമാണ്. തോട്ടം മേഖലയിലെ ലോകകപ്പ് എന്നറിയപ്പെടുന്ന ഫിൻലേ കപ്പിന്റെ 76 മത് ടൂർണമെന്റിന് ഫെബ്രുവരി എട്ടിന് ഈ മൈതാനം സാക്ഷിയാകും.
എട്ടു പതിറ്റാണ്ടു മുൻപ് ബ്രിട്ടിഷ് ഭരണകാലത്താണ് കേരളത്തിലെ ഏറ്റവും പഴക്കംചെന്ന ടൂർണമെന്റുകളിൽ ഒന്നായ ഫിൻലേ കപ്പിന് മൂന്നാറിൽ തുടക്കം കുറിച്ചത്. 1941ൽ ബ്രിട്ടിഷ് ഉടമസ്‌ഥതയിലായിരുന്ന ജയിംസ് ഫിൻലേ തേയില കമ്പനിയിലെ ജനറൽ മാനേജരായിരുന്ന ഇ.എച്ച്. ഫ്രാൻസിസ് ആണ് മത്സരങ്ങൾക്ക് തുടക്കമിട്ടത്.
ആദ്യകാലങ്ങളിൽ മുപ്പതിലേറെ ടീമുകൾ പങ്കെടുക്കുന്ന ഒന്നരമാസം നീളുന്ന ഉത്സവമായിരുന്നു ടൂർണമെന്റ്. പിന്നീട് കമ്പനികൾ പുനഃസംഘടിപ്പിച്ചപ്പോൾ ടീമുകളുടെ എണ്ണം കുറഞ്ഞു. എന്നാൽ ഇതൊന്നും തോട്ടം തൊഴിലാളിലയങ്ങളിലെ കായിക താരങ്ങളുടെയും കാണികളുടെയും ആവേശം കുറയ്ക്കുന്നില്ല. മത്സരം ആരംഭിച്ചാൽ മൂന്നാറിന് പിന്നെ ഉത്സവപ്രതീതിയാണ്. തോട്ടം ജോലികൾക്ക് ഇടവേള നൽകി എസ്റ്റേറ്റിന്റെ പേരുൾപ്പെടെയുള്ള ജേഴ്സിയും ബൂട്ടുമണിഞ്ഞ് കളിക്കളത്തിലേക്ക് ഇറങ്ങുന്ന ഓരോ കായികതാരത്തെക്കാൾ ആവേശവും കൗതുകവും ആണ് മത്സരം കാണാനെത്തുന്ന മറ്റാളുകൾക്കുള്ളത്. ഫില്ലേ കപ്പിലൂടെ തിളങ്ങിയ കായികതാരങ്ങളും നിരവധിയുണ്ട്.
പുതുതലമുറയെ പ്രതിനിധാനം ചെയ്ത് യുവതാരങ്ങൾ ബൂട്ടാണിഞ്ഞ് മൈതാനത്തേക്ക് എത്തുമ്പോൾ അവർക്കൊപ്പം ഇതേ മൈതാനത്ത് വർഷങ്ങളുടെ പാരമ്പര്യവുമായി പ്രായമായ തൊഴിലാളികളും റോക്കറ്റ് ഷോട്ടുകൾ പായിക്കുന്ന കാഴ്ച കാണണമെങ്കിൽ ഫിൻലേ ടൂർണമെന്റിന് തന്നെ എത്തണം.
എല്ലാ ദിവസവും നടക്കുന്ന മത്സരത്തിൽ പങ്കെടുക്കുന്ന ടീമുകൾ പ്രതിനിധാനം ചെയ്യുന്ന എസ്റ്റേറ്റിലെ തൊഴിലാളികൾക്കും മത്സരം കാണുന്നതിനുവേണ്ടി ഉച്ചയ്ക്കുശേഷം അവധി നൽകുകയും ചെയ്യും. ഇതോടെ മൈതാനം ആവേശഭരിതമായി മാറും.
76 ടൂർണമെന്റിന് തിരിതെളിയുമ്പോൾ രണ്ടാം ലോകമഹായുദ്ധകാലത്തും കോവിഡ് കാലത്തും മാത്രമാണ് മത്സരങ്ങൾ നിർത്തിവച്ചിട്ടുള്ളത്.
ഇഞ്ചോടിഞ്ച് ബോറടിക്കുന്ന മത്സരത്തിൽ വിജയിക്കുന്ന ടീമിന് പ്രശസ്തമായ ഫിൻലേ ഷീൽഡിൽ പേര് രേഖപ്പെടുത്തി നൽകും. മികച്ച പ്രകടനം നടത്തുന്നവർക്ക് വ്യക്തിഗത സമ്മാനവും ഉണ്ട്. ഇതുമാത്രമല്ല മത്സരത്തിൽ മികവ് പുലർത്തുന്നവർ പിന്നീട് തൊഴിലാളി ലയങ്ങൾക്കിടയിലെ താരങ്ങളായും മാറും.
ഫെബ്രുവരി എട്ടിന് ആരംഭിക്കുന്ന ടൂർണമെന്റ് 22 വരെ നീളും. മത്സരങ്ങൾ മൂന്നാർ ഡിവൈഎസ്പി അലക്സ് ബേബി ഉദ്ഘാടനം ചെയ്യും ടാറ്റാ റ്റി, കണ്ണൻ ദേവൻ ഹിൽസ് പ്ലാന്റേഷൻ, ഹാരിസൺ മലയാളം, കണക്ട് ബിസിനസ് സൊല്യൂഷൻസ് എന്നിവിടങ്ങളിൽ നിന്നായി 14 ഓളം ടീമുകളാണ് മത്സരത്തിൽ മാറ്റുരയ്ക്കുന്നത്. 22ന് ഉച്ചയ്ക്ക് 2.30 നടക്കുന്ന ഫൈനൽ പോരാട്ടത്തിലൂടെ വിജയിയെ അറിയാം.
കഴിഞ്ഞ രണ്ടു വർഷങ്ങളായി കെഡിഎച്പി ഗൂഡാർവിള ടീമാണ് കിരീടം സ്വന്തമാക്കുന്നതെങ്കിലും ഇക്കുറി വിട്ടുകൊടുക്കാൻ മനസ്സില്ലാതെയാണ് മറ്റ് ടീമുകൾ തയ്യാറെടുക്കുന്നത്.
എങ്ങനെയാണെങ്കിലും ടാറ്റ ഇന്റർ കമ്പനി ഫുട്ബോൾ ടൂർണമെന്റും, ഫിൻലേ കപ്പ് ടൂർണ്ണമെന്റ് മടക്കം മൂന്നാറിനിനി കാൽപന്താവേഷത്തിന്റെ നാളുകളാണ്.
