കോടമഞ്ഞില്‍ പച്ചപുതച്ച് കിടക്കുന്ന സുന്ദരമായ ഇടമാണ് വട്ടവട. മൂന്നാറില്‍ നിന്ന് വെറും 44 കിലോമീറ്റര്‍ അകലെയുള്ള കാര്‍ഷിക ഗ്രാമമായ വട്ടവട പ്രകൃതി ഭംഗികൊണ്ടും തണുപ്പുകൊണ്ടും മൂന്നാറിനെ വെല്ലും. മൂന്നാറില്‍ എത്തുന്ന ഭൂരിഭാഗം സഞ്ചാരികളും ഒഴിവാക്കുന്ന വട്ടവടയിലേക്കുള്ള യാത്ര തന്നെ മനസ്സ് നിറയ്ക്കുന്നതാണ്.
‘ആറുമണി കഴിഞ്ഞാല്‍ പണികിട്ടും’; വട്ടവട യാത്രയില്‍ ഇക്കാര്യങ്ങള്‍ ശ്രദ്ധിക്കണം
മൂന്നാറില്‍ നിന്ന് വട്ടവടയിലേക്കുള്ള യാത്ര ആരംഭിക്കുന്നത് തേയില തോട്ടങ്ങള്‍ക്ക് നടുവിലൂടെയുള്ള റോഡിലൂടെയാണ്. കോടമഞ്ഞ് നിറഞ്ഞ കാലാവസ്ഥയില്‍ നേരിയ തണുപ്പ് അനുഭവിച്ചുള്ള യാത്ര ഏതൊരു സഞ്ചാരിക്കും നല്‍കുന്നത് വ്യത്യസ്ത അനുഭവമാണ്. യൂക്കാലിപ്‌സ് മരങ്ങള്‍ക്ക് നടുവിലൂടെയുള്ള യാത്രയില്‍ അഞ്ചോളം വിനോദ സഞ്ചാര കേന്ദ്രങ്ങളുണ്ട്. ഫോട്ടോ പോയിന്റ് , മാട്ടുപ്പെട്ടി ഡാം, എക്കോ പോയിന്റ് , കുണ്ടള അണക്കെട്ട് , വ്യൂ പോയിന്റ് എന്നീ പ്രധാന വിനോദ സഞ്ചാര കേന്ദ്രങ്ങള്‍ കഴിഞ്ഞാണ് വട്ടവടയിലേക്ക് എത്തുക.
മൂന്നാര്‍ ടൗണില്‍ നിന്ന് 35 കിലോമീറ്റര്‍ അകലെയുള്ള പാമ്പാടും ഷോല നാഷണല്‍ പാര്‍ക്കിലൂടെയാണ് പിന്നീട് വട്ടവടയിലേക്കുള്ള യാത്ര. വന്യ മൃഗങ്ങളുടെ സാന്നിധ്യമുള്ള പാമ്പാടും ഷോല നാഷണല്‍ പാര്‍ക്കിലെ പ്രധാന കവാട കഴിഞ്ഞുള്ള അഞ്ച് കിലോമീറ്റര്‍ സഞ്ചരിച്ചാല്‍ വട്ടവടയിലേക്ക് എത്താം. ഇവിടെ നിന്നും ഏതാനം രണ്ട് കിലോമീറ്റര്‍ അകലെയാണ് തമിഴ്‌നാട് അതിര്‍ത്തിയോട് ചേര്‍ന്നുകിടക്കുന്ന വട്ടവട എന്ന ചൊറിയ ഗ്രാമം.
