രണ്ടാം ഭാര്യയെ കൊലപ്പെടുത്തിറബര്‍ തോട്ടത്തില്‍ ഉപേക്ഷിച്ചു-പ്രതി പിടിയിലാകുമ്പോള്‍ ഒപ്പം വിദേശ വനിതയും

-കുറവിലങ്ങാട് നിന്നും കൊലപ്പെടുത്തിയ ശേഷം മൃതദേഹം ചെപ്പുകുളത്ത് ഉപേക്ഷിച്ചു

തൊടുപുഴ: കോട്ടയം കുറവിലങ്ങാട് നിന്നും കാണാതായ വീട്ടമ്മയുടെ മൃതദേഹം ഇടുക്കി ഉടുമ്പന്നൂരിലെ ചെപ്പുകുളത്തിന് സമീപത്തെ റബര്‍ തോട്ടത്തില്‍ നിന്നും കണ്ടെത്തി. കുറവിലങ്ങാട് പട്ടിത്താനം സ്വദേശിനി ജെസി കെ. ജോര്‍ജ്ജി (50) ന്റെ മൃതദേഹമാണ് വെള്ളിയാഴ്ച വൈകിട്ട് പോലീസ് കണ്ടെത്തിയത്. ഉടുമ്പന്നൂര്‍ – തട്ടക്കുഴ – ചെപ്പുകുളം റോഡില്‍ ചക്കൂരാംമാണ്ടി എന്ന സ്ഥലത്ത് വിജനമായ പറമ്പില്‍ ഉപേക്ഷിച്ച നിലയിലായിരുന്നു മൃതദേഹം. റോഡില്‍ നിന്നും 30 അടിയോളം താഴ്ചയിലാണ് മൃതദേഹം കിടന്നിരുന്നത്. സംഭവവുമായി ബന്ധപ്പെട്ട് ജെസിയുടെ ഭര്‍ത്താവ് കപ്പടാകുന്നേല്‍ സാം ജോര്‍ജ് കുറവിലങ്ങാട് പോലീസിന്റെ കസ്റ്റഡിയിലാണ്. ഇരുവരും തമ്മില്‍ കുടുംബ വഴക്കും കോടതികളില്‍ കേസും നിലനിന്നിരുന്നു. ഇതിന്റെ തുടര്‍ച്ചയായി ജെസിയെ സാം ജോര്‍ജ്ജ് കൊലപ്പെടുത്തി റബര്‍ തോട്ടത്തില്‍ തള്ളുകയായിരുന്നുവെന്നാണ് പോലീസിന്റെ കണ്ടെത്തല്‍. സംഭവത്തെ കുറിച്ച് പോലീസ് പറയുന്നത് ഇങ്ങനെ: കഴിഞ്ഞ മാസം 26ന് വിദേശത്ത് ജോലി ചെയ്യുന്ന മക്കള്‍ ജെസിയെ ഫോണില്‍ ബന്ധപ്പെടാന്‍ ശ്രമിച്ചെങ്കിലും സാധിച്ചില്ല. ഇതേ തുടര്‍ന്ന് ഇവരുടെ അഭിഭാഷകന്‍ ശശികുമാറും കുടുംബ സുഹൃത്തും മുഖേന വീട്ടില്‍ നടത്തിയ അന്വേഷണത്തില്‍ ജെസിയെ കാണാനില്ലെന്ന് വ്യക്തമായി. ഇക്കാര്യം ഉറപ്പിച്ചതോടെ കുറവിലങ്ങാട് പോലീസില്‍ പരാതി നല്‍കി. ഇതിന്റെ അടിസ്ഥാനത്തില്‍ പോലീസ് നടത്തിയ അന്വേഷണത്തില്‍ ഭര്‍ത്താവ് സാം ജോര്‍ജ്ജിനെ ബംഗളരുവില്‍ നിന്നും കസ്റ്റഡിയില്‍ എടുത്തു. തുടര്‍ന്ന് നടത്തിയ ചോദ്യം ചെയ്യലില്‍ ജെസിയെ കൊലപ്പെടുത്തിയതായി സാം ജോര്‍ജ്ജ് സമ്മതിച്ചു. ഇയാളുടെ മൊഴിപ്രകാരം കുറവിലങ്ങാട് പോലീസ് ചെപ്പുകുളത്ത് എത്തി. പ്രതി ചൂണ്ടിക്കാണിച്ച് ഭാഗത്ത് പോലീസ് നടത്തിയ പരിശോധനയില്‍ മൃതദേഹം കണ്ടെത്തി. കഴിഞ്ഞ മാസം 26ന് കുറവിലങ്ങാട്ടുള്ള വീട്ടില്‍ വച്ച് ഇരുവരും തമ്മില്‍ തര്‍ക്കവും വഴക്കുമുണ്ടായി. ഇതിനിടെ രണ്ടാം ഭാര്യയായ ജെസിയെ ഇയാള്‍ ശ്വാസംമുട്ടിച്ച് കൊലപ്പെടുത്തുകയായിരുന്നു. തുടര്‍ന്ന് വീട്ടില്‍ സൂക്ഷിച്ച മൃതദേഹം 27ന് പുലര്‍ച്ചെ വാഹനത്തില്‍ കയറ്റി ചെപ്പുകുളത്ത് എത്തിച്ച് റോഡരികില്‍ നിന്നും താഴേക്ക് തള്ളുകയായിരുന്നു. ഇതിന് ശേഷം സ്ഥലത്ത് നിന്നും മടങ്ങിയ സാം ജോര്‍ജ്ജ് ബംഗളരുവിലേക്ക് കടന്നു. ഏതാനും വര്‍ഷങ്ങള്‍ക്ക് മുമ്പ് പ്രതി ചെപ്പുകുളത്ത് താമസിച്ചിരുന്നു. അന്നുണ്ടായിരുന്ന സ്ഥല പരിചയത്തിലാണ് ജെസിയുടെ മൃതദേഹം ഇവിടെ ഉപേക്ഷിച്ചത്. ബംഗളരുവില്‍ നിന്ന് കസ്റ്റഡിയില്‍ എടുത്ത സാം ജോര്‍ജ്ജിനൊപ്പം സുഹൃത്തായ വിദേശ വനിതയും ഉണ്ടായിരുന്നു. ഇവര്‍ക്ക് കൊലപാതകത്തില്‍ പങ്കുണ്ടോയെന്ന് വ്യക്തമല്ല. കൊക്കയില്‍ നിന്നും കണ്ടെത്തിയ മൃതദേഹം ജീര്‍ണിച്ച നിലയിലായിരുന്നു. തൊടുപുഴ അഗ്‌നിരക്ഷാസേന എത്തിയാണ് മൃതദേഹം റോഡിലേക്ക് കയറ്റിയത്. തുടര്‍ന്ന് ഇന്‍ക്വസ്റ്റ് നടപടികള്‍ പൂര്‍ത്തിയാക്കി മൃതദേഹം കോട്ടയം മെഡിക്കല്‍ കോളേജിലേയ്ക്ക് മാറ്റി. സംഭവമറിഞ്ഞ് കരിമണ്ണൂര്‍ പോലീസും സ്ഥലത്തെത്തിയിരുന്നു.