പശ്ചിമഘട്ടത്തിലെ പഴനി മലനിരകളിലാണ് പഴങ്ങളും പച്ചക്കറികളും ധാരാളം വിളയുന്ന വട്ടവട എന്ന മനോഹര ഗ്രാമം സ്ഥിതി ചെയ്യുന്നത്. അതിര്‍ത്തി ഗ്രാമമായതിനാല്‍ തന്നെ തമിഴും മലയാളവുമാണ് ഇവിടുത്തെ സംസാരഭാഷ. തട്ടുതട്ടുകളായി കൃഷി ചെയ്യുന്ന രീതിയാണ് വട്ടവടയിലെ ആകര്‍ഷങ്ങളിലൊന്ന്. സീസണ്‍ അനുസരിച്ചുള്ള കൃഷി രീതിയാണ് വട്ടവട പിന്തുടരുന്നത്. അകലെ നിന്നുള്ള ഈ കാഴ്ച അതീവ മനോഹരമാണ്. 2011ലെ സെന്‍സസ് പ്രകാരം വട്ടവടയില്‍ 3,292 ആളുകള്‍ മാത്രമാണുള്ളതെന്നാണ് വ്യക്തമാക്കുന്നത്. 12.27 ചതുരശ്ര മൈല്‍ വ്യാപ്തിയുള്ള ഗ്രാമത്തില്‍ ആകെയുള്ളത് 901 കുടുംബങ്ങളാണ്.
വിനോദസഞ്ചാരികളുടെ പ്രിയ ലൊക്കേഷനായ വട്ടവട അടുത്ത സീസണ്‍ കാലത്തിന് ഒരുങ്ങുകയാണ്. ഡിസംബര്‍, ജനുവരി, ഫെബ്രുവരി മാസങ്ങളാണ് വട്ടവടയില്‍ തണുപ്പുള്ള കാലാവസ്ഥ എത്തുന്നത്. ഈ മാസങ്ങളാണ് വട്ടവടയിലെ സീസണ്‍ സമയം. മൂന്നാറിനേക്കാള്‍ തണുപ്പുള്ള കാലാവസ്ഥയാണ് സമുദ്രനിരപ്പില്‍ നിന്ന് 1,450 മീറ്റര്‍ ഉയരത്തില്‍ സ്ഥിതി ചെയ്യുന്ന ഇവിടെയുള്ളത്.
വട്ടവടയില്‍ എത്തിയാല്‍ പ്രധാനമായും കാണാന്‍ സാധിക്കുക തട്ടുകളായി തിരിച്ച് അതിമനോഹരമായ രീതിയിലുള്ള കൃഷികളാണ്. പഴങ്ങളും പച്ചക്കറികളും ധാരാളായി കൃഷി ചെയ്യുന്നുണ്ട്. കൃഷിയിടങ്ങള്‍ക്ക് നടുവിലൂടെയുള്ള ചെറിയ റോഡുകളും ചെറിയ വീടുകളും പ്രദേശത്തിന്റെ ഭംഗി ഇരട്ടിയാക്കുന്നുണ്ട്. വട്ടവട ടൗണില്‍ നിന്ന് നിശ്ചിത ദൂരം സഞ്ചരിച്ചാല്‍ വട്ട ഗ്രാമം മുഴുവന്‍ കാണാന്‍ സാധിക്കുന്ന വ്യൂ പോയിന്റില്‍ എത്താം. മുകളില്‍ നിന്നുള്ള ഈ യാത്രയില്‍ വട്ടവട പൂര്‍ണമായി കാണാനാകും.
വട്ടവട ഗ്രാമത്തില്‍ നിന്ന് എട്ട് കിലോമീറ്റര്‍ അകലെ പച്ചപ്പിന് നടുവിലായി സ്ഥിതി ചെയ്യുന്ന വെള്ളച്ചാട്ടമാണ് ചിലന്തിയാര്‍ വെള്ളച്ചാട്ടം വട്ടവടയില്‍ എത്തുന്നവര്‍ ഒരിക്കലും ഈ സ്ഥലം മിസ്സ് ചെയ്യാന്‍ പാടില്ല. വട്ടവട ടൗണിനോട് ചേര്‍ന്ന ‘ഹണി മ്യൂസിയം’ സന്ദര്‍ശിക്കാന്‍ പറ്റിയ ഇടമാണ്. ഇന്ത്യയിലെ ആദ്യത്തെ ഹണി മ്യൂസിയം എന്ന വിശേഷവും ഇതിനുണ്ട്. അതിനാല്‍ തന്നെ വട്ടവട യാത്ര ആരെയും നിരാശരാക്കില്ല എന്ന കാര്യം ഉറപ്പാണ്.